ព័ត៌មានផ្សេងៗទៀត
កសិករមានស្រូវគួរកុំប្រញាប់លក់
ចេញផ្សាយ ២២ មករា ២០១៨ 4422
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់កសិករទាំងអស់ ឲ្យយកចិត្តទុកដាក់ ថែទាំស្រូវដែលកំពុងតែ ហុចផល និងកុំប្រញាប់លក់ស្រូវ នាពេលនេះ ពីព្រោះស្រូវ អាចនឹងមានតម្លៃខ្ពស់ជាងនេះ ប្រសិនជាទុកលក់នៅពេលក្រោយ។
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ទៅ ឃុំត្រពាំងធំខាងជើង ស្រុកត្រាំកក់ កាលពីដើមសប្តាហ៍នេះ ថានៅពេលនេះ ស្រូវកំពុងឲ្យផលហើយ។ ទោះជាដូចនេះក្តី ក៏មិនត្រូវធ្វេសប្រហែសទេ គឺត្រូវតែចុះពិនិត្យស្រែជាប្រចាំ ជាមួយនឹងការថែទាំបានល្អ។
ដល់ពេលប្រមួលផល ត្រូវតែប្រមួលឲ្យបានទាន់ពេលវេលា ជៀសវាងការខូចខាតជាយថាហេតុ។ ស្រូវត្រូវតែទុកដាក់ ឲ្យបានល្អ ទាំងស្រូវទុកធ្វើពូជ ក៏ដូចស្រូវបម្រុងសម្រាប់ហូបចុក ឫលក់ដូរ។ ឯកឧត្តមរដ្ឋមន្ត្រី បានបន្តទៀតថា សម្រាប់កសិករនៅទីនេះ ដ៏ដូចជានៅទូទាំងប្រទេស ប្រសិនជាពុំមានការចាំបាច់ទេ គួរកុំប្រញាប់លក់ឲ្យសោះ ពីព្រោះតម្លៃស្រូវនឹងឡើងខ្ពស់ជាងនេះនាពេលខាងមុខ។
វត្តមានរបស់ឯកឧត្តមរដ្ឋមន្ត្រីនៅទីនោះ គឺដើម្បើចូលសម្ពោធផ្លូវលំ ប្រវែងជាង១គីឡូម៉ែត្រ ដែលពីភូមិមួយ ទៅភូមិមួយក្នុងតំបន់នេះ។ ឯកឧត្តមរដ្ឋមន្ត្រី បានប្រាប់អ្នកចូលរួមជិត២០០នាក់ទៀតថា ក្រោយពីប្រមួលផលរួចហើយ ត្រូវតែភ្ជួរដីស្រែទាំងនេះ ដើម្បើលុបគល់ជញ្ជ្រាំង ដើម្បើធ្វើឲ្យដីមានគុណភាព។
កន្លែងដែលអាចដាំដុះបាន គួរតែបង្វែរ ទៅជាការដាំដំណាំបន្តទៀតទើបជាការប្រសើរ។ ឯកឧត្តមរដ្ឋមន្ត្រី បានរំលឹកដល់មន្ត្រីក្រុមការងារ របស់ឯកឧត្តមរដ្ឋមន្ត្រី ឲ្យជួយដល់កសិករ ដោយកំណត់ថា ភូមិឃុំណាដែលអាចធ្វើបាន២ដង ឬ៣ដង ដើម្បើត្រៀមខ្លួន សម្រាប់ការធ្វើផែនការ នាឆ្នាំក្រោយ ហើយជំរុញការធ្វើ ឲ្យបានទាន់ពេលនិងមានប្រសិទ្ធភាព។ ឯកឧត្តមរដ្ឋមន្ត្រីបានពន្យល់ផងដែរថា ដើម្បើជំរុញផលិតកម្មស្រូវឲ្យបានកាន់តែខ្ពស់វាក៏ អាស្រ័យទៅលើការខិតខំរបស់កសិករផ្ទាល់ផងដែរ។ កសិករ ត្រូវតែប្តូរទម្លាប់ ប្តូរពូជបច្ចេកទេស លើវិស័យកសិកម្ម ឈានទៅរកការរីកចម្រើន និងការបង្កើនផលិតភាពកសិកម្ម។
