ឯកឧត្តមរដ្ឋមន្ត្រី វេង សាខុន បានអញ្ជើញចុះត្រួតពិនិត្យស្ថានភាពធ្វើចំការដាំដុះដំណាំត្រសក់ផ្អែមរបស់កសិករ ប្រាក់ ថន នៅភូមិខ្នារ ឃុំខ្នារសណ្តាយ

ចេញ​ផ្សាយ​ ៥ មេសា ២០១៨ 20715

នៅព្រឹកថ្ងៃព្រហស្បតិ៍ ៥កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៥ ខែមេសា គ.ស ២០១៨ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានអញ្ចើញចុះពិនិត្យស្ថានភាពធ្វើចំការដាំដុះដំណាំត្រសក់ផ្អែមរបស់កសិករ ប្រាក់ ថន នៅភូមិខ្នារ ឃុំខ្នារសណ្តាយ ស្រុក បន្ទាយស្រី ខេត្តសៀមរាប។ បច្ចុប្បន្នកសិករប្រាក់ ថន មានផ្ទៃដីដាំដុះដំណាំត្រសក់ផ្អែម ចំនួនប្រមាណ ១,៤ ហត ហើយរូបគាត់ទើបទទួលបានជ័យលាភីលេខ៥ ក្នុងការជ្រើសរើសកសិករឆ្នើមប្រចាំឆ្នាំ២០១៧ ក្រសួងកសិកម្ម រុក្ខាប្រមាញ់ និងនេសាទ។ ដោយមើលឃើញភាពវៃឆ្លាត និងជោគជ័យរបស់លោក ប្រាក់ ថន ប្រជាកសិករដាំដំណាំត្រសក់ផ្អែមសរុប ១០៨នាក់ ដែលស្ថិតក្នុងខេត្តសៀមរាប ខេត្តបន្ទាយមានជ័យ និងខេត្តឧត្តរមានជ័យបានជ្រើសតាំងគាត់ជាប្រធានសមាគមត្រសក់ផ្អែមសៀមរាបមានជ័យ។

សូមបញ្ជាក់ថា ក្នុង១ថ្ងៃសមាគមមានលទ្ធភាព និងកំលាំងផ្គត់ផ្គង់ត្រសក់ផ្អែមទៅទីផ្សារតាមបណ្តាខេត្ត និងផ្សារទំនើបនៅទីក្រុងភ្នំពេញប្រមាណជាង ៥០០-១,០០០ គីឡូក្រាមដោយមានបិទស្លាកសញ្ញាសម្គាល់សហគមលើផ្លែត្រសក់ផ្អែមផងដែរ។ ថ្មីៗនេះ សហគមកំពុងធ្វើកិច្ចសន្យាផ្គត់ផ្គង់ជាមួយផ្សារទំនើបម៉ាក្រូនៅទីក្រុងភ្នំពេញ និងក៏កំពុងតែពិភាក្សាជាមួយក្រុមហ៊ុនក្រៅស្រុកមួយចំនួនផងដែរដើម្បីធ្វើការនាំចេញ។