ថ្នាក់ដឹកនាំក្រសួងកសិកម្ម ចុះពង្រឹងការផ្សព្វផ្សាយលទ្ធផលជ្រើសរើស​គ្រួសារ​ទទួលផល និងជ្រើសរើសកសិករបង្គោលតំណាងភូមិ ដើម្បីត្រៀមអនុវត្ត​គម្រោង EMPOWER នៅស្រុកឯកភ្នំ ខេត្តបាត់ដំបង

ចេញ​ផ្សាយ​ ២៧ សីហា ២០២៦ 512

នៅថ្ងៃទី២៦-២៧ ខែសីហា ឆ្នាំ២០២៦ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំផ្សព្វផ្សាយលទ្ធផល ជ្រើសរើសគ្រួសារទទួលផល និងចុះជ្រើសរើសកសិករបង្គោលតំណាងភូមិ ដើម្បី​ត្រៀមរៀបចំអនុវត្តដំណាក់កាលបន្ទាប់នៃគម្រោង EMPOWER នៅ​ស្រុកឯកភ្នំ ខេត្តបាត់ដំបង។ កិច្ចប្រជុំមានការអញ្ជើញចូលរួមពីតំណាង​មន្ទីរ​កសិកម្ម ខេត្តបាត់ដំបង អាជ្ញាធរស្រុក ឃុំ និងភូមិ មន្ត្រីកសិកម្ម ឃុំ ព្រមទាំង​ក្រុមការងារអនុវត្តគម្រោង និងអ្នកពាក់ព័ន្ធជាច្រើនរូប។
ឯកឧត្តម ខាត់ សុធី បានគូសបញ្ជាក់ពីសារៈសំខាន់នៃការជ្រើសរើស គ្រួសារ ទទួលផល និងកសិករបង្គោលប្រកបដោយតម្លាភាព និងការចូលរួមពីមូលដ្ឋាន ដើម្បីធានាថាការអនុវត្តគម្រោងឆ្លើយតបទៅនឹងតម្រូវការ និងស្ថានភាព ជាក់​ស្តែង​របស់ប្រជាកសិករ។ កសិករបង្គោលតំណាងភូមិ ត្រូវដើរតួនាទីជាគំរូ និងជា អ្នកសម្របសម្រួលសំខាន់ក្នុងការចែករំលែកចំណេះដឹង បទពិសោធន៍ និង​បច្ចេក​ទេសកសិកម្មទៅកាន់កសិករគោលដៅដទៃទៀត។
ជាមួយគ្នានោះដែរ អាជ្ញាធរភូមិ ឃុំ ស្រុក បានសម្តែងនូវសេចក្តីរីករាយ និង​សាទរ ចំពោះមូលដ្ឋានរបស់ខ្លួនត្រូវបានជ្រើសរើសសម្រាប់អនុវត្តគម្រោង EMPOWER ព្រមទាំងបង្ហាញការគាំទ្រ និងការប្តេជ្ញាចិត្តក្នុងការសហការ​ជាមួយក្រុមការងារគម្រោង ដើម្បីឱ្យការអនុវត្តសម្រេចបាននូវលទ្ធផល​ប្រកប​ដោយប្រសិទ្ធភាព។ ដោយឡែក កសិករបង្គោលដែលត្រូវបានជ្រើសរើស ជាតំណាងភូមិ បានប្តេជ្ញាចិត្តអនុវត្តតួនាទីរបស់ខ្លួនឱ្យបានល្អ ស្របតាម​លក្ខខណ្ឌ និង​គោលការណ៍របស់គម្រោង ធ្វើជាគំរូដល់កសិករគោលដៅ​ដទៃទៀត ដោយបានត្រៀមខ្លួនរួចជាស្រេច ដើម្បីសម្របសម្រួលជាមួយគ្រួសារ​ទទួល​ផលទាំងអស់ និងចូលរួមក្នុងដំណើរការរៀបចំចងក្រងគ្នាបង្កើត ជាសហគមន៍​កសិកម្មទំនើប បន្តពង្រឹងផលិតកម្មក្រោយចប់អាណត្តិគម្រោង៕