Other News
ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារថ្នាក់ខេត្ត ចុះពិនិត្យស្ថានភាពផលិតកម្មកសិកម្ម រួមទាំងបញ្ហាប្រឈមនានានៃការដាំបន្លែ នៅខេត្តមណ្ឌលគិរី
ចេញផ្សាយ ៨ មេសា ២០២៦ 2954
នារសៀលថ្ងៃទី៨ ខែមេសា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងកែលម្អសន្តិសុខទឹកកម្ពុជា បន្ទាប់ពីពិធីបើកសិក្ខាសាលាបណ្ដុះបណ្ដាលស្ដីពីទស្សនទានយេនឌ័រ បានបន្តដឹកនាំក្រុមការងារថ្នាក់ខេត្ត ចុះពិនិត្យស្ថានភាពផលិតកម្មកសិកម្ម និងលើកទឹកចិត្តដល់កសិករ ព្រមទាំងពិនិត្យបញ្ហាប្រឈមនានា របស់ក្រុមហ៊ុនដាំបន្លែចិន នៅក្នុងខេត្តមណ្ឌលគិរី។
គោលបំណងនៃការចុះពិនិត្យនេះ ដើម្បីជួបសួរសុខទុក្ខ និងលើកទឹកចិត្តកសិករ ព្រមទាំងស្វែងយល់អំពីស្ថានភាពផលិតកម្ម វឌ្ឍនភាព និងបញ្ហាប្រឈមផ្សេងៗ ដែលកើតមានក្នុងការអនុវត្តការងារកសិកម្មប្រចាំថ្ងៃ ដើម្បីលើកកម្ពស់ប្រសិទ្ធភាពផលិតកម្ម និងជំរុញការអភិវឌ្ឍវិស័យកសិកម្មឱ្យកាន់តែប្រសើរឡើង។
នាដំណើរចុះពិនិត្យនោះ ឯកឧត្តមបណ្ឌិត ហ៊ាន វណ្ណហន និងក្រុមការងារក៏បានពិភាក្សាអំពីឧបសគ្គ ភាពជោគជ័យ និងបញ្ហារាំងស្ទះនានា ដើម្បីស្វែងរកដំណោះស្រាយសមស្រប ឆ្លើយតបនឹងស្ថានភាពជាក់ស្តែង និងជំរុញបង្កើនប្រសិទ្ធភាពផលិតកម្មជាដើម។
សូមបញ្ជាក់ថា ការដាំដុះបន្លែនៅតំបន់នោះត្រូវបានអនុវត្តទាំងក្នុង និងក្រៅផ្ទះសំណាញ់ ដែលផ្ទះសំណាញ់មានសមត្ថភាពការពារកម្តៅថ្ងៃ និងសត្វល្អិត ព្រមទាំងអាចបើកចំហខ្យល់បានល្អ ជួយបង្កើនគុណភាព និងទិន្នផលដំណាំ ព្រមទាំងការផលិតផ្តោតលើបន្លែដែលមានតម្រូវការខ្ពស់នៅទីផ្សារ ដែលមានដូចជា៖ ត្រសក់ ម្ទេស និងល្ពៅ ជាដើម៕
