ព័ត៌មានផ្សេងៗទៀត
ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម អញ្ជើញដឹកនាំមន្ត្រីកសិកម្មឃុំ នៅក្នុងខេត្តចំនួន៣ ពិភាក្សាពីការតម្រង់ទិសបន្ថែម និងរៀបចំក្រុមកសិករផលិតស្រូវសរីរាង្គ ពូជផ្ការំដួល
ចេញផ្សាយ ២៧ មិថុនា ២០២៤ 2038
នៅថ្ងៃទី២៥ ដល់ថ្ងៃ២៧ ខែមិថុនា ឆ្នាំ២០២៤ ឯកឧត្តម ខាត់ សុធី ឣនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងលោកយឹម សារុំ ទីប្រឹក្សាក្រសួងកសិកម្ម បានឣញ្ជើញដឹកនាំមន្រ្តីកសិកម្មឃុំ ធ្វើការពិភាក្សាជាមួយក្រុមកសិករផលិតស្រូវសរីរាង្គ ផ្ការំដួល នៅក្នុងឃុំគោលដៅរួមមាន៖ ស្រុកត្រាំកក់ ខេត្តតាកែវ ស្រុកភ្នំស្រួច ខេត្តកំពង់ស្ពឺ និងស្រុកសាមគ្គីមានជ័យ ខេត្តកំពង់ឆ្នាំង។
នាឱកាសនៃកិច្ចពិភាក្សា ឯកឧត្តមខាត់ សុធី បានណែនាំបន្ថែមដល់មន្ត្រីកសិកម្មឃុំ ឱ្យបន្តជំរុញផ្សព្វផ្សាយដល់កសិករដើម្បីសហការក្នុងការចងក្រងក្រុមសមកាលកម្ម ដែលនឹងឈានទៅកសាង សហគមន៍កសិកម្មទំនើបដែលមានលក្ខណ:ល្អ សម្រាប់ប្រជាកសិករ ក្នុងការបង្កើនប្រាក់ចំណេញ ជំរុញកំណើនសេដ្ឋកិច្ចជាតិ និងនិរន្តរភាពសេដ្ឋកិច្ច។
ជាមួយគ្នានោះដែរ តំណាងក្រុមប្រជាកសិករដែលបានចូលរួមកិច្ចពិភាក្សា បានបង្ហាញចំណាប់អារម្មណ៍ចូលរួមសហការ ដោយគោរពតាមគោលការណ៍នៃការផលិតស្រូវសរីរាង្គ ដោយបានបង្ហាញក្តីសង្ឃឹម និងជឿជាក់ ហើយនឹងចាប់ផ្តើមឣនុវត្តការងារនេះចាប់ពីខែកក្កដា ខាងមុខនេះតទៅ៕
