ឯកឧត្តមរដ្ឋលេខាធិការ តូច ប៊ុនហួរ និងឯកឧត្តម ចាន់ ចេស្តា អញ្ជើញដឹកនាំក្រុមការងារចុះពិនិត្យវឌ្ឍនភាព និងតម្រង់ទិសនៃការគ្រប់គ្រង ការអនុវត្តកម្មវិធី ASPIRE-AT និងគម្រោង CFAVC ក្នុងភូមិសាស្រ្តខេត្តកំពង់ចាម

ចេញ​ផ្សាយ​ ១២ ឧសភា ២០២៦ 3248

នៅថ្ងៃទី១១ ខែឧសភា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការតម្រង់ទិសកម្មវិធី (ASPIRE-AT) និងឯកឧត្តម ចាន់ ចេស្តា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទនិងជាប្រធានគណៈកម្មាធិការតម្រង់ទិសគម្រោង (CFAVC) បានអញ្ជើញដឹកនាំក្រុមការងារចុះពិនិត្យវឌ្ឍនភាព និងតម្រង់ទិសនៃការគ្រប់គ្រង ការអនុវត្តកម្មវិធី ASPIRE-AT និងគម្រោង CFAVC ក្នុងភូមិសាស្រ្តខេត្តកំពង់ចាម។
ក្នុងដំណើរចុះពិនិត្យនេះ មានការចូលរួមអមដំណើរពី ឯកឧត្តមអនុរដ្ឋលេខាធិការ សៀក ឡេង នាយកគម្រោង CFAVC ឯកឧត្តមអនុរដ្ឋលេខាធិការ ចាន់ សុវត្ថិភាព ឯកឧត្តមអនុរដ្ឋលេខាធិការ សាយ សុភភោគា  លោក កើត កិត្តិនាថ ប្រធានគ្រប់គ្រងគម្រោង CFAVC រួមទាំងលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម មន្ត្រី និងទីប្រឹក្សាកម្មវិធី ASPIRE-AT មន្រ្តីនិងទីប្រឹក្សាគម្រោង CFAVC មន្រ្តីកសិកម្មឃុំ ព្រមទាំងសមាជិក សមាជិកា សហគមន៍កសិកម្ម។
ឯកឧត្តមរដ្ឋលេខាធិការ បានគូសបញ្ជាក់ថា បេសកកម្មនេះ រៀបចំឡើងក្នុងគោលបំណង ចុះពិនិត្យទីតាំងជាក់ស្តែង លើការចិញ្ចឹមមាន់ស្រែរបស់កសិករនាំមុខ និងការប្រើប្រាស់ឥណទានដែលទទួលបានពីកម្មវិធី ASPIRE-AT តាមរយៈ ARDB  និងសកម្មភាពនៃការប្រើប្រាស់ឡជីវឧស្ម័ន រោងជីកំប៉ុស្តិ៍ និងការកៀរពង្រាបដីដោយប្រព័ន្ធឡាស៊ែរ របស់កសិករ ដែលជាសមាជិកសហគមន៍កសិកម្មអភិវឌ្ឍន៍កសិករ នៃគម្រោង CFAVC ស្ថិតនៅភូមិស្អាត ឃុំត្រពាំងគរ ស្រុកជើងព្រៃ ខេត្តកំពង់ចាម។ 
ជាមួយគ្នានេះ ក៏មានការហាលសម្ងួត និងការទុកដាក់គ្រាប់ស្វាយចន្ទី របស់សហគមន៍កសិកម្មអារក្សត្នោតអភិវឌ្ឍន៍ ស្ថិតនៅភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម។ បន្ថែមពីនេះ ក្រុមការងារក៏បានពិភាក្សាលើការបង្កើត QR Code សម្រាប់ផ្លែទុរេន ដែលចាំបាច់ត្រូវមាន Cambodia Good Agricultural Practices (CamGAP) ស្ថិតនៅសហគមន៍កសិកម្មផ្លែទុរេនបែកអន្លូង ភូមិបែកអន្លូង ឃុំអារក្សត្នោត ស្រុកស្ទឹងត្រង់ ខេត្តកំពង់ចាមផងដែរ៕