ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ អញ្ជើញចូលរួមបើកកម្មវិធីប្រឡងចៀរជ័រកៅស៊ូប្រចាំឆ្នាំ២០២៥ នៅចម្ការកៅស៊ូមេមត់ ខេត្តត្បូងឃ្មុំ
ចេញផ្សាយ ៩ ធ្នូ ២០២៥ 154
នៅថ្ងៃទី៩ ខែធ្នូ ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញចូលរួមបើកកម្មវិធី ប្រឡងចៀរជ័រកៅស៊ូប្រចាំឆ្នាំ២០២៥ នៅក្រុមហ៊ុនចម្ការកៅស៊ូមេមត់ ខូអិលធីឌី នៅក្នុងស្រុកមេមត់ ខេត្តត្បូងឃ្មុំ។
នាឱកាសនេះ ឯកឧត្តមរដ្ឋលេខាធិការ បានថ្លែងថា កម្មវិធីប្រឡងចៀរជ័រកៅស៊ូប្រចាំឆ្នាំ២០២៥នេះ រៀបចំឡើងក្នុង គោលបំណងផ្សព្វផ្សាយការយល់ដឹងអំពីការងារចៀរជ័រកៅស៊ូដល់សាធារណជនទូទៅឱ្យកាន់តែផុសផុលឡើង និងទាក់ទាញកម្លាំងពលកម្មជាពិសេសពលករចំណាកស្រុកឱ្យមកចូលរួមបំពេញការងារចៀរជ័រកៅស៊ូឱ្យបានកាន់តែច្រើនឡើងនៅតាមបណ្តាចម្ការកៅស៊ូកសិឧស្សាហកម្មនិងចម្ការកៅស៊ូគ្រួសារ ព្រមទាំងពង្រឹង សាមគ្គីភាពផ្ទៃក្នុងសហគមន៍កៅស៊ូ។
កម្មវិធីប្រឡងនេះ មានបេក្ខជនជាកម្មករចៀរជ័រចំនួន៨៣នាក់ តំណាងឱ្យចំនួន៤៣ក្រុមហ៊ុន ដែលមកពីខេត្តចំនួន១០រួមមាន ខេត្តកំពង់ចាម ត្បូងឃ្មុំ ព្រះវិហារ ស្ទឹងត្រែង រតនគិរី មណ្ឌលគិរី សៀមរាប ឧត្តរមានជ័យ ពោធិ៍សាត់ និងប៉ៃលិន។
ជាមួយគ្នានេះ ឯកឧត្តមរដ្ឋលេខាធិការ មានប្រសាសន៍ថា នេះជាលើកទី២ហើយ ដែលក្រសួងកសិកម្ម រុក្ខាប្រមាញ់ និងនេសាទ បានសហការជាមួយក្រុមហ៊ុនកៅស៊ូ រៀបចំកម្មវិធីប្រឡងប្រជែងចៀរជ័រ ដើម្បីស្វែងរកអ្នកខ្លាំងក្នុងចំណោមអ្នកខ្លាំង និងផ្តល់ជារង្វាន់លើកទឹកចិត្ត សម្រាប់ឆ្នាំ២០២៥នេះ។
ទន្ទឹមនឹងនេះ ឯកឧត្តមរដ្ឋលេខាធិការ បានគូសបញ្ជាក់ថា កម្មករដែលចូលរួមប្រឡងចៀរជ័រកៅស៊ូនេះ ជាអ្នកដែលមានបទពិសោធន៍ និងមានជំនាញច្បាស់លាស់ ហើយអាចជាអ្នកអូសទាញអ្នកដែលនៅវិស័យក្រៅពីនេះ មានការចាប់អារម្មណ៍ចូលរួមធ្វើការងារចៀរជ័រកៅស៊ូ ពីព្រោះការងារនេះ ផ្តល់អត្ថប្រយោជន៍ច្រើនដល់កម្មករក្នុងការរកចំណូលបានប្រចាំខែ ប្រចាំឆ្នាំជាប់ជានិច្ច ហើយមានសារសំខាន់យ៉ាងខ្លាំង ព្រោះជាការងារដើមខ្សែនៃខ្សែច្រវាក់តម្លៃទាំងមូល៕
