ក្រុមការងារសវនកម្ម និងវាយតម្លៃចម្ការបានធ្វើសវនកម្ម និងវាយតម្លៃចម្ការក្រុមហ៊ុន Hyundai Legacy Cambodia ដែលបានដាក់ពាក្យស្នើសុំចុះបញ្ជីជាចម្ការការអនុវត្តកសិកម្មល្អកម្ពុជា (CamGAP)

ចេញ​ផ្សាយ​ ២ មេសា ២០២០ 11547

កាលពីថ្ងៃទី២៧ ខែមីនា ឆ្នាំ២០២០ ដល់ថ្ងៃទី២៨ ខែមីនា ឆ្នាំ២០២០ នាយកដ្ឋានការពារដំណាំ អនាម័យ និងភូតគាមអនាម័យបានចាត់បញ្ជូនក្រុមការងារសវនកម្ម និងវាយតម្លៃចម្ការទៅបំពេញបេសកកម្មនៅខេត្តកំពង់ស្ពឺ ដើម្បីធ្វើសវនកម្ម  និងវាយតម្លៃចម្ការក្រុមហ៊ុន Hyundai Legacy Cambodia  ដែលបានដាក់ពាក្យស្នើសុំចុះបញ្ជីជាចម្ការការអនុវត្តកសិកម្មល្អកម្ពុជា (CamGAP) ដែលមានអាសយដ្ឋាននៅភូមិបឹងកេតលើ និងភូមិស្រល់ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

សមាសភាពក្រុមការងាររួមមាន៖ 

១. លោក មាន ចេតនា ប្រធានការិយាល័យលើកកម្ពស់គុណភាព និងសុវត្ថិភាព ផលិតផលកសិកម្ម

២. លោក លន់ វន្នី អនុប្រធានការិយាល័យលើកកម្ពស់គុណភាព និងសុវត្ថិភាព ផលិតផលកសិកម្ម

៣. លោក ត្រាយ ប៊ុនថន មន្រ្តីការិយាល័យលើកកម្ពស់គុណភាព និងសុវត្ថិភាព ផលិតផលកសិកម្ម

៤. លោក សូវ ស៊ីណេន មន្រ្តីការិយាល័យលើកកម្ពស់គុណភាព និងសុវត្ថិភាព ផលិតផលកសិកម្ម

៥.​ បុគ្គលិករបស់ក្រុមហ៊ុន Hyundai Legacy Cambodia។ 

ក្រុមការងារបានសហការយ៉ាងល្អក្នុងការធ្វើសវនកម្ម  និងវាយតម្លៃចម្ការដូចជា កន្លែងលាងសម្អាត ការវេចខ្ចប់ចេក និងផ្អែកតាមលទ្ធផលត្រួតពិនិត្យ និងវាយតម្លៃជាក់ស្តែងទៅលើចម្ការរបស់ក្រុមហ៊ុនខាងលើ សង្កេតឃើញថា:

- អ្នកគ្រប់គ្រងចម្ការបានកត់ត្រា និងរក្សាទុកនូវឯកសារស្តីពីប្រវត្តិនៃការប្រើប្រាស់សារធាតុគីមី (ជី និងថ្នាំ ពុល កសិកម្ម)  ក្នុងប្រព័ន្ធគ្រប់គ្រងទិន្នន័យបានត្រឹមត្រូវ

- អ្នកគ្រប់គ្រងចម្ការ និងបុគ្គលិកទទួលបានការបណ្តុះបណ្តាលស្តីពីបច្ចេកទេសប្រើប្រាស់ថ្នាំកសិកម្ម ជីគីមី និង សម្ភារៈ កសិកម្មផ្សេងៗ និងមានបទពិសោធន៍ទាក់ទងនឹងផលិតកម្ម និងខ្សែច្រវាក់ផលិតកម្មនាំចេញស្វាយ

- ការគ្រប់គ្រង និងប្រើប្រាស់ជីសរីរាង្គ និងគីមីនៅក្នុងចម្ការទាំងមូលត្រូវបានគ្រប់គ្រងដោយប្រព័ន្ធបញ្ជាស្វ័យប្រវត្តិ ដើម្បីធានាសុវត្តិភាព និងកម្រិតស្តង់ដារនៃការប្រើប្រាស់

- ពូជស្វាយមាន ប្រភពច្បាស់លាស់ដោយមានលិខិតបញ្ជាក់ប្រភេទពូជ និងក្រុមហ៊ុនផលិតត្រឹមត្រូវ  ស្របតាមស្តង់ដារបច្ចេកទេសណែនាំ

- ចម្ការដែលស្នើរចុះបញ្ជីត្រូវបានបែងចែកប្លង់ច្បាស់លាស់ និងមានកិច្ចសន្យាត្រឹមត្រូវស្របតាមច្បាប់កំណត់

- ចម្ការបានរៀបចំដំឡើងប្រព័ន្ធធារាសាស្រ្តសម្រាប់ស្រោចស្រប មានប្រភពទឹកគ្រប់គ្រាន់

- ទឹកស្រោចស្របត្រូវាបានយកទៅវិភាគស្របតាមស្តង់ដារបច្ចេកទេសត្រឹមត្រូវមុននឹងប្រើប្រាស់ក្នុងចម្ការ

- កន្លែងរក្សាទុកសម្ភារៈកសិកម្ម និងធាតុចូលកសិកម្មត្រូវបានរៀបចំដាច់ដោយឡែកពីទីតាំងចម្ការដែលអាចការពារដំណាំពីការប៉ះពាល់សារធាតុគីមី

- ផ្លែស្វាយត្រូវបានការពារពីកត្តាចង្រៃផ្សេងៗ ឬពីហានិភ័យនៃសរីរាង្គផ្សេងៗដោយប្រើក្រដាសច្រកផ្លែ

- ទីតាំងចម្ការមានហេដ្ឋារចនាសម្ព័ន្ធត្រឹមត្រូវ និងនៅដាច់ដោយឡែកពីចម្ការផ្សេងទៀត

- ម្ចាស់ចម្ការបានទទួលការបណ្តុះបណ្តាល និងមានការយល់ដឹងច្រើនអំពីការអនុវត្តកសិកម្មល្អកម្ពុជា

- ក្រុមហ៊ុនបានរៀបចំទីកន្លែងប្រមូលផលរក្សាទុក និងវេចខ្ចប់ស្របតាមស្តង់ដារបច្ចេកទេស ដូចជា

មានហេដ្ឋារចនាសម្ព័ន្ធល្អ ទីកន្លែងលាងសំអាត វេចខ្ចប់ និងរក្សាទុកស្វាយក្រោយប្រមូលផលត្រូវបានរៀបចំឡើងដាច់ ទឹកប្រើប្រាស់ស្អាតដែលបានវិភាគគុណភាពត្រឹមត្រូវដើម្បីធានាគុណភាព និងសុវត្តិភាព បុគ្គលិកទទួលបានការបណ្តុះបណ្តាល សម្ភារៈប្រើប្រាស់សម្រាប់ការរក្សាទុក វេចខ្ចប់ និងកែច្នៃមានអនាម័យល្អ និងមិនមានប្រើសារធាតុគីមីដែលហាមឃាត់ ឬអាចប៉ះពាល់ដល់ការសុវត្តិភាព និងគុណភាពផលិតផល។