ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទមកកាន់ខេត្តព្រៃវែង និងខេត្តស្វាយរៀងដើម្បីពិនិត្យតាមដានការងារបង្កបង្កើនផល

ចេញ​ផ្សាយ​ ២៦ សីហា ២០១៩ 4523

ចូលដល់ថ្ងៃទី២ នៃដំណើរចុះមកបំពេញបេសកកម្មរបស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទមកកាន់ខេត្តព្រៃវែង និងខេត្តស្វាយរៀង ដើម្បីពិនិត្យតាមដានការងារបង្កបង្កើនផល។
- កម្មវិធីទី០១: 
នៅព្រឹកថ្ងៃអាទិត្យ ១០រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែ សីហា ឆ្នាំ២០១៩ ឯកឧត្តមរដ្ឋមន្ត្រី និងលោក សុខ រស់ អភិបាលរងខេត្ត រួមជាមួយសហការី បានអញ្ជើញចុះមកពិនិត្យវឌ្ឍនភាពនៃការវិនិយោគលើដំណាំអំពៅរបស់ក្រុមហ៊ុន NKVC នៅ ភូមិត្រពាំងស្គន់ ឃុំគគី ស្រុករមាសហែក ខេត្តស្វាយរៀង និងជួបសំណេះសំណាលជាមួយបងប្អូនកម្មករប្រមាណ ១០០នាក់។

នាយកក្រុមហ៊ុនបានឲ្យដឹងថាបច្ចុប្បន្នក្រុមហ៊ុនដាំបាន ៥៥០ហត លើផ្ទៃដីសរុប ៧៦៧ហត ដែលជាសម្បទានដីសេដ្ឋកិច្ចទទួលយកមកវិនិយោគពីរាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ នាឆ្នាំ២០១០។ ជាមធ្យមអាចទទួលបានផលពី ៨០-១២០តោន/ហត។ បច្ចុប្បន្នតម្លៃអំពៅមានការធ្លាក់ចុះបន្តិចមកទៅត្រឹម ៣៥ដុល្លារ/តោន។ ដោយសារតំបន់នេះមានសក្តានុពលលើដំណាំអំពៅ និងដំឡូងមី លោកនាយកក្រុមហ៊ុនស្នើសុំក្រសួងកសិកម្មជួយរកដៃគូវិនិយោគសាង សង់រោងចក្រកែច្នៃស្កអំពៅ និងដំឡូងមី ដើម្បីស្រូបយកវត្ថុធាតុដើមទាំងនេះមកប្រើប្រាស់ឲ្យអស់លទ្ធភាព និងជាពិសេសជួយបង្កើតការងារជូនប្រជាពលរដ្ឋនៅមូលដ្ឋាននេះ។

នាឱកាសនេះផងដែរ លោក ថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទ បានរាយ ការណ៍ជូនពិធីជ្រាបដោយសង្ខេបផងដែរពីការងារបង្កបង្កើនផលស្រូវ បន្លែ ការចិញ្ចឹមសត្វ និងដំណាំកសិឧស្សាហ៍កម្ម (អំពៅស្ក) និងដំឡូងមី។ ជារួមការងារបង្កបង្កើនផលនៅទូទាំងខេត្តបានទទួលផលល្អ បើទោះបីខេត្តបានជួបបញ្ហាជំងឺប៉េស្តជ្រូកអាហ្រ្វិក និងសត្វល្អិតមមាជត្នោតបំផ្លាញដំណាំស្រូវ តែដោយមានវិធានការទប់ស្កាត់បន្ទាន់ ខេត្តអាចគ្រប់គ្រងបញ្ហានេះបានទូទាំងខេត្ត។

មានមតិសំណេះសំណាលជាមួយបងប្អូនកម្មករ ឯកឧត្តមរដ្ឋមន្ត្រី និងលោកអភិបាលរងខេត្ត លោកបានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែននាយករដ្ឋមន្រ្តី សម្តេចកិត្តិព្រឹត្តបណ្ឌិត សម្តេចមហាពញាចក្រីប្រធានរដ្ឋសភា និងសម្តេចវិបុលសេនាភក្តីប្រធានព្រឹទ្ធ សភា មកជូនបងប្អូនទាំងអស់គ្នា សម្តេចតែងតែគិតគូពីទុក្ខលំបាករបស់បងប្អូនគ្រប់បែបយ៉ាង ហើយព្យាយាមដោះស្រាយបញ្ហាទាំងឡាយជូនបងប្អូនជាជំហានៗតាមការចាំបាច់ និងទាន់ពេល វេលា ស្របតាមកំណើនសេដ្ឋកិច្ចរបស់យើង ហើយសម្តេចបានជូនពរឲ្យបងប្អូនកម្មករទាំងអស់ជួបតែពុទ្ធពរទាំង៤ ប្រការគ្រប់ៗគ្នា។

ភ្ជាប់ជាមួយសមិទ្ធផលដែលក្រុមហ៊ុនសម្រេចបាន ឯកឧត្តមរដ្ឋមន្ត្រីបានវាយតម្លៃខ្ពស់ចំពោះការខិតខំប្រឹងប្រែង យកអស់ស្មារតីទទួលខុសត្រូវក្នុងការវិនិយោគលើសម្បទានដីសេដ្ឋកិច្ចនេះ។ ទន្ទឹមនេះ ឯកឧត្តមរដ្ឋមន្ត្រីស្នើឲ្យក្រុមហ៊ុនគួរបង្កើនទុនវិនិយោគធ្វើយ៉ាងណាប្រើប្រាស់ដីនេះឲ្យអស់លទ្ធភាពដើម្បីបង្កើតជាពហុប្រយោជន៍ឲ្យអស់សក្តានុពល និងជាពិសេសចូលរួមបង្កើតការងារជូនបងប្អូនយើង មានការងារ ទទួលបានប្រាក់ចំណូលសមរម្យ ធ្វើឲ្យកម្រិតជីវភាពល្អប្រសើរ ស្របតាមគោលនយោបាយរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី ដែលបានដាក់ចេញកន្លងមក។