ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារចុះពិនិត្យស្ថានភាពទឹកសង្គ្រោះស្រូវ នៅស្រុកបាទី ខេត្តតាកែវ
ចេញផ្សាយ ២៧ មករា ២០២៥ 2862
នៅថ្ងៃទី២៧ ខែមករា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមដំណើដោយឯកឧត្តម ឈុំ ឆុនលី និងលោកញឹប ស៊្រន ប្រធានមន្ទីរកសិកម្ម ខេត្តតាកែវ បានអញ្ជើញចុះពិនិត្យស្ថានភាពទឹកសង្គ្រោះស្រូវ នៅស្រុកបាទី ខេត្តតាកែវ។
ដំណើរចុះពិនិត្យនេះ ជាលទ្ធផលបង្ហាញថា ទឹកទន្លេបាទី ទទួលទឹកពីខេត្តកំពង់ស្ពឺ បានកើនឡើងជាងមុនប្រមាណ ៣០-៣៥ ស.ម និងបានផ្អាកបូម ដោយបូមទឹកដោយម៉ាស៊ីនទាំង៥ ព្រោះកម្ពស់ទឹកអាចបង្ហូរតាមទ្វារទឹកបាន។ ចំណែកជម្រៅទឹកក្នុងប្រឡាយមានពី១-១.៥ម៉ែត្រ តាមស្ថានភាពដី។
ឯកឧត្តមរដ្ឋលេខាធិការបានបញ្ជាក់ផងដែរថា នៅម៉ោង ៧:០០ ព្រឹកថ្ងៃនេះ កសិករបានចាប់ផ្តើមបូមទឹកបញ្ចូលស្រែ ទៅតាមការណែនាំ ក្នុងឱកាសជួបសំណេះសំណាលរបស់ ឯកឧត្តម គន់ គីម ទេសរដ្ឋមន្ត្រី អនុប្រធានទី១ គណ:កម្មាធិការជាតិគ្រប់គ្រងគ្រោះមហន្តរាយ ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី២១ ខែមករា កន្លងមកនេះ។
ទន្ទឹមនឹងនេះ ឯកឧត្តមរដ្ឋលេខាធិការ បានវាយតម្លៃថា នៅល្ងាចនេះ ទឹកអាចស្រកស្ទើរតែអស់ពីប្រឡាយ ព្រោះសន្ទុះនៃការបូមទឹកត្រឹមតែ៤ម៉ោងប៉ុណ្ណោះ មានចំណុចមួយចំនួនទឹកបានស្រកដល់បាតប្រឡាយ។ និយាយជារួម កសិករទាំងអស់បានបូមទឹកដាក់គ្រប់គ្នា គ្រាន់តែបានតិចឬច្រើន ទៅតាមទំហំម៉ាស៊ីន។ ប៉ុន្តែទឹកនៅតែបន្តបង្ហូរទម្លាក់ពីទន្លបាទី ហើយរយ:ពេល២ឬ៣ថ្ងៃខាងមុខនេះ នឹងមានទឹកពេញគ្រប់ស្រែទាំងអស់(សម្រាប់ជុំទី១)។ សូមបញ្ជាក់ថា ស្រែមួយចំនួនមានអាយុកាលក្រោម៥០ថ្ងៃ ដោយត្រូវការទឹកបូមដាក់ស្រែជុំទី២បន្ថែមទៀត។
ឯកឧត្តមរដ្ឋលេខាធិការ បន្ថែមថា នៅ២០២៥ មានឃុំចំនួន២ ក្នុងស្រុកសំរោងខ្វះខាតទឹកស្រោចស្រព ស្រូវប្រាំង លើផ្ទៃដី៣៤៣ហិកតា។ ឃុំដែលរងផលប៉ះពាល់រួមមាន ឃុំរវៀង ផ្ទៃដីប៉ះពាល់ ២៣ហិកតា ត្រូវការទឹកបន្ទាន់ដើម្បីជួយសង្រ្គោះ និងឃុំស្លា ផ្ទៃដីប៉ះពាល់ចំនួន ៣២០ហិកតា ក្នុងនោះផ្ទៃដី៥៧ហិកតាស្ថិតក្នុងដំណាក់កាលទុំត្រូវការទឹក១លើកទៀត ដើម្បីទទួលបានទិន្នផលល្អ ចំពោះផ្ទៃដីផ្សេងៗទៀត ស្ថិតក្នុងដំណាក់កាលលូតលាស់ត្រូវការទឹកសង្គ្រោះបន្ទាន់៕
