ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញដឹកនាំមន្ត្រីកសិកម្មឃុំនៅក្នុងស្រុកចំនួនពីរ ដើម្បីទស្សនកិច្ចរោងម៉ាស៊ីនកិនស្រូវ វង្ស ប៊ុនហេង ឈ្វេងយល់ពីគុណភាពស្រូវ និងខ្សែច្រវាក់កែច្នៃអង្ករ
ចេញផ្សាយ ៤ ធ្នូ ២០២៥ 3146
នៅថ្ងៃទី៤ ធ្នូ ឆ្នាំ២០២៥ ឯកឧត្តមបណ្ឌិតយ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំមន្ត្រីកសិកម្មឃុំ ស្រុកបាទីខេត្តតាកែវ និងស្រុកកណ្តាលស្ទឹង ខេត្តកណ្តាល សរុប២៦នាក់ ទស្សនកិច្ចរោងម៉ាស៊ីនកិនស្រូវ វង្ស ប៊ុនហេង ក្នុងស្រុកបាទី ខេត្តតាកែវ ឈ្វេងយល់ពីខ្សែច្រវាក់កែច្នៃអង្ករ និងការពិនិត្យលើគុណភាពស្រូវ ដើម្បីផលិតអង្ករបានស្តង់ដារគុណភាព។
ក្នុងដំណើរនេះ ឯកឧត្តមបណ្ឌិត បានគូសបញ្ជាក់ថា គុណភាពអង្ករ គឺពឹងផ្អែកទាំងស្រុងលើគុណភាពស្រូវ។ ទន្ទឹមនឹងនេះ ឯកឧត្តមមើលឃើញថា ការផលិតស្រូវរបស់កសិករនៅមិនទាន់ឆ្លើយតបតាមស្តង់ដារគុណភាពបាននៅឡើយទេ ដែលទាំងនេះ គឺជាកិច្ចការស្នូលរបស់មន្ត្រីកសិកម្មឃុំ ត្រូវធ្វើការឱ្យបានជិតស្និទ្ធជាមួយកសិករ តាមរយៈការប្រើពូជមានគុណភាពល្អ និងការដាំដុះតាមគោលការណ៍ស្រែល្អ។
ជាមួយគ្នានេះ ឯកឧត្តមបណ្ឌិតរដ្ឋលេខាធិការ បានជំរុញបន្ថែមដល់រោងម៉ាស៊ីន បន្តប្រមូលទិញស្រូវកសិករតាមរយ:ការសម្របសម្រួលពីមន្ត្រីកសិកម្មឃុំ ដើម្បីធានាការទិញលក់បានរលូន ដោយមិនត្រូវទុកឲ្យស្រូវកសិករកកស្ទះ ឬខូចចោល ដោយសារគ្មានអ្នកទិញនោះឡើយ។
សូមបញ្ជាក់ថា ទស្សនកិច្ចនេះ មន្ត្រីកសិកម្មឃុំ បានស្វែងយល់បន្ថែមពីខ្សែច្រវាក់កែច្នៃស្រូវអង្ករ ដែលចាប់ផ្តើមពីការពិនិត្យគុណភាពស្រូវ និងបានពិភាក្សាលើការសហការកសាងភាពជាដៃគូររវាងរោងម៉ាស៊ីន និងកសិករនៅតាមបណ្តាឃុំនៅជិងរោងម៉ាស៊ីនផងដែរ៕
