ព័ត៌មានផ្សេងៗទៀត
ក្រសួងកសិកម្មនឹងពិនិត្យលទ្ធភាពបញ្ជូនមន្ត្រីជំនាញទៅសាធារណរដ្ឋហ្គីណេ
ចេញផ្សាយ ២២ មករា ២០១៨ 4330
ឆ្លើយតបទៅនឹងសំណើររបស់មន្ត្រីការទូតជាន់ខ្ពស់ នៃសាធារណរដ្ឋហ្គឺណេ ក្រសួងកសិកម្ម រុក្ខាប្រមាញ់ និងនេសាទ នឹងពិនិត្យលទ្ធភាព ក្នុងការបញ្ជូនមន្ត្រីជំនាញការកសិកម្មកម្ពុជា ដើម្បីជួយអភិវឌ្ឍន៍ធនធានមនុស្ស លើវិស័យកសិកម្ម ដល់មន្ត្រីកសិកម្ម នៃសាធារណរដ្ឋហ្គីណេ ដូចជាបច្ចេកទេសបង្កាត់ពូជស្រូវ អ្នកការពារដំណាំ និងការកែលម្អជីជាតិដីជាដើម។
សំណើរខាងលើ ត្រូវបានលើកដោយលោកម៉ាម៉ា ឌី ហ្យ៉ារេ Mamadi Diare ឯកអគ្គរដ្ឋទូត នៃសាធារណរដ្ឋហ្គីណេ មាននិវេសនដ្ឋាន នៅទីក្រុងប៉េកាំង ដែលទើបតែង តាំងថ្មីមកទស្សនកិច្ច ជាលើកដំបូង នៅព្រះរាជាណាចក្រកម្ពុជា ខណៈពេល ដែលលោកបានជួបសវនាការ សម្តែងការគួរសមជាមួយ ឯកឧត្តមបណ្ឌិត ច័ន្ទ សារុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ កាលពីរសៀសថ្ងៃទី៤ ខែមករា ឆ្នាំ២០១១ នៅទីស្តីការក្រសួងកសិកម្ម។
លទ្ធផលនៃជំនួបនោះ ក្រៅពីឆ្លើយតប ទៅតាមសំណើ ក្នុងការពិនិត្យលទ្ធភាពបញ្ជូនមន្ត្រីជំនាញកសិកម្មកម្ពុជា ទៅជួយអភិវឌ្ឍន៍កិសកម្ម នៃសាធារណរដ្ឋហ្គីណេ គឺបានឯកភាព បង្កើតឲ្យមានគណៈកម្មការចម្រុះមួយ (Jiont Commission) ដើម្បីពិនិត្យពិភាក្សារួម ក្នុងការេរៀបចំកិច្ចព្រមព្រៀង ស្តីពីកិច្ចសហប្រតិបត្តិការលើវិស័យកសិកម្ម។
នៅក្នុងជំនួបនោះ ឯកឧត្តមបណ្ឌិត ច័ន្ទ សារុន បានជម្រាបជូនភ្ញៀវ អំពីសក្តានុពលនៃវិស័យកកសិកម្ម និងបទពិសោធន៍ របស់កម្ពុជាពិសេសដំណាំស្រូវ។ ឯកឧត្តមបណ្ឌិត ច័ន្ទ សារុន បានរំលឹកថា កាលពីឆ្នាំមុន កម្ពុជាជាប្រទេសនាំអង្ករចូល ប៉ុន្តែចាប់ពីឆ្នាំ១៩៩៥ មក ប្រទេសកម្ពុជា បានដោះស្រាយដោយខ្លួនឯងនូវសន្តិសុខស្បៀង។
បច្ចុប្បន្ននេះ កម្ពុជាមានសល់ស្បៀងរាប់លានតោន សម្រាប់ធ្វើការនាំចេញជាក់ស្តែងនៅឆ្នាំនេះ ក្រៅពីការធានាបាននូវសន្តិសុខស្បៀង គឺសល់ស្រូវ ចំនួន៣,៧លានតោន ស្មើនឹង២,៤លានតោនអង្ករ សម្រាប់ធ្វើការនាំចេញ។ ជាមួយគ្នានោះ ឯកឧត្តមបណ្ឌិត ច័ន្ទ សារុន រដ្ឋមន្ត្រីនៃព្រះរាជាណាចក្រកម្ពុជា ដែលបានចាត់ទុកវិស័យកសិកម្ម ជាវិស័យអាទិភាពគ្រប់កាលៈទេសៈ ជាមុខព្រួញដំបូងគេបង្អស់ ក្នុងការដោះស្រាយនូវសុវត្ថិភាពស្បៀង កាត់បន្ថយភាពក្រីក្រ និងជួយពន្លឿនកំណើនសេដ្ឋកិច្ចជាតិ។
ជាមួយគ្នានេះដែរ ឯកឧត្តមបណ្ឌិត ច័ន្ទ សារុន បានស្នើឲ្យសាធារណរដ្ឋហ្គីណេ សាកល្បងនូវពូជស្រូវថ្មីៗពូជស្រូវមានគុណភាពអង្ករល្អ និងប្រើប្រាស់បរិមាណពូជតិចក្នុង១ហិកតា ដែលរកឃើញដោយអ្នកឯកទេសកម្ពុជា។ លោក ម៉ាម៉ាឌីហ្យ៉ារេ បានបញ្ជាក់ថាការដែលរាជរដ្ឋាភិបាលកម្ពុជាចាត់ទុកវិស័យកសិកម្មជាវិស័យអាទិភាពបំផុត ហើយប្រការនេះដូចសាធារណហ្គីណេដែរ ដែលមានលក្ខណៈភូមិសាស្ត្រប្រហាក់ប្រហែលគ្នា និងមានប្រជាជនប្រមាណ៨០ភាគ រយរស់នៅតំបន់ជនបទដូចកម្ពុជាដែរ។
ចំណុចនេះ អាចឲ្យប្រទេសទាំងពីរ បើកកិច្ចសហប្រតិបត្តិការ ធ្វើការផ្លាស់ប្តូរបទពិសោធន៍ទៅវិញទៅមក លើវិស័យកសិកម្ម ឲ្យបានកាន់តែទូលាយ។ នាឱកាសនោះដែរ ឯកឧត្តមបណ្ឌិត ច័ន្ទ សារុន ក៏បានជូនយោបល់ ដល់ឯកអគ្គរដ្ឋទូតថានេះជាឱកាសមួយ ដែលសាធារណរដ្ឋហ្គីណេ អាចបញ្ចូនកិច្ចសហប្រតិបត្តិការត្បូងត្បូងបាន។ គួររំលឹកថា ជំនួបពិភាក្សានេះ បានឆ្លុះបញ្ចាំងពីកិច្ចសហការយ៉ាងជិតស្និទ្ធរវាងប្រទេស ទាំងពីរជាពិសេសក្នុងនោះដំណើរឆ្ពោះនៅរកកិច្ចសហប្រតិបត្តិការទូលំទូលាយ លើវិស័យកលិកម្ម។
