ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម បានអញ្ជើញដឹកនាំមន្ត្រីជំនាញចុះពិនិត្យ និងផ្សព្វផ្សាយការកម្ចាត់ដង្កូវ ហ្វូងទៅលើដំណាំពោតក្រហម និងដំណាំស្រូវ នៅឃុំចំនួន២ ក្នុងខេត្តប៉ៃលិន

ចេញ​ផ្សាយ​ ១ កក្កដា ២០២៤ 2145

នៅថ្ងៃទី០១ ខែកក្កដា ឆ្នាំ២០២៤ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញបច្ចេកទេសពីអគ្គនាយកដ្ឋានកសិកម្ម  មន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន ចុះពិនិត្យវាយតម្លៃ និងប្រើដ្រូនបាញ់ថ្នាំកសិកម្មកម្ចាត់ដង្កូវហ្វូងដែលស៊ីដំណាំពោតក្រហមប្រជាកសិករនៅឃុំស្ទឹងត្រង់ និងដំណាំស្រូវ នៅឃុំសាលាក្រៅ ក្នុងស្រុកសាលាក្រៅ ខេត្តប៉ៃលិន ដោយមានការចូលរួមពីលោកអភិបាល នៃគណៈអភិបាលស្រុក មេឃុំ មេភូមិ និងអាជ្ញាធរមូលដ្ឋាន។

ឆ្លៀតក្នុងឱកាសនៃការចុះត្រួតពិនិត្យនេះ ឯកឧត្តម គី ច័ន្ទរំដួល ក៏បានផ្តាំផ្ញើដល់មន្ទីរកសិកម្មខេត្ត និងអាជ្ញាធរពាក់ព័ន្ធត្រូវខិតខំ ប្រឹងប្រែងយកចិត្តទុកដាក់ឱ្យបានខ្ពស់ ដើម្បីទប់ស្កាត់ឱ្យទាន់ពេលវេលា ប្រកបដោយប្រសិទ្ធភាព ពិសេសឱ្យក្រុមការងារមន្ទីរកសិកម្មខេត្ត រៀបចំផលិតវីដេអូពន្យល់អំពីឈ្មោះថ្នាំ និងរបៀបប្រើប្រាស់ថ្នាំ ជូនដល់ប្រជាកសិករផងដែរ។

ឯកឧត្តមក៏បានណែនាំឱ្យប្រជាពលរដ្ឋ ធ្វើការតាមដានពពួកសត្វ​មេអំបៅទៅលើដង្កូវហ្វូង ឱ្យបានជាប់ជាប្រចាំ  ប្រសិនបើ​ប្រជាកសិករមានជួបបញ្ហាប្រឈម ត្រូវទាក់ទងទៅកាន់មន្ទីរកសិកម្មខេត្ត ដើម្បីជួយអន្តរគមន៍ដោះស្រាយឱ្យបានទាន់ពេលវេលា។

បន្ថែមពីនេះ ឯកឧត្តមបានលើកទឹកចិត្តទៅប្រជា​កសិករនៅក្នុង​ឃុំស្ទឹងត្រង់ និងឃុំសាលាក្រៅ ស្រុកសាលាក្រៅ ខេត្តប៉ៃលិន ដាំដើមឈើហូបផ្លែផ្សេងទៀត ដែលមាន​សក្តានុពល​នៅលើភ្លឺស្រែ ដើម្បីបង្កើនចំណូលបន្ថែម ក្រៅពីធ្វើស្រែថែមទៀតផង៕