ព័ត៌មានផ្សេងៗទៀត
ធ្វើកសិកម្ម កសិករនិងអ្នកបច្ចេកទេសត្រូវតែពឹងនិងជួយគ្នាទៅវិញទៅមក
ចេញផ្សាយ ២២ មករា ២០១៨ 3989
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានរំលឹកដល់កសិករ និងអ្នកជំនាញកសិកម្ម ថាទាំងពីរនេះត្រូវតែពឹងពាក់គ្នា ទៅវិញទៅមកពិសេសអ្នកជំនាញកសិកម្ម ត្រូវតែជួយទៅដល់កសិករ ឲ្យសកម្មខណ:ដែលកម្ពុជា មានការតាំងចិត្ត ប្រែក្លាយខ្លួនឲ្យទៅជាប្រទេសនាំអង្ករចេញនៅឆ្នាំ២០១៥ខាងមុខ។
ខណ:ពេលចុះពិនិត្យ ការធ្វើស្រូវប្រាំងជាលើកទី២ និងដំណាំឪឡឹក នៅភូមិព្រៃម្លប់ ឃុំដូងខ្ពស់ ស្រុកបុរីជលសា កាលពីចុងសប្តាហ៍នេះ ឯកឧត្តមរដ្ឋមន្ត្រីកសិកម្ម ដែលចូលរួមថា កសិករ ត្រូវតែផ្លាស់ឥរិយាបថ ក្នុងការធ្វើកសិកម្ម ដែលធ្វើតាមទម្លាប់តៗគ្នា ហើយងាកទៅរកការណែនាំ របស់់អ្នកជំនាញកសិកម្ម ពោលគឺព្យាយាមទទួលយកចំណេះដឹងថ្មី។ ចំណែកជំនាញ ក៏ត្រូវសកម្មក្នុងការចុះពន្យល់ផ្សព្វផ្សាយណែនាំ និងជួយដោះស្រាយបញ្ហាជូនកសិករ។
ដោយសម្លឹង ទៅរកស្រូវប្រាំង ដែលកំពុងលូតលាស់ ឯកឧត្តមរដ្ឋមន្ត្រី បានមានប្រសាសន៍ថា មន្ទីរកសិកម្មខេត្តត្រូវធ្វើបង្ហាញជូនកសិករនៅទីនេះ ក្នុងការប្រើប្រាស់ពូជអ៊ីអ៊ែរ៦៦ ដែលជាពូជមានប្រសិទ្ធភាពសេដ្ឋកិច្ចខ្ពស់សមស្រប សម្រាប់ទីកន្លែងនេះ។ ជាមួយគ្នានេះក៏ត្រូវរៀបចំវេទិកាកសិករ ដើម្បីឲ្យកសិករ និងកសិករ បានជួបគ្នាផ្លាស់ប្តូរបទពិសោធន៍ ទៅវិញទៅមក ដោយមានមន្ត្រីជំនាញ ជាអ្នកសម្របសម្រួល និងផ្តល់ការណែនាំបន្ថែម។
ឯកឧត្តម បានស្នើឲ្យរៀបចំនូវសហគមន៍កសិករ ផលិតពូជអ៊ីអ៊ែរ៦៦ សម្រាប់លក់ចេញទៅតំបន់ផ្សេងទៀត ពីព្រោះស្រូវនេះមានតម្លៃខ្ពស់នៅលើទីផ្សារ។ ឯកឧត្តមបានបន្ថែមថា កសិករក៏ត្រូវធ្វើការកត់ត្រារាល់ចំណាយផ្សេងៗ ក្នុងការធ្វើកសិករ ដើម្បីរកឲ្យឃើញនូវចណូលចំណាយ ។ បើមិនមានការប្រៀបធៀបទេនោះ ការធ្វើកសិកម្មដោយគ្មានការផ្អៀងផ្ទាត់នោះ យើងមិនអាចរកឃើញនូវការកែលម្អបានឡើយ។
ក្នុងពេលដែលពិនិត្យស្រូវប្រាំង នៅទីនោះអ្នកជំនាញបានរំលឹកដល់កសិករអំពីការទិញពូជមកប្រើប្រាស់ ត្រូវតែពិនិត្យឲ្យបានម៉ត់ចត់ និងគួរសាកល្បងជាមុនសិន។ ចំណែកឯកឧត្តមរដ្ឋមន្ត្រីបានបញ្ជាក់ថា កសិករគប្បីបញ្ឈប់ការប្រើប្រាស់ពូជស្រូវ ដែលមានប្រភពមិនច្បាស់ និងពេលដាំដុះត្រូវចុះពិនិត្យតាមដានសុខភាពស្រូវនិងដំណាំឲ្យបានជាប់ជាប្រចាំ។
