ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត បានអញ្ជើញជាគណៈអធិបតីនិងដឹកនាំកិច្ចប្រជុំបូកសរុបការងារវិស័យជលផលប្រចាំឆ្នាំ២០២៤ និងលើកទិសដៅសម្រាប់ឆ្នាំ២០២៥
ចេញផ្សាយ ២៤ ធ្នូ ២០២៤ 2596
នៅថ្ងៃទី២៤ ខែធ្នូ ឆ្នាំ២០២៤ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ពីឯកឧត្តមរដ្ឋមន្ត្រី ឌិត ទីណា បានអញ្ជើញជាគណៈអធិបតីក្នុងពិធីបើកកិច្ចប្រជុំបូកសរុបការងារវិស័យជលផលប្រចាំឆ្នាំ២០២៤ និងលើកទិសដៅសម្រាប់ឆ្នាំ២០២៥ នៅរដ្ឋបាលជលផល។
ក្នុងកិច្ចប្រជុំនេះ មានការចូលរួមពីសំណាក់ឯកឧត្តម លោកជំទាវ រដ្ឋលេខាធិការ អនុរដ្ឋលេខា ថ្នាក់ដឹកនាំក្រសួង ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល អនុប្រធានរដ្ឋបាលជលផល ប្រធាន-អនុប្រធាននាយកដ្ឋាន ប្រធាន-អនុប្រធានមន្ទីរ នាយ-នាយរងខណ្ឌជលផល និងមន្ត្រីពាក់ព័ន្ធមួយចំនួនទៀតមកពី២៥រាជធានីខេត្ត សរុបចំនួន៨៨នាក់។
ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល បានរាយការណ៍នូវលទ្ធផលសំខាន់ៗនៃអនុវិស័យជលផល ដែលសម្រេចបានក្នុងឆ្នាំ២០២៤ រួមមានកំណើនផលនេសាទ និងផលវារីវប្បកម្ម កំណើនចំនួនផ្សោតទន្លេមេគង្គ វត្តមាន និងកំណើនចំនួននៃប្រភេទវារីសត្វកម្រ ដូចជាជ្រូកទឹក និងផ្សោតឃ្លៀច លទ្ធផលនៃការបង្ក្រាបបទល្មើស និងការត្រួតពិនិត្យគុណភាព និងសុវត្ថិភាពផល ផលិតផលជលផលដែលទទួលបានលទ្ធផលល្អប្រសើរ។
ឯកឧត្តមរដ្ឋលេខាធិការ ហាស់ សារ៉េត បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងបំពេញភារកិច្ចពេញមួយឆ្នាំរបស់ឯកឧត្តមលោកជំទាវថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំ និងមន្ត្រីជំនាញរដ្ឋបាលជលផល មន្ទីរកសិកម្ម រុក្ខាប្រមាញ់ និងនេសាទ និងខណ្ឌរដ្ឋបាលជលផលរាជធានី-ខេត្ត ដែលបានរួបរួមគ្នា និងចូលរួមយ៉ាងសកម្មក្នុងការទប់ស្កាត់បទល្មើសជលផលនៅក្នុងឆ្នាំ២០២៤នេះ ទទួលបានផលវិជ្ជមានជាច្រើន ស្របតាមការចង្អុលបង្ហាញពីឯកឧត្តមរដ្ឋមន្ត្រី ឌិត ទីណា។
បន្ថែមពីនេះ ឯកឧត្តមបានណែនាំដល់មន្ត្រីជំនាញត្រូវធ្វើការផ្សព្វផ្សាយឱ្យបានទូលំទូលាយ ដល់ប្រជាពលរដ្ឋនៅមូលដ្ឋានអំពីកន្លែងការពារ និងអភិរក្សជលផល និងបញ្ញតិពាក់ព័ន្ធនៃច្បាប់ជលផល ពង្រឹងការអនុវត្តច្បាប់ជលផលឱ្យបានម៉ឺងម៉ាត់ប្រកបដោយស្មារតីទទួលខុសត្រូវ និងប្រើប្រាស់កម្លាំង និងធនធានមនុស្សឱ្យអស់លទ្ធភាពក្នុងការអនុវត្តន៍ការងារឱ្យបានជោគជ័យថែមទៀត។
ឯកឧត្តមរដ្ឋលេខាធិការ បានណែនាំអង្គប្រជុំ ពិភាក្សាដោយផ្តោតលើបញ្ហាសំខាន់ៗ ដូចជាការងារអភិរក្សជលផល ការងារវារីវប្បកម្ម ការបង្ក្រាបបទល្មើស ដើម្បីកំណត់បញ្ហាប្រឈម ដំណោះស្រាយ និងវិធានការគន្លឹះ ដើម្បីគ្រប់គ្រងអភិរក្ស និងអភិវឌ្ឍន៍ធនធានជលផលប្រកបដោយប្រសិទ្ធភាព។
ជាចុងបញ្ចប់ ឯកឧត្តមរដ្ឋលេខាធិការ បានណែនាំទៅថ្នាក់ដឹកនាំ នឹងមន្ត្រីពាក់ព័ន្ធគ្រប់ជាន់ថ្នាក់ ត្រូវរួមគ្នាពង្រឹងការគ្រប់គ្រង និងអភិរក្សធនធានធម្មជាតិ ជំរុញការងារវារីវប្បកម្ម ការងារសហគមន៍នេសាទ និងការកែច្នៃ ព្រមទាំងពង្រឹងការអនុវត្តច្បាប់ ចុះបង្ក្រាបនិងទប់ស្កាត់បទល្មើសនេសាទជាប្រចាំឱ្យបានប្រសិទ្ធភាព និងប្រសិទ្ធផលខ្ពស់នៅឆ្នាំ២០២៥ នាពេលខាងមុខបន្ថែមទៀត៕
