ព័ត៌មានផ្សេងៗទៀត
ក្រុមអន្តរាគមន៍ថ្នាក់ជាតិ ទប់ស្កាត់ និងបង្ក្រាបបទល្មើសជលផលបឹងទន្លេសាប សហការជាមួយកម្លាំងចម្រុះពាក់ព័ន្ធ ចុះត្រួតពិនិត្យ និងបង្ក្រាបបទល្មើសនេសាទ នៅសង្កាត់ចុងឃ្នៀស ក្រុងសៀមរាប
ចេញផ្សាយ ១៨ កក្កដា ២០២៦ 1631
នៅថ្ងៃទី១៧ ខែកក្កដា ឆ្នាំ២០២៦ ក្រុមអន្តរាគមន៍ថ្នាក់ជាតិទប់ស្កាត់ និងបង្ក្រាបបទល្មើសជលផលបឹងទន្លេសាប ប្រចាំស្នាក់ការកំពង់ភ្លុក ដឹកនាំដោយលោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប បានសហការជាមួយខណ្ឌរដ្ឋបាលជលផលសៀមរាប ផ្នែករដ្ឋបាលជលផលចុងឃ្នៀស សង្កាត់រដ្ឋបាលជលផលភ្នំក្រោម សហគមន៍នេសាទចុងឃ្នៀស ដឹកនាំដោយលោក ពត វណ្ណដេត រដ្ឋបាលក្រុងសៀមរាប រដ្ឋបាលសង្កាត់ចុងឃ្នៀស និងប្រជាការពារ ដឹកនាំដោយលោក ហាយ យង់ អភិបាលរងក្រុងសៀមរាប មន្ទីរបរិស្ថានខេត្តសៀមរាប និងកម្លាំងកងទ័ពចំណុះយោធភូមិភាគទី ៤ បានចុះត្រួតពិនិត្យ និងទប់ស្កាត់បង្ក្រាបបទល្មើសនេសាទ នៅក្នុងសង្កាត់ចុងឃ្នៀស ក្រុងសៀមរាប។
ក្នុងប្រតិបត្តិការបង្ក្រាបនោះ គឺធ្វើឡើងចាប់ពីចំណុចមាត់ពាមចុងឃ្នៀស សង្កាត់ចុងឃ្នៀស ក្រុងសៀមរាប រហូតដល់ចំណុចជ្រោយពពាយ ចំណុចថ្គោល និងចំណុចអូរប្រតប់ ស្ថិតក្នុងសង្កាត់ចុងឃ្នៀស ក្រុងសៀមរាប។
ជាលទ្ធផល កម្លាំងចម្រុះបានធ្វើការរុះរើ និងបំផ្លាញចោលនូវឧបករណ៍ស្បៃមុងខុសច្បាប់នៅនឹងកន្លែងចំនួន ០១ ករណី រួមមាន៖ របាំងស្បៃមុងចំនួន ១១៥ ខ្សែ សាច់ស្បៃមុងប្រវែង ៥,៥៥០ ម៉ែត្រ ក្បាលលូស្បៃមុងចំនួន ១៥ គ្រឿង បង្គោលចំរឹងចំនួន ១,២០០ ដើម ព្រមទាំងបានធ្វើការចាក់លែងត្រីចម្រុះប្រមាណ ១០០ គីឡូក្រាម ចូលទៅក្នុងបឹងធម្មជាតិវិញផង
