ព័ត៌មានផ្សេងៗទៀត
មន្ត្រីជំរុញការរៀបចំមជ្ឈមណ្ឌលស្រាវជ្រាវដំណាំចំណីសត្វ
ចេញផ្សាយ ២២ មករា ២០១៨ 4242
ឯកឧត្តមរដ្ឋមន្ត្រីក្រសួងកសិកម្ម បានបង្ហាញពីបំណងរៀបចំ ឱ្យមាននូវមជ្ឈមណ្ឌលស្រាវជ្រាវដំណាំចំណីសត្វ ជាមួយនឹងការរៀបចំមន្ទីរពិសោធន៏ចំណីសត្វផងដែរ ខណៈដែលនយោបាយរបស់ក្រសួង បានជំរុញឱ្យកសិករប្ដូរទម្លាប់ពីការចិញ្ចឹមសម្រាប់គ្រួសារ ឱ្យទៅជាការចិញ្ចឹមសម្រាប់ធ្វើពាណិជ្ជកម្ម ។
ឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ដល់មន្ដ្រីនាយកដ្ឋានផលិតកម្ម និងបសុព្យាបាលថា នាយកដ្ឋានត្រូវគិតគូររៀបចំ ឱ្យមាននូវមជ្ឈមណ្ឌលស្រាវជ្រាវដំណាំចំណីសត្វ រៀបចំមន្ទីរពិសោធន៏ចំណីសត្វ និងគួរជំរុញ និងលើកទឹកចិត្ដឱ្យក្រុមហ៊ុនវិនិយោគសត្វ ដើម្បីធានាដល់ការផ្គត់ផ្គង់ ក្នុងស្រុកកាត់បន្ថយការនាំចូល និងប្រើប្រាស់ឱ្យអស់លទ្ធភាព វត្ថុធាតុដើមក្នុងស្រុក។
ឯកឧត្ដមបន្ដទៀតថា ជាមួយនេះក៏ជំរុញ និងលើកទឹកចិត្ដដល់ក្រុមហ៊ុនអាជីវករ ឱ្យជំរុញវិនិយោគការងារចិញ្ចឹមសត្វ យកស៊ុតទឹកដោះសាច់។ ជំរុញប្រជាជនឱ្យចិញ្ចឹមដោយដាក់ទ្រុង ដាំដំណាំចំណីសត្វ ហើយគួរជ្រើសរើសភូមិ ឃុំណាមួយជាគំរូ ក្នុងការចិញ្ចឹមសត្វដាក់ទ្រុង និងដាំដំណាំចំណីសត្វ។ ជំរុញការងារចិញ្ចឹមសត្វ ពីការផ្គត់ផ្គង់ក្នុងគ្រួសារ ទៅជាការចិញ្ចឹមសត្វសម្រាប់ធ្វើពាណិជ្ជកម្ម ។
វិស័យចិញ្ចឹមសត្វ នៅកម្ពុជារយះពេលប៉ុន្មានឆ្នាំចុងក្រោយនេះ បានបង្ហាញនូវការកើនឡើង ប៉ុន្ដែរបាយការ នៃការចិញ្ចឹមនេះ មិនទាន់ជ្រួតជ្រាបច្រើន ទៅក្នុងចំណោមប្រជាជននៅជនបទនៅឡើយទេ។
ឯកឧត្ដមរដ្ឋមន្ដ្រីបានផ្ដល់នូវការណែនាំថា នាយកដ្ឋានត្រូវគិតគូររៀបចំវិស័យផលិតកម្មសត្វ ឱ្យបានរឹងមាំ និងរីកចម្រើនធានាបានការផ្គត់ផ្គង់សុខភាពសត្វ សុវត្ថិភាពម្ហូបអាហារ ។ រៀបចំលិខិតបទដ្ឋានច្បាប់ ឱ្យបានចប់សព្វគ្រប់ រួចពង្រឹងការអនុវត្ដន៏ឱ្យមានប្រសិទ្ធភាព ។
ការិយាល័យពរទ្យសត្វខេត្ដត្រូវធ្វើស្ថិតិ ក្របីកសិដ្ឋាន គ្លីនិកសត្វ សត្ដឃាតដ្ឋាន ដេប៉ូលក់ចំណីសត្វ និងបសុឱសថ ក្នុងមូលដ្ឋានរបស់ខ្លួនឱ្យបានច្បាស់លាស់។ ការិយាល័យពេទ្យសត្វខេត្ដ ត្រូវសហការជាមួយមន្ទីរកសិកម្មខេត្ដរៀបចំចងក្រងឯកសារ ទាក់ទងនឹងការព្យាបាលសត្វ ដោយប្រើឱសថបុរាណ ពីព្រោះការប្រើឱសថបុរាណព្យាបាលសត្វ នៅតែចាំបាច់សម្រាប់ប្រជាពលរដ្ឋនៅជនបទ។ យើងក៏សូមធ្វើការគាំទ្រ បើទោះបីឱសថសម័យមានប្រសិទ្ធភាពជាងដែរ ។
ជាទូទៅប្រជាជនមួយចំនួន មិនសូវបានចាប់អារម្មណ៏ទេ ពីព័ត៌មានអំពីសត្វ និងចំណេះដឹងផ្សេងទៀតទាក់ទងទៅនឹងសត្វ ។ ឯកឧត្ដមរដ្ឋមន្ដ្រី បានមានប្រសាសន៏ថា ត្រូវពង្រឹងសេវាកម្មពរទ្យសត្វការផ្ដល់ព័ត៌មាន និងបណ្ដុះបណ្ដាលបច្ចេកទេស ។
ត្រូវជំរុញការងារបង្កាត់ពូជសត្វ ដោយសិប្បនិម្មិត ឱ្យបានគ្រប់ខេត្ដ និងធានាគុណភាព។ ពង្រឹងគុណភាពសមត្ថភាព ត្រួតពិនិត្យអនាម័យសត្វ ផលិតផលមានដើមកំណើត ពីសត្វចំណី និងបសុឱសថ ដើម្បីធានាបាននូវសុវត្ថិភាពសាធារណៈ។ ត្រូវផ្ទេរចំណេះដឹង ពីមន្ដ្រីថ្នាក់កណ្ដាល ទៅឱ្យមន្ដ្រីថ្នាក់ខេត្ដថ្នាក់ស្រុក តាមរយះការងារបណ្ដុះបណ្ដាល រៀបចុះឯកសារផ្សព្វផ្សាយ(អ្នកចេះបង្រៀន អ្នកចេះតិច អ្នកចេះតិចបង្រៀនអ្នកមិនចេះ)។
ការលើកឡើងនេះ បានធ្វើឡើងនៅក្នុងឱកាសឯកឧត្ដមរដ្ឋមន្ដ្រី អញ្ជើញចូលរួមបិទសន្និបាតបូកសរុបផលិតកម្ម និងបសុព្យាបាលឆ្នាំ២០១០ ដែលបានធ្វើកាលពីចុងសប្ដាហ៏កន្លងទៅនេះ ៕
