ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញដឹកនាំប្រជុំតម្រង់ទិស និងការអនុវត្តន៍គោលការស្រែល្អជាមួយការផ្តល់សេវាកសិកម្មរួម(One Stop Services) ដល់មន្រ្តីកសិកម្មឃុំ ទាំង៦ខេត្តជុំវិញបឹងទន្លេសាប
ចេញផ្សាយ ២៥ តុលា ២០២៥ 1509
ចាប់ពីថ្ងៃទី២០ ដល់ថ្ងៃទី២៤ ខែតុលា ឆ្នាំ២០២៥ ឯកឧត្តមបណ្ឌិតរដ្ឋលេខាធិការ យ៉ង សាំង កុមារ និងឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខប្រមាញ់ និងនេសាទ អញ្ជើញដឹកនាំប្រជុំតម្រង់ទិស និងការអនុវត្តន៍គោលការណ៍ស្រែល្អជាមួយការផ្តល់សេវាកសិកម្មរួម (One Stop Services) ដល់មន្រ្តីកសិកម្មឃុំ - សង្កាត់ ទាំង៦ខេត្តជុំវិញបឹងទន្លេសាប។
ខេត្តចំនួន៦នោះរួមមាន៖ ខេត្តកំពង់ធំ ខេត្តសៀមរាប ខេត្តបន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង ដោយមានការចូលរួមពីតំណាងមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ថ្នាក់ដឹកនាំការិយាល័យតំបន់ទន្លេសាប នៃនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ តំណាងដៃគូអភិវឌ្ឃន៍ អង្គការ GIZ សហការជាមួយវិស័យឯកជន។
នាកិច្ចប្រជុំតម្រង់ទិស ឯកឧត្តម បណ្ឌិត យ៉ង សាំងកុមារ បានគូសបញ្ជាក់ថា ការងារដែលសំខាន់នាពេលនេះគឺការរក្សាស្ថិរភាពតម្លៃ ដើម្បីអនុវត្តបាន មន្ត្រីកសិកម្មឃុំត្រូវក្តាប់ឱ្យបាននូវទិន្នន័យផលិតកម្មស្រូវតាមឃុំគោលដៅនីមួយៗ។ កត់ត្រាព័ត៌មានអំពីប្រភេទពូជ បរិមាណស្រូវដែលកសិករគ្រោងលក់ ពេលវេលា និងទីកន្លែងលក់ ដើម្បីរៀបចំផែនការសម្របសម្រួលទីផ្សារជាប្រព័ន្ធ និងការអន្តរាគមន៍ទប់ស្កាត់ការធ្លាក់ថ្លៃ នារដូវការប្រមូលផល នៅពាក់កណ្តាលខែវិច្ឆិកា។
ទន្ទឹមនឹងនោះដែរ ឯកឧត្តមបណ្ឌិតបានណែនាំ និងជំរុញមន្ត្រីកសិកម្មឃុំ រកកសិករសហការអនុវត្តគោលការណ៍ស្រែល្អ ដើម្បីគ្រប់គ្រងចំណាយឱ្យមានប្រសិទ្ធភាព ផលិតស្រូវក្នុងថ្លៃដើមទាប បង្កើនគុណភាពស្រូវឱ្យបានល្អ មានភាពសុទ្ធ គ្រាប់ពេញ គ្រាប់ទុំល្អ និងគ្មានសំណល់ថ្នាំកសិកម្មលើសស្តងដារ និងការសម្របសម្រួលការដាំដុះ និងប្រមូលផលតាមគោលការណ៍ស្រែសមកាលភ្ជាប់ជាមួយការគោលការណ៍ One stop services ដោយគិតចាប់ពីរៀបចំការដាំដុះ សេវាបច្ចេកទេស និងការសម្របសម្រួលទីផ្សារជាដើម៕
