ក្រសួងកសិកម្ម រុក្ខាប្រមាញ់ និងនេសាទ ប្រារព្ធព្រះរាជពិធីរុក្ខទិវា ឆ្នាំ២០២៣ ដើម្បី «សហគមន៍ព្រៃឈើគ្មានបទល្មើស»

ចេញ​ផ្សាយ​ ១ សីហា ២០២៣ 2928

ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៩ ខែកក្កដា ឆ្នាំ២០២៣ បានរៀបចំប្រារព្ធព្រះរាជពិធីបុណ្យរុក្ខទិវា នៅក្នុងខេត្តកំពង់ឆ្នាំង នៅក្នុងភូមិអូរកាខុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង ក្រោមព្រះរាជអធិបតិភាពដ៏ខ្ពង់ខ្ពស់ព្រះករុណា ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការចូលរួមពីសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ព្រមទាំងសមាជិកព្រឹទ្ធសភា រដ្ឋសភា រាជរដ្ឋាភិបាល រួមទាំងអភិបាលរាជធានី-ខេត្ត ថ្នាក់ដឹកនាំក្រសួងកសិកម្មរុក្ខាប្រមាញ់និងនេសាទ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋក្នុងខេត្តកំពង់ឆ្នាំងយ៉ាងច្រើនកុះករ។

ព្រះរាជពិធីនេះ ប្រារព្ធធ្វើឡើងជារៀងរាល់ឆ្នាំ ដើម្បីជំរុញចលនាស្រឡាញ់ព្រៃឈើនិងដាំកូនឈើ នៅគ្រប់ទិសទីទូទាំងប្រទេស  ដើម្បីការពារដីនិងព្រៃសហគមន៍ តាមទិសស្លោក «សហគមន៍ព្រៃឈើគ្មានបទល្មើស»។ គិតត្រឹមឆ្នាំ២០២៣នេះ ព្រះរាជពិធីរុក្ខទិវា បានប្រារព្ធឡើងចំនួន២៨លើក នៅតាមបណ្តារាជធានី- ខេត្តចំនួន១៤ នៅទូទាំងប្រទេស ដោយបានបង្កើតជាសួនរុក្ខទិវាទំហំ៤៦២ហិកតា។ 

ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា ដែលទ្រង់សព្វព្រះរាជហឫទ័យយាង ជាព្រះរាជធិបតីដ៏ខ្ពង់ខ្ពស់បំផុតក្នុងពិធីរុក្ខទិវា បានសម្តែងព្រះរាជហឫទ័យរីករាយជាពន់ពេក ចំពោះប្រជាជាតិទូទាំងព្រះរាជាណាកម្ពុជា ដែលបានចូលរួមថែរក្សាការពារព្រៃឈើដែលជាធនធានធម្មជាតិដ៍មានសារៈសំខាន់ ឱ្យបានគង់វង្សសម្រាប់អភិវឌ្ឍន៍សេដ្ឋកិច្ចជាតិ បន្តពីបុព្វបុរសខ្មែរតាំងពីបុរាណកាលមក។ បន្ថែមពីនេះ  ព្រះអង្គក៏បានអំពាវនាវទៅជនរួមជាតិ  បន្តខិតខំថែរក្សា ចូលរួមការពារព្រៃឈើ  ខិតខំដាំកូនឈើឡើងវិញឱ្យមានការលូតលាស់ល្អ  ផ្តល់ផលជានិរន្តរ៍ដល់កូនចៅជំនាន់ក្រោយៗទៀត។

សូមរំឭកជូនថា ព្រះរាជពិធីរុក្ខទិវាត្រូវបានទទួលស្គាល់ជាផ្លូវការ និងបានចែងក្នុងច្បាប់ ស្ដីពីព្រៃឈើឆ្នាំ២០០២  ជំពូកទី១២ មាត្រា៦០។ មាត្រានេះបានចែងថា ដើម្បីជំរុញកាប់រំប្រជាពលរដ្ឋឱ្យយល់ដឹងពីសារសំខាន់និងផលប្រយោជន៍ព្រៃឈើ ទិវាពលកម្មដាំកូនឈើជាប្រពៃណីជាតិ ត្រូវបានហៅថា «រុក្ខទិវា»  ត្រូវប្រារព្ធឡើងនៅថ្ងៃទី០៩ ខែកក្កដា ជារៀងរាល់ឆ្នាំ។ 

ប្រវត្តិពិធីរុក្ខទិវាត្រូវបានបង្កើតឡើងនៅក្នុង ឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ ព្រះមហាវីរក្សត្រ ព្រះករុណា ព្រះបាទសម្តេចព្រះ នរោត្តមសីហនុ ក្នុងគោលបំណងបំផុសចលនាដាំដើមឈើឡើងវិញ  ជំរុញឱ្យប្រជាពលរដ្ឋចូលរួមថែរក្សាសម្បត្ដិព្រៃឈើ និងគិតគូរដល់បរិស្ថានរស់នៅជាដើម៕