ឯកឧត្ដមអនុរដ្ឋលេខាធិការ ឡឹក សុធារ អញ្ជើញជាអធិបតីភាព ក្នុង​កិច្ចប្រជុំការពង្រឹងសមត្ថភាពដល់មន្រ្តីកសិកម្មឃុំ-សង្កាត់ ស្ដីពី «ការត្រៀមបង្ការគ្រោះមហន្តរាយក្នុងវិស័យកសិកម្ម» នៅខេត្តពោធិ៍សាត់

ចេញ​ផ្សាយ​ ៣០ មករា ២០២៦ 2635

នៅថ្ងៃទី៣០ ខែមករា ឆ្នាំ២០២៦ ឯកឧត្ដម ឡឹក សុធារ អនុរដ្ឋលេខា​ធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជា​អធិបតីភាព​ក្នុងការពង្រឹងសមត្ថភាពដល់មន្ត្រីកសិកម្មឃុំ-សង្កាត់ ស្តីពី «ការគ្រប់គ្រងគ្រោះមហន្តរាយក្នុងវិស័យកសិកម្ម» នៅខេត្តពោធិ៍សាត់។
កិច្ចប្រជុំមានការអញ្ជើញចូលរួមពីថ្នាក់ដឹកនាំ និងមន្ត្រីរាជការនៅមន្ទី​រ​កសិកម្ម រុក្ខាប្រមាញ់ និងនេសាទខេត្តពោធិ៍សាត់ លោកគ្រូបង្គោល ដែល​អញ្ជើញមកពីអគ្គនាយកដ្ឋានកសិកម្ម អគ្គនាយកដ្ឋានសុខភាពសត្វ និងផលិតកម្មសត្វ នាយកដ្ឋានផ្សព្វផ្សាយកសិកម្ម និងមន្រ្តីកសិកម្មឃុំ-សង្កាត់ សរុបអ្នកចូលរួមចំនួន ៥៧នាក់។
នាឱកាសនោះ ឯកឧត្តម ឡឹក សុធារ បានគូសបញ្ជាក់ថា គោលបំណង​នៃកិច្ចប្រជុំដើម្បីពង្រឹងសមត្ថភាពដល់មន្ត្រីកសិកម្មឃុំ ដើម្បីត្រៀមបង្ការ និងតាមដានទាំងមុន និងក្រោយគ្រោះមហន្តរាយកើតឡើង ការប្រមូល​ទិន្នន័យ និងរាយការណ៍អំពីគ្រោះមហន្តរាយ​ក្នុងឃុំគោលដៅ។
ជាកិច្ចបញ្ចប់ ឯកឧត្ដមអនុរដ្ឋលេខាធិការ បានផ្ដល់ការណែនាំដល់​មន្រ្តីកសិកម្មឃុំ ឱ្យខិតខំចងក្រងទិន្នន័យ បន្តសហការ និងធ្វើជាមន្រ្តី​គំរូជួយដល់មូលដ្នាន យកចិត្តទុកដាក់ តាមដានជាប្រចាំ នូវសភាព​ការណ៍​នានា ពាក់ព័ន្ធនឹងគ្រោះមហន្តរាយ រួមមាន៖ ទឹកជំនន់ គ្រោះ​រាំងស្ងួត ជំងឺសត្វ សត្វល្អិតបំផ្លាញដំណាំ និងតម្លៃកសិផល។ ទន្ទឹម​នឹងនេះ ឯកឧត្ដមបានសង្កត់ធ្ងន់លើការរាយ​ការណ៍ព័ត៌មាន​ឱ្យបាន​ទាន់ពេលវេលា ដើម្បីឱ្យការអន្តរាគមន៍នានាមានប្រសិទ្ធភាព និងប្រសិទ្ធ​ផលខ្ពស់៕