ព័ត៌មានផ្សេងៗទៀត
ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រមណ្ឌលខេត្តបន្ទាយមានជ័យ អញ្ជើញចូលរួមក្នុងពិធីបុណ្យបញ្ចុះខណ្ឌសីមា និងសម្ភោធឆ្លងព្រះវិហារថ្មី នៅវត្តរតននិមិត្ដសំពៅផល ខេត្តបន្ទាយមានជ័យ
ចេញផ្សាយ ៣ មេសា ២០២៥ 3060
នៅថ្ងៃទី៣ ខែមេសា ឆ្នាំ២០២៥ ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រមណ្ឌលខេត្តបន្ទាយមានជ័យ និងលោកជំទាវ បានអញ្ជើញជាអធិបតីភាពពិធីសម្ពោធឆ្លងព្រះវិហារថ្មី នៅវត្តរតននិមិត្តសំពៅផល ស្ថិតនៅភូមិព្រែកសំរោង ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។
ពិធីនេះក៏មានការចូលរួមសំណាក់ឯកឧត្តម លោកជំទាវ សមាជិកព្រឹទ្ធសភា រដ្ឋសភា ឯកឧត្តម ស្រី វុឌ្ឍី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងក្រុមការងារចុះមូលដ្ឋានស្រុកស្រុកមង្គលបូរី ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលនៃគណៈអភិបាលខេត្ត ព្រះសង្ឃ ប្រជាពលរដ្ឋ និងមន្ត្រីរាជការគ្រប់លំដាប់ថ្នាក់ក្នុងស្រុកមង្គលបូរី។
នាឱកាសនេះ ឯកឧត្តម កែ គឹមយ៉ាន បានសម្តែងនូវការអបអរសាទរ និងកោតសរសើរចំពោះព្រះភិក្ខុធិត សគុណោ កេត ភីរ៉ា ព្រះចៅអធិការវត្តដែលបានដឹកនាំកសាងនូវសមិទ្ធផលថ្មីៗជាច្រើន ពិសេសការដឹកនាំពុទ្ធបរិស័ទ សប្បុរសជន ទាំងក្នុងនិងក្រៅប្រទេស កសាងព្រះវិហារថ្មី ដែលមានបណ្តោយប្រវែង២២ម៉ែត្រ ទទឹងប្រវែង១២,៤៥ ម៉ែត្រ មានរចនាបទខ្មែរ ដោយបានបញ្ចប់ការសាងសង់ជាស្ថាពរនៅដើមឆ្នាំ២០២៥។
ជាទីបញ្ចប់ ឯកឧត្តមតំណាងរាស្ត្រ បានបញ្ជាក់បន្ថែមថា ក្រោមការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាលកម្ពុជា បានធ្វើឱ្យប្រទេសកម្ពុជាទទួលបាននូវសុខសន្តិភាពពេញលេញ និងការអភិវឌ្ឍន៍រីកចម្រើនលើគ្រប់វិស័យ។ ក្នុងនោះដែរស្រុកមង្គលបូរី ការងារសន្តិសុខ សណ្តាប់ធ្នាប់ គឺមានលក្ខណៈល្អប្រសើរ ដោយមានការយកចិត្តទុកដាក់ខ្ពស់ពីថ្នាក់ដឹកនាំ ក្នុងការជំរុញនូវការអនុវត្តគោលនយោបាយភូមិ ឃុំ សង្កាត់មានសុវត្ថិភាព ធ្វើឱ្យគ្រប់រូបភាពនៃបទល្មើសមានការថយចុះ និងបង្ក្រាបបានទាន់ពេលវេលា៕
