ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន អញ្ជើញជាអធិបតីក្នុងពិធីបើកវគ្គបណ្តុះបណ្តាលគ្រូបង្គោលស្តីពីបច្ចេកទេសកសិកម្ម ឆ្លាតវៃជាមួយអាកាសធាតុ ក្នុងផលិតកម្មដំណាំបន្លែនៅខេត្តមណ្ឌលគិរី

ចេញ​ផ្សាយ​ ១៤ តុលា ២០២៥ 1035

នៅថ្ងៃទី១៤ ខែតុលា ឆ្នាំ២០២៥ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF បានអញ្ជើញជាអធិបតីបើកវគ្គបណ្តុះបណ្តាលគ្រូបង្គោលស្តីពីបច្ចេកទេសកសិកម្ម ឆ្លាតវៃជាមួយអាកាសធាតុ ក្នុងផលិតកម្មដំណាំបន្លែក្រោមគម្រោង CaWSIP-MAFF នៅខេត្តមណ្ឌលគិរី ដោយមានការចូលរួមពីក្រុមការងារអនុវត្ដន៍គម្រោង CaWSIP-MAFF ថ្នាក់ជាតិ-ខេត្ដ មន្ត្រីជំនាញពាក់ព័ន្ធក្រោមឱវាទក្រសួង និងថ្នាក់ខេត្ដនៃមន្ទីរកសិកម្ម រុក្ខាប្រមាញ់ និងនេសាទខេត្ដ និងមន្រ្តីកសិកម្មឃុំ នៃខេត្ដគោលដៅគម្រោងទាំង៤ រួមមាន ខេត្ដក្រចេះ មណ្ឌលគិរី ព្រះវិហារ និងខេត្ដកំពង់ធំ។
វគ្គបណ្តុះបណ្តាលនេះរៀបចំឡើងក្នុងគោលបំណង ពង្រឹងសមត្ថភាពគ្រូបង្គោលស្តីពី ”បច្ចេកទេសផលិតកម្មដំណាំបន្លែដែលធន់នឹងអាកាសធាតុ” ដែលរៀបចំដោយក្រុមបច្ចេកទេស សហគមន៍និងយេនឌ័រ គាំពារបរិស្ថាននិងសង្គម និងក្រុមត្រួតពិនិត្យនិងវាយតម្លៃ នៃអង្គភាពអនុវត្តគម្រោងថ្នាក់ជាតិ (PIU)។ នៅក្នុងវគ្គបណ្ដុះបណ្ដាលក៏បានពិភាក្សាលើ (១).ការកំណត់ទីតាំងដែលមានសក្តានុពលលើការអនុវត្តដំណាំស្រូវ ដំណាំសាកវប្បកម្ម ដំណាំឧស្សាហកម្ម តាមវិធីសាស្ត្រដាំដុះ ធន់នឹងការប្រែប្រួលអាកាសធាតុនៅក្នុងតំបន់វិសាលភាពស្រោចស្រពមុននិងក្រោយពេលស្តារប្រព័ន្ធស្រោចស្រព (២).កំណត់បាននូវបច្ចេកវិទ្យាកសិកម្មវៃឆ្លាតអាកាសធាតុដែលសមស្របក្នុងការអនុវត្តធ្វើការសាកល្បង និងធ្វើបង្ហាញជាមួយនឹងដំណាំដែលមានសក្តានុពលនីមួយៗ និង (៣). កំណត់បានកសិករនិងអ្នកពាក់ព័ន្ធនានា (សហគមន៍ ផ្នែកឯកជន ដៃគូអភិវឌ្ឍន៍ និងរដ្ឋបាលមូលដ្ឋាន) ដែលមានសក្តានុពលនិងឆន្ទៈចូលរួមអនុវត្តគម្រោង។
ថ្លែងក្នុងពិធីបើកវគ្គ ឯកឧត្ដមបណ្ឌិត បានបង្ហាញពីគន្លឹះសំខាន់ៗ ក្នុងនាមជាគ្រូបង្គោល និងជាអ្នកអនុវត្តត្រូវយកចិត្តទុកដាក់លើគន្លឹះសំខាន់ៗនៃការបន្សាំនឹងអាកាសធាតុ (Adaptation) លើផលិតកម្មបន្លែ ដើម្បីធានាបាននូវនិរន្តរភាពក្នុងអំឡុងពេល និងក្រោយគម្រោងចប់។ ទន្ទឹមនឹងនេះ ឯកឧត្ដមបណ្ឌិត បានគូសបញ្ជាក់ថា ការផ្ទេរសេវាបច្ចេកវិទ្យា ( improving service delivery) ដល់សហគមន៍ កសិករ ក្នុងនិងក្រៅគម្រោង ក្រោយទទួលបានការបណ្ដុះបណ្ដាលនាវគ្គនេះ គឺធ្វើឱ្យអ្នកផលិតអាចអនុវត្តបាន និងមានលក្ខណ:សមស្របតាមស្ថានភាពតំបន់នីមួយៗ តាមរយ:ការរួមចំណែកក្នុងការកាត់បន្ថយថ្លៃដើម បង្កើនប្រសិទ្ធភាពធាតុចូលកសិកម្ម បង្កើនគុណភាពផលិតផលតាមស្ដង់ដា និងរក្សាបាននូវស្ថេរភាពទីផ្សារផងដែរ៕