លោកជំទាវ ហោ ម៉ាលីន ប្រធានក្រុមការងារយេនឌ័រនិងកុមារ នៃក្រសួងកសិកម្ម អញ្ជើញដឹកនាំប្រតិភូចុះបំពេញបេសកកម្មនៅខេត្តស្ទឹងត្រែង ដើម្បីតាមដានពីការអនុវត្តច្បាប់ជាតិពាក់ព័ន្ធគោលនយោបាយ លើកកម្ពស់ សុខុមាលភាពស្ត្រី

ចេញ​ផ្សាយ​ ២២ មីនា ២០២៤ 3474

នៅថ្ងៃទី២១-២២ ខែមីនា ឆ្នាំ២០២៤ លោកជំទាវ ហោ ម៉ាលីន រដ្ឋលេខាធិការ និងជាប្រធានក្រុមការងារ យេនឌ័រនិងកុមារ នៃក្រសួងកសិកម្ម រុក្ខាប្រមាញ់ និងនេសាទ និងជាសមាជិកក្រុមប្រឹក្សាជាតិកម្ពុជាដើម្បីស្ត្រី បានដឹកនាំប្រតិភូចុះបំពេញបេសកកម្មនៅខេត្តស្ទឹងត្រែង ដើម្បីចុះតាមដានការអនុវត្តច្បាប់ជាតិពាក់ព័ន្ធ គោលនយោបាយ វិធានការក្នុងការលើកកម្ពស់សុខុមាលភាពស្ត្រី។

ការចុះបំពេញបេសកម្មនេះ ធ្វើឡើងក្នុងគោលបំណងចុះតាមដានការអនុវត្តច្បាប់ជាតិពាក់ព័ន្ធ គោលនយោបាយវិធានការ និងអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អនុប្រធានកិត្តិយសក្រុមប្រឹក្សាជាតិកម្ពុជាដើម្បីស្ត្រី ក្នុងការលើកកម្ពស់ស្ថានភាព ជីវភាព ឋានៈ តួនាទី និងសុខុមាលភាពស្ត្រី ដើម្បីជួបពិភាក្សាជាមួយស្នងការនគរបាលខេត្ត មេបញ្ជាការកងរាជអាវុធហត្ថ ប្រធានសាលាដំបូង ប្រធានពន្ធនាគារ ប្រធានមន្ទីរ/អង្គភាពពាក់ព័ន្ធជុំវិញខេត្ត អង្គការមិនមែនរដ្ឋាភិបាលពាក់ព័ន្ធ។

បន្ថែមពីលើនេះ លោកជំទាវ ហោ ម៉ាលីន បានអញ្ជើញជួបសំណេះសំណាលជាមួយ ឯកឧត្តមអភិបាលនៃគណៈអភិបាលខេត្តស្ទឹងត្រែងផងដែរ៕