ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំក្រុមការងារជំនាញជួបសំណេះសំណាលជាមួយប្រជាកសិករ និងពិនិត្យស្ថានភាពមមាចត្នោតបំផ្លាញដំណាំស្រូវប្រាំង នៅស្រុកឆ្លូង ខេត្តក្រចេះ
ចេញផ្សាយ ២៨ មករា ២០២៦ 2759
នាព្រឹកថ្ងៃទី២៨ ខែមករា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញជួបសំណេះសំណាលជាមួយប្រជាកសិករ និងពិនិត្យពីស្ថានភាពវត្តមានពពួកមមាចត្នោតបំផ្លាញដំណាំស្រូវប្រាំងរបស់ប្រជាកសិករ នៅឃុំហាន់ជ័យ ក្នុងស្រុកឆ្លូង ខេត្តក្រចេះ។
ដំណើរបេសកកម្មនោះ មានការចូលរួមពី លោក ម៉ៅ វិចិត្រ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ លោក សំ សំអាង ប្រធានការិយាល័យក្សេត្រសាស្ត្រ និងផលិតភាពកសិកម្ម តំណាងខាងអាជ្ញាធរភូមិ ឃុំ ស្រុក និងមន្រ្តីកសិកម្មមកពី៧ឃុំ នៅក្នុងស្រុកឆ្លូង ប្រជាកសិករម្ចាស់ស្រែ សរុបអ្នកចូលរួមប្រមាណជាង៣០នាក់។
នាជំនួបសំណេះសំណាលនៅទីតាំងស្រែប្រាំង លោកជំទាវ អ៊ឹម រចនា និងក្រុមការងារទាំងអស់ បានជួបប្រជាកសិករម្ចាស់ស្រែ និងបានពិនិត្យមើលស្រែមួយចំនួន ដែលមានបញ្ហាសត្វល្អិតបំផ្លាញ។ តាមរយៈការពិនិត្យពីមន្រ្តីជំនាញនៃមន្ទីរកសិកម្មខេត្ត ស្រែមួយចំនួន ដែលរងការយាយីពីដង្កូវរមូរស្លឹក និងមមាចត្នោត ប៉ុន្តែអាចសង្រ្គោះនិងស្តារបានវិញ ខណៈពេលស្រូវប្រជាកសិករជាច្រើនបានច្រូតកាត់រួចហើយ។ ជាមួយគ្នានោះមន្រ្តីជំនាញបានពន្យល់ទៅបងប្អូនប្រជាកសិករម្ចាស់ស្រែ ពីវិធីកម្ចាត់សត្វល្អិតចង្រៃ និងវិធីសាស្រ្តនៃការបាញ់ថ្នាំព្យាបាលលើស្រូវដែលនៅសេសសល់ខ្លះៗពីការបំផ្លាញ។
នៅចំពោះមុខប្រជាកសិករ លោកជំទាវ អ៊ឹម រចនា បានគូសបញ្ជាក់ជូនដល់អ៊ំពូមីងប្រជាកសិករ អំពីគោលនយោបាយអាទិភាពនានា នៅក្នុងវិស័យកសិកម្មដាក់ចេញដោយរាជរដ្ឋាភិបាលអាណត្តិទី៧ ដែលផលិតកម្មដំណាំស្រូវ ត្រូវប្រើប្រាស់ពូជសុទ្ធ ជាពិសេសពូជយុទ្ធសាស្ត្ររបស់ខ្មែរ គឺពូជស្រូវសែនក្រអូប០១ ដែលមានទីផ្សារល្អ និងអាចលក់បានថ្លៃខ្ពស់ជាងពូជបរទេស។
ទន្ទឹមនឹងនោះ លោកជំទាវក៏បានណែនាំដល់មន្ដ្រីកសិកម្មឃុំ បន្តតាមដាននិងផ្ដល់ជំនួយបច្ចេកទេសដល់អ៊ំពូមីងកសិករ តាមរយៈការចុះមើលថែស្រែជាប្រចាំ សហការផ្តល់ព័ត៌មានមកអាជ្ញាធរមូលដ្ឋាន និងមន្ត្រីជំនាញ ដើម្បីអាចជួយអន្តរាគមន៍ជូនបងប្អូនប្រជាកសិករឱ្យបានទាន់ពេលវេលា ប្រកបដោយប្រសិទ្ធភាព និងប្រសិទ្ធផលខ្ពស់។
សូមបញ្ជាក់ថា តាមរបាយការណ៍ពីមន្ទីរកសិកម្មខេត្តក្រចេះ ការងារបង្កបង្កើនផល បានបញ្ចប់ការដាំដុះដំណាំស្រូវរដូវប្រាំងចំនួន ១៦ ៤៤៤ហិកតា ស្មើនឹង ១០០,០៩% នៃផែនការ ១៦ ៤៣០ហិកតា ច្រើនជាងឆ្នាំមុន៨ហិកតា។ ចំណែក ការប្រមូលផលដំណាំស្រូវរដូវប្រាំងសម្រេចបានចំនួន ៤ ៥១២ហិកតា ស្មើនឹង ២៧,៤៤% នៃផ្ទៃដីដាំដុះ ១៦ ៤៤៤ហិកតា៕
