ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំក្រុមការងារ ចុះពិនិត្យស្ថានភាពសក្តានុពល វឌ្ឍនភាពនៃការគ្រប់គ្រងការងារសហគមន៍នេសាទព្រៃនប់២ ខេត្តព្រះសីហនុ
ចេញផ្សាយ ១២ មិថុនា ២០២៦ 315
នៅថ្ងៃទី១១ ខែមិថុនា ឆ្នាំ២០២៦ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឯកឧត្តម រដ្ឋលេខាធិការ ហាស់ សារ៉េត បានដឹកនាំក្រុមការងារជំនាញនៃអគ្គនាយកដ្ឋានជលផល តំណាងមន្ទីរកសិកម្មខេត្តព្រះសីហនុ និងខណ្ឌរដ្ឋបាលជលផលកំពង់សោម ចុះពិនិត្យស្ថានភាពសក្តានុពល វឌ្ឍនភាពនៃការគ្រប់គ្រង បញ្ហាប្រឈម និងសំណូមពររបស់សហគមន៍នេសាទព្រៃនប់២ ស្ថិតនៅក្នុងឃុំទឹកថ្លា ស្រុកព្រៃនប់ ខេត្តព្រះសីហនុ។
ដំណើរចុះពិនិត្យនេះ មានការចូលរួមពីលោក ស៊ូ ហ្សូត្រា អនុប្រធាននាយកដ្ឋាននៃអគ្គនាយកដ្ឋានជលផល និងលោក អ៊ុក សំអន នាយសង្កាត់រដ្ឋបាលជលផលកំពង់ស្មាច់ ជាតំណាងមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ និងខណ្ឌរដ្ឋបាលជលផលកំពង់សោម អាជ្ញាធរឃុំ ភូមិ គណៈកម្មការសហគមន៍នេសាទព្រៃនប់២ និងអង្គការស្រឡាញ់ធនធានធម្មជាតិកម្ពុជា CNRO។
គោលបំណងនៃដំណើរចុះពិនិត្យ ដើម្បីស្វែងយល់ក្តាប់ស្ថានភាពលទ្ធផលការងារ ដែលសហគមន៍នេសាទបានអនុវត្ត លើសពីនេះទៀតឃុំបានសហការជាមួយសហគមន៍នេសាទ ចុះបង្ក្រាបបទល្មើសនេសាទដូចជា៖ ការនេសាទខុសច្បាប់ដោយប្រើឧបករណ៍ឆក់ ទូកឌុន ទូកអូសគ្រែងឈាមជាដើម។ ក្រៅពីនេះក៏មានអ្នកកាប់អុសព្រៃកោងកាង ដោយបានណែនាំឱ្យបញ្ឈប់សកម្មភាពនោះ។
គួរបញ្ជាក់ថា ស្ថានភាពធនធានជលផល ជាសក្តានុពលនៅក្នុងកន្លែងសហគមន៍នេសាទព្រៃនប់២ ដែលអំណោយផលសម្រាប់ការធ្វើ
វារីវប្បកម្ម ទេសចរណ៍ជលផល ដោយសារមានព្រៃកោងកាង កោះកោងកាង វាលភក់ ស្មៅសមុទ្រ សារាយសមុទ្រ ឆ្នេរខ្សាច់ និងមានជីវចម្រុៈដូចជា៖ គ្រែងឈាម គ្រំចំពុះទា ងាវភក់ សត្វផ្សោត សត្វស្លាបផងដែរ៕
