ឯកឧត្តមអនុរដ្ឋលេខាធិការ វ៉ា ពិសី អញ្ជើញជាអធិបតីភាពក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងសេចក្តីណែនាំអន្តរក្រសួងស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលពាក់ព័ន្ធការងារសុខភាពសត្វនិងផលិតកម្មសត្វ

ចេញ​ផ្សាយ​ ២១ វិច្ឆិកា ២០២៥ 692

នៅថ្ងៃទី២១ ខែវិច្ឆិកា ឆ្នាំ២០២៥ ឯកឧត្តម វ៉ា ពិសី អនុរដ្ឋលេខាធិការក្រសួងកសិកម្ម​ រុក្ខាប្រមាញ់​ និងនេសាទ​ បានអញ្ជេីញជាអធិបតីភាពក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងសេចក្តីណែនាំអន្តរក្រសួងស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលពាក់ព័ន្ធការងារសុខភាពសត្វនិងផលិតកម្មសត្វ។
សិក្ខាសាលាដែលរៀបចំនៅសាលប្រជុំរដ្ឋបាលខេត្តកំពត​ មានចូលរួមពីថ្នាក់ដឹកនាំ តំណាងអង្គភាពក្រោមឱវាទក្រសួង តំណាងអគ្គនាយកដ្ឋានរដ្ឋបាលនៃក្រសួងមហាផ្ទៃ តំណាងលេខាធិការដ្ឋាន គ.ជ.អ.ប តំណាងរដ្ឋបាលរាជធានី ខេត្ត អង្គភាពច្រកចេញចូលតែមួយ និងមន្ទីរកសិកម្ម រុក្ខាប្រមាញ់ និងនេសាទ ចំនួនប្រមាណ​ ១៥០នាក់។ 
សិក្ខាសាលានេះ មានគោលបំណងពិនិត្យនិងផ្ដល់យោបល់លើសេចក្តីព្រាងសេចក្តីណែនាំអន្តរក្រសួងស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលពាក់ព័ន្ធការងារសុខភាពសត្វនិងផលិតកម្មសត្វនៅរដ្ឋបាលរាជធានី-ខេត្ត ដើម្បីឱ្យខ្លឹមសារនៃសេចក្ដីព្រាងសេចក្ដីណែនាំអន្តរក្រសួងនេះកាន់តែមានលក្ខណៈគ្រប់ជ្រុងជ្រោយ អាចអនុវត្តបានប្រកបដោយប្រសិទ្ធភាពទាំងក្របខណ្ឌបច្ចេកទេសនិងពេលវេលា ឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋប្រកបដោយគណនេយ្យភាព និងតម្លាភាព។
ឯកឧត្តមអនុរដ្ឋលេខាធិការ បានកោតសរសើរ​ និងវាយតម្លៃខ្ពស់ចំពោះ​ អគ្គនាយកដ្ឋានសុខភាពសត្វនិងផលិតកម្មសត្វ ក្រុមការងារលេខាធិការដ្ឋានដឹកនាំការងារកំណែទម្រង់វិមជ្ឈការនិងវិសហមជ្ឈការនៃក្រសួងកសិកម្ម រុក្ខាប្រមាញ់ និងនេសាទ អគ្គនាយកដ្ឋានរដ្ឋបាល ក្រសួងមហាផ្ទៃ និងលេខាធិការដ្ឋាន គ.ជ.អ.ប. ដែលបានសហការរៀបចំខ្លឹមសារនៃសេចក្ដីព្រាងសេចក្តីណែនាំអន្តរក្រសួងនេះឡើង សម្រាប់ដាក់ជូនអង្គសិក្ខាសាលាពិនិត្យនិងផ្ដល់យោបល់៕