ឯកឧត្តមអនុរដ្ឋលេខាធិការ ទឹម បូរក្ស ដឹកនាំក្រុមការងារសហគមន៍នេសាទ (ស.ន) ចុះពិនិត្យ និងពង្រឹងសហគមន៍នេសាទនៅខេត្តកំពត

ចេញ​ផ្សាយ​ ៥ មិថុនា ២០២៦ 3491

នៅថ្ងៃទី៤-៥ ខែមិថុនា ឆ្នាំ២០២៦ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឱ្យឯកឧត្តមរដ្ឋលេខាធិការ ហាស់ សារ៉េត បានដឹកនាំក្រុមការងារសហគមន៍នេសាទ(ស.ន) ចុះពិនិត្យ និងពង្រឹងសហគមន៍នេសាទនៅខេត្តកំពត។
ក្នុងដំណើរនេះ ក្រុមការងារបានជួបពិភាក្សាជាមួយគណៈកម្មការសហគមន៍នេសាទលកកោះគ្រឹះស្នា សហគមន៍នេសាទត្រពាំងសង្កែ និងសហគមន៍នេសាទកំពង់សាមគ្គី ដោយមានការចូលរួមពី លោកស្រី កាំង ឃីម អគ្គនាយករងនៃអគ្គនាយកដ្ឋានជលផល ថ្នាក់ដឹកនាំនាយកដ្ឋាន និងមន្ត្រីនៃអគ្គនាយកដ្ឋានជលផល ព្រមទាំងគណៈកម្មការនិងសមាជិក ស.ន និងថ្នាក់ដឹកនាំខណ្ឌរដ្ឋបាលជលផលកំពត។
ឯកឧត្តមអនុរដ្ឋលេខាធិការបានគូសបញ្ជាក់ថា នៅខេត្តកំពតមានសហគមន៍នេសាទចំនួន០៨ បានចុះបញ្ជីផ្លូវការនៅក្រសួងកសិកម្មរួចរាល់ហើយ។ ទន្ទឹមនេះឯកឧត្តមបានណែនាំទៅសហគមន៍នេសាទទាំងអស់ត្រូវអនុវត្តតួនាទីភារកិច្ចរបស់ខ្លួន ត្រូវអប់រំផ្សព្វផ្សាយដល់សមាជិក និងអ្នកពាក់ព័ន្ធចូលរួមទប់ស្កាត់និងបញ្ឈប់គ្រប់សកម្មភាពល្មើសនេសាទទាំងអស់ ជាពិសេសត្រូវការពារនិងអភិរក្សធនធាននៅក្នុងកន្លែងសហគមន៍នេសាទឱ្យមានប្រសិទ្ធភាពខ្ពស់។ 
បច្ចុប្បន្ន សហគមន៍នេសាទលកកោះគ្រឹះស្នា ដែលមានសមាជិក១២៤០នាក់ បាននិងកំពុងអនុវត្តនូវសកម្មភាពមួយចំនួនដូចជា ការងារល្បាតជាប្រចាំ ដាំកោងកាង និងកំពុងរៀបចំដំណើរការអេកូទេសចរណ៍ជលផល។ បន្ថែមលើសនេះ នៅទីតាំងសហគមន៍នេះមានសក្តានុពលសម្រាប់ពង្រីកមុខរបរបន្ថែម មានដូចជា ការចិញ្ចឹមក្រែងឈាម ចិញ្ចឹមត្រីតាបែរ (ត្រីឆ្ពង់និងត្រីតឹកកែ អាចបានពី ៥០០-១០០០បែរ) ចិញ្ចឹមក្តាមថ្ម និងចិញ្ចឹមគ្រំចំពុះទា។ ចំណែក សហគមន៍នេសាទត្រពាំងសង្កែជាសហគមន៍មួយគំរូនៅខេត្តកំពត មានសមាជិក១២៨៨នាក់ មានទំហំ៣៣៧ហត បាននិងកំពុងអនុវត្តរកប្រាក់ចំណូលបានដោយខ្លួនឯងតាមរយៈអនុវត្តសកម្មភាពអេកូទេសចរណ៍ជលផលនៅក្នុងទីតាំងរបស់ខ្លួន ដោយមានផ្ទះស្នាក់ ទូកដឹកភ្ញៀវកំសាន្ត មានស្ពានដើរកំសាន្តមើលកោងកាង ផ្តល់សេវាម្ហូបអាហារ និងលក់កូនកោងកាងដល់ភ្ញៀវទេសចរដាំទុកជាអនុស្សាវរីយ៍ និងចិញ្ចឹមត្រីស្ពង់ក្នុងបែរផងដែរ៕