Other News
ឯកឧត្តមរដ្ឋលេខាធិការប្រចាំការ អ៊ឹម ស៊ីថុល អញ្ជើញជាអធិបតីភាពក្នុងពិធីបិទកិច្ចប្រជុំបូកសរុបលទ្ធផលការងាររបស់អគ្គលេខាធិការដ្ឋាន នៃក្រសួងកសិកម្ម រុក្ខាប្រមាញ់ និងនេសាទ ប្រចាំឆ្នាំ២០២៥ និងទិសដៅអនុវត្តឆ្នាំ២០២៦
ចេញផ្សាយ ១៩ កុម្ភៈ ២០២៦ 3067
នារសៀលថ្ងៃទី១៩ ខែកុម្ភៈ ឆ្នាំ២០២៦ ឯកឧត្តមរដ្ឋលេខាធិការប្រចាំការ អុឹម ស៊ីថុល តំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបិទកិច្ចប្រជុំបូកសរុបលទ្ធផលការងាររបស់អគ្គលេខាធិការដ្ឋាន នៃក្រសួងកសិកម្ម រុក្ខាប្រមាញ់ និងនេសាទ ប្រចាំឆ្នាំ២០២៥ និងទិសដៅអនុវត្តឆ្នាំ២០២៦ នៅទីស្ដីការក្រសួង។
ថ្លែងក្នុងពិធីបិទ ឯកឧត្តមរដ្ឋលេខាធិការប្រចាំការ បានកោតសរសើរ និងវាយតម្លៃខ្ពស់ចំពោះការរៀបចំពិធីនេះឡើងក្នុងន័យរួមគ្នាគិតគូរ ពិចារណាពីបញ្ហាប្រឈម ការស្វែងរកដំណោះស្រាយ ការតម្រង់ទិសពីបណ្តាថ្នាក់ដឹកនាំក្រសួង ឈានទៅរកការរៀបចំផែនការអនុវត្ត និងជំរុញយន្តការគាំទ្រដល់អនុវិស័យដទៃទៀតក្នុងឆ្នាំ២០២៦ និងឆ្នាំបន្តបន្ទាប់ទៀត។
ជាមួយគ្នានេះ ឯកឧត្តមរដ្ឋលេខាធិការប្រចាំការ បានផ្តល់អនុសាសន៍រួមមាន៖ (១)រៀបចំប្រព័ន្ធលំហូរឯកសារតាមប្រព័ន្ធឌីជីថល (២)ត្រួតពិនិត្យការគ្រប់គ្រងមន្រ្តីរាជការនិងមន្រ្តីកិច្ចសន្យាស្របតាមច្បាប់និងលិខិតបទដ្ឋានគតិយុត្ត (៣)រៀបចំកំណត់និងពិព័ណ៌នាមុខតំណែងវិជ្ជាជីវៈនិងការជំរឿនមន្រ្តីជាក់ស្តែង (៤)ជំរុញការរៀបចំបញ្ចប់«សេចក្តីណែនាំស្តីពីដំណើរការនិងការរៀបចំតាក់តែងលិខិតរដ្ឋបាលរបស់ក្រសួង» (៥)រៀបចំនិងអនុវត្តផែនការសកម្មភាពផ្អែកតាមសកម្មភាពអាទិភាព (៦)ជំរុញការកសាងសេចក្តីព្រាងច្បាប់ វិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យកសិកម្ម (៧)ជំរុញការតាមដាន ត្រួតពិនិត្យការងារជាមួយដៃគូ និងការកៀរគរដៃគូបន្ថែម (៨)ការបណ្តុះបណ្តាលគាំទ្រនិងចូលរួមដោះស្រាយបញ្ហាប្រឈមជាមួយមន្រ្តីកសិកម្មឃុំ និង(៩)ជំរុញភាពជាដៃគូជាមួយសហគមន៍កសិកម្ម ក្រុមអ្នកផលិត និងវិស័យឯកជននានាតាមរយៈផលិតកម្មកសិកម្មតាមកិច្ចសន្យា សំដៅធានានិរន្តរភាពផលិតកម្មកសិកម្ម និងថ្លៃកសិផល។
ជាទីបញ្ចប់ ឯកឧត្តមរដ្ឋលេខាធិការប្រចាំការ មានទំនុកចិត្តយ៉ាងមុតមាំចំពោះ ថ្នាក់ដឹកនាំអគ្គលេខាធិការដ្ឋាន ថ្នាក់ដឹកនាំ និងមន្រ្តីរាជការនៃអង្គភាពចំណុះអគ្គលេខាធិការដ្ឋាន នឹងបន្តខិតខំអនុវត្តការងារប្រកបដោយស្មារតីទទួលខុសត្រូវខ្ពស់ និងកាន់តែសកម្មផុសផុលថែមទៀត ដើម្បីសម្រេចបាននូវសមិទ្ធផលការងារថ្មីៗ ក្នុងឆ្នាំ២០២៦ ក្នុងទិសដៅបង្កើនល្បឿននៃការអភិវឌ្ឍវិស័យកសិកម្ម ស្របតាមកម្មវិធីគោលនយោបាយរបស់រាជរដ្ឋាភិបាល រួមចំណែកលើកកម្ពស់ជីវភាពប្រជាពលរដ្ឋ និងជំរុញកំណើនសេដ្ឋកិច្ចជាតិ៕
