ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា ទទួលជួបតំណាងសហភាពអឺរ៉ុប (EU) និង អង្គការ FAO ស្ដីពីការផ្សព្វផ្សាយព័ត៌មាន សម្រាប់ «ទិវាភពផែនដី» ក្រោមប្រធានបទ «ការគ្រប់គ្រងធនធានជលផលប្រកបដោយចីរភាព»
ចេញផ្សាយ ៣ មេសា ២០២៥ 3093
នៅព្រឹកថ្ងៃទី៣ ខែមេសា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារព័ត៌មាននិងទំនាក់ទំនងសាធារណៈ បានទទួលជួបពិភាក្សាការងារជាមួយតំណាងសហភាពអឺរ៉ុប (EU) និងអង្គការស្បៀង និងកសិកម្មនៃសហប្រជាជាតិ (FAO) ស្ដីពីកិច្ចសហការ ក្នុងការផ្សព្វផ្សាយព័ត៌មាន សម្រាប់ «ទិវាភពផែនដី» ក្រោមប្រធានបទ «ការគ្រប់គ្រងធនធានជលផលប្រកបដោយចីរភាព» នៅក្នុងជំនួបនេះ លោកជំទាវ អ៊ឹម រចនា បានសម្តែងការស្វាគមន៍ចំពោះកិច្ចសហការរវាងក្រសួង ជាមួយតំណាងសហភាពអឺរ៉ុបប្រចាំកម្ពុជា និងអង្គការ FAO ដែលបានដំណើរការយ៉ាងរលូន និងបានផ្ដល់ប្រយោជន៍ជាច្រើនទៅដល់ប្រជាជន តាមរយៈការផ្សព្វផ្សាយនាពេលកន្លងមក។
សម្រាប់ «ទិវាភពផែនដី» ដែលក្រសួងកសិកម្ម សហភាពអឺរ៉ុប និងអង្គការ FAO គ្រោងរៀបចំរួមគ្នានៅចុងខែមេសា ឆ្នាំ២០២៥នេះ អង្គប្រជុំបានពិនិត្យនិងពិភាក្សាលើឯកសារទស្សនាទាននៃកម្មវិធី ដែលនឹងប្រព្រឹត្តឡើង ក្រោមអធិបតីភាពដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពី ឯកឧត្តម ឯកឧត្តម ឌ្រីសម៉ាន់ អ៉ីហ្គោរ៍ ឯកអគ្គរដ្ឋទូតសហភាពអឺរ៉ុបប្រចាំកម្ពុជា និងតំណាងអង្គការ FAO ប្រចាំកម្ពុជា។
សូមជម្រាបជូនថា ទិវាភពផែនដីសម្រាប់ឆ្នាំ២០២៥នេះ ក៏មានរួមបញ្ចូលផងដែរ ដំណើរទស្សនកិច្ចអ្នកសារព័ត៌មាន មកពីបណ្តាញស្ថាប័នព័ត៌មានផ្សេងៗជាច្រើន ចុះទស្សនកិច្ចទៅកាន់ខេត្តពោធិសាត់ ដើម្បីផ្តិតយករូបភាពជាក់ស្តែង និងជួបសម្ភាសផ្ទាល់ជាមួយប្រជាសហគមន៍ អំពីប្រយោជន៍ដែលទទួលបាន តាមរយៈសមិទ្ធផលនៃការគ្រប់គ្រងធនធានជលផលទឹកសាបនៅកម្ពុជា ដើម្បីអនុញ្ញាតឲ្យអ្នកសារព័ត៌៎មាន អាចផលិតព័ត៌មានពិតប្រាកដ និងគ្រប់ជ្រុងជ្រោយ សម្រាប់ផ្សព្វផ្សាយទៅកាន់សាធារណៈជន៕
