លោកជំទាវ យ៉ើ អាស៊ីគីន អញ្ជើញជាអធិបតីភាពក្នុងពិធី «សម្ពោធ​ដាក់ឱ្យ​​ប្រើ​ប្រាស់​ជាផ្លូវការនូវប្រភេទពូជដំណាំគម្របដីដែល​បានចុះ​បញ្ជីជាពូជជាតិ និងការត្រួតពិនិត្យគុណភាពពូជដំណាំតាមប្រព័ន្ធ​ធានាគុណភាព (QDS)»

ចេញ​ផ្សាយ​ ៣០ មករា ២០២៦ 2696

នារសៀលថ្ងៃទី២៩ ខែមករា ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋ​លេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុ​ប្រធាន​គណៈកម្មការតម្រង់ទិសនៃសម្ព័ន្ធកសិកម្មអភិរក្ស និងប្រពលវប្បកម្ម​និរន្តរ​ភាព​​កម្ពុជា (CASIC) បានអញ្ជើញជាអធិបតីភាពក្នុងពិធី «សម្ពោធ​ដាក់ឱ្យប្រើប្រាស់ជាផ្លូវការនូវប្រភេទពូជដំណាំគម្របដីដែលបានចុះបញ្ជីជាពូជជាតិ និងការត្រួតពិនិត្យគុណភាពពូជដំណាំតាមប្រព័ន្ធធានា​គុណភាព (QDS)» នៅសណ្ឋាគារ Novotel ភ្នំពេញ។
កម្មវិធីនេះមានការអញ្ជើញចូលរួមពីតំណាងអគ្គនាយកដ្ឋានកសិកម្ម (នាយក​ដ្ឋានពូជដំណាំ នាយកដ្ឋានគ្រប់គ្រងធនធានដីកសិកម្ម និង​នាយក​ដ្ឋានវិស្វកម្មកសិកម្ម) អង្គការ Swisscontact Cambodia មជ្ឈមណ្ឌល CIRAD  ដៃគូអភិវឌ្ឍន៍ វិស័យឯកជន ស្ថាប័នស្រាវជ្រាវ និងសហភាពសហគមន៍កសិកម្ម ខេត្តបាត់ដំបង និងខេត្តព្រះវិហារ។
ព្រឹត្តិការណ៍សម្រាប់វិស័យកសិកម្មនេះមានគោលដៅចំនួន៤៖ ១)ទទួល​ស្គាល់ជាផ្លូវការនូវពូជដំណាំគម្របដីចំនួន១៥ ប្រភេទ ក្នុងបញ្ជីពូជជាតិ  ២)ដាក់ឱ្យអនុវត្តប្រព័ន្ធ QDS លើ ៦ប្រភេទអាទិភាព ដើម្បីធានាគុណភា​ពគ្រាប់ពូជជូនកសិករ  ៣)ជំរុញការអនុវត្តកសិកម្មកកើតឡើងវិញ (Regenerative Agriculture) ដើម្បីសុខភាពដី និងភាពធន់នឹង​អាកាសធាតុ និង៤)បង្កើនកិច្ចសហការរវាងស្ថាប័នរដ្ឋ ដៃគូអភិវឌ្ឍន៍ (CIRAD, Swisscontact) និងសហគមន៍កសិករ។
សូមបញ្ជាក់ថា ការអនុវត្តប្រព័ន្ធធានាគុណភាពពូជ (QDS) និងការចុះ​បញ្ជី​ពូជ​ជាតិ គឺជាសក្ខីភាពនៃការខិតខំប្រឹងប្រែងរបស់ក្រសួងកសិកម្ម រុក្ខាប្រមាញ់ និងនេសាទ និងដៃគូពាក់ព័ន្ធ ក្នុងការលើកកម្ពស់ជីវភាព​កសិករ និងធានាបាននូវនិរន្តរភាពបរិស្ថានកម្ពុជា៕