វគ្គបណ្តុះបណ្តាលស្តីពីការគ្រប់គ្រងសមាសភាពចង្រៃលើដំណាំស្រូវស្របតាមលក្ខខណ្ឌតម្រូវសម្រាប់ទីផ្សារនាំចេញអង្ករទៅសហភាពអឺរ៉ុប នៅសហគមន៍កសិកម្មទំនើបដំណាំស្រូវព្រះនេត្រព្រះមានជ័យ ខេត្តបន្ទាយមានជ័យ

ចេញ​ផ្សាយ​ ២៧ វិច្ឆិកា ២០២៥ 6414

នៅថ្ងៃទី២៦ ខែវិច្ឆិកា ឆ្នាំ២០២៤ លោក ហេង ឈុនហ៊ី និងលោកបណ្ឌិត ឌី សំអាន អនុប្រធាននាយកដ្ឋានការពារដំណាំ អនាម័យ និងភូតគាមអនាម័យនៃអគ្គនាយកដ្ឋានកសិកម្ម បានចូលរួមជាអធិបតីក្នុងវគ្គបណ្តុះបណ្តាលស្តីពីការគ្រប់គ្រងសមាសភាពចង្រៃលើដំណាំស្រូវស្របតាមលក្ខខណ្ឌតម្រូវសម្រាប់ទីផ្សារនាំចេញអង្ករទៅសហភាពអឺរ៉ុប នៅក្នុងសហគមន៍កសិកម្មទំនើបដំណាំស្រូវព្រះនេត្រព្រះមានជ័យ ដែលគាំទ្រដោយគម្រោង CAPRED និងមានការអញ្ជើញចូលរួមពីតំណាងមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ មន្ត្រីកសិកម្មឃុំ និងសមាជិកសហគមន៍កសិកម្មទំនើបដំណាំស្រូវព្រះនេត្រព្រះមានជ័យ ខេត្តបន្ទាយមានជ័យ សរុបប្រមាណ ៤០រូប។ 

វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណងដើម្បីផ្តល់ចំណេះដឹងក្នុងការគ្រប់គ្រងសមាសភាពចង្រៃលើដំណាំស្រូវស្របតាមលក្ខខណ្ឌតម្រូវសម្រាប់ទីផ្សារនាំចេញអង្ករទៅសហភាពអឺរ៉ុប និងចំណេះដឹងពាក់ព័ន្ធនឹងកិច្ចសម្រួលពាណិជ្ជកម្មផលិតផលរុក្ខជាតិ និងទំនិញជាកម្មវត្ថុនៃការត្រួតពិនិត្យភូតគាមអនាម័យប្រកបដោយសុវត្ថិភាព។ 

តាមរយៈវគ្គបណ្តុះបណ្តាលនេះ សិក្ខាកាមក៏បានទទួលចំណេះដឹងអំពីការគ្រប់គ្រងសមាសភាពចង្រៃចម្បងៗដូចជាជំងឺប្លាស ជំងឺរលាកស្រទបស្លឹក ជំងឺអុចត្នោត មមាចត្នោត ដង្កូវមូលស្លឹក ដង្កូវស៊ីរូងដើម ទ្រីប ខ្យងមាស និងស្មៅចង្រៃ ដោយការអនុវត្តបទដ្ឋានបច្ចេកទេសនៃការប្រើប្រាស់ថ្នាំកសិកម្មប្រកបដោយប្រសិទ្ធភាពនិងសុវត្ថិភាព និងកម្រិតសំណល់ថ្នាំកសិកម្ម (MRL) ស្របតាមបទបញ្ញត្តិថ្មីពីកម្រិតសំណល់អតិបតិមានៃថ្នាំកសិកម្មនៅក្នុងផលិតផលអង្ករដែលជាបទបញ្ញត្តិ និងលក្ខខណ្ឌតម្រូវភូតគាមអនាម័យរបស់សហភាពអឺរ៉ុប។