ក្រសួងកសិកម្ម រុក្ខាប្រមាញ់ និងនេសាទ និងគ្រឹះស្ថានមីក្រូហិរញ្ញវត្ថុ​ចម្រើន ម.ក ធ្វើពិធីចុះហត្ថលេខាលើអនុស្សរណៈនៃការយោគយល់គ្នា ក្នុង​​​ក្របខណ្ឌអនុវត្តគម្រោង «ការបង្កើនភាពធន់នឹងអាកាសធាតុ ក្នុងខ្សែ​ច្រវាក់​​តម្លៃកសិកម្មនៅកម្ពុជា»

ចេញ​ផ្សាយ​ ៧ តុលា ២០២៥ 629

នៅថ្ងៃទី៦ ខែតុលា ឆ្នាំ ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខា​ធិការក្រសួងកសិកម្ម រុក្ខាប្រមាញ់ និងនេសាទ និងលោក Yannick Nicolas Milev ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុចម្រើន ម.ក បានចុះហត្ថលេខាលើអនុស្សរណៈនៃការយោគយល់គ្នា (MoU) ក្នុង​ក្របខណ្ឌនៃការអនុវត្តន៍គម្រោង «ការបង្កើនភាពធន់នឹងអាកាសធាតុ ក្នុង​ខ្សែច្រវាក់តម្លៃកសិកម្មនៅកម្ពុជា» (Climate Resilience Enhancement for Building Adaptive Capacity in Agri-Value Chains in Cambodia, CREA) ដែលគម្រោងនេះ​បាន​ទទួល​ការគាំទ្រថវិកាពី មូលនិធិបរិស្ថានសាកល (GEF) តាមរយៈមូលនិធិ​អន្តរជាតិ​សម្រាប់អភិវឌ្ឍន៍កសិកម្ម (IFAD) ។
សូមជម្រាបជូនថា គ្រឹះស្ថានមីក្រូហិរញ្ញវត្ថុចម្រើន នឹងសហការជាមួយ​ក្រសួងកសិកម្ម រុក្ខាប្រមាញ់ និងនេសាទ ដើម្បីផ្តល់ហិរញ្ញប្បទាន ឬ ដើម​ទុន សរុបចំនួន ១ ៤៥០ ០០០ ដុល្លារអាមេរិក ជូនកសិករ និង​សហគមន៍​​កសិកម្ម សម្រាប់វិនិយោគលើសម្ភារ បរិក្ខារ គ្រឿងយន្ត ដែល​ជាបច្ចេកវិទ្យាជួយធ្វើឱ្យផលិតកម្មកសិកម្មកាន់តែមានភាពធន់នឹងការប្រែប្រួលអាកាសធាតុ និងរួមចំណែកកាត់បន្ថយបញ្ហាដែលបង្កឱ្យមាន​ការ​ប្រែប្រួលអាកាសធាតុ៕