ឯកឧត្ដមរដ្ឋលេខាធិការ តូច ប៊ុនហួរ សហការដឹកនាំកិច្ចប្រជុំលើកទី២ របស់គណៈកម្មាធិការតម្រង់ទិសនៃគម្រោង EU-German CAPSAFE

ចេញ​ផ្សាយ​ ៤ ធ្នូ ២០២៥ 2513

នាព្រឹកថ្ងៃទី៤ ខែធ្នូ ឆ្នាំ ២០២៥ ឯកឧត្ដម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តមអនុរដ្ឋលេខាធិការ ចាន់ សុវត្ថិភាព និង ឯកឧត្តមអនុរដ្ឋលេខាធិការ សាយ សុភភោគា បានសហការជាមួយមន្ត្រីសហភាពអឺរ៉ុប និងមន្ត្រីនៃស្ថានទូតអាល្លឺម៉ង់ប្រចាំនៅកម្ពុជា ដើម្បីដឹកនាំកិច្ចប្រជុំលើកទី ២ របស់គណៈកម្មាធិការតម្រង់ទិសនៃគម្រោង EU-German CAPSAFE នៅខេត្តកំពង់ធំ។
កិច្ចប្រជុំនេះ​ មានការចូលរួមពីមន្ដ្រីក្រសួងកសិកម្ម រុក្ខាប្រមាញ់ និងនេសាទក្រសួងបរិស្ថាន មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ត្បូងឃ្មុំ ក្រចេះ និងខេត្តកំពត អង្គការ PIN និងមន្ត្រី GIZ និងសភាពអឺរ៉ុប សរុបប្រមាណ ៥០នាក់ បានផ្ដោតជាសំខាន់លើការពិនិត្យវឌ្ឍនភាពនៃការអនុវត្តគម្រោង និងបញ្ហាសំខាន់ៗ ដែលចាំបាច់ត្រូវកែលម្អ សំដៅធ្វើឱ្យសម្រេចបានលទ្ធផលល្អ និងច្រើនបំផុត តាមដែលអាចធ្វើបាន។
បើតាមឯកឧត្ដមរដ្ឋលេខាធិការ គម្រោងនេះបាន និងកំពុងប្រើប្រាស់ថវិកាជំនួយរបស់ប្រទេសអាល្លឺម៉ង់និងសហភាពអឺរ៉ុប ដើម្បីរួមចំណែកដោះស្រាយបញ្ហាប្រឈមសំខាន់ៗ ពាក់ព័ន្ធនឹងផលិតកម្ម ការគ្រប់គ្រង ការកែច្នៃ និងការធ្វើពាណិជ្ជកម្មគ្រាប់ស្វាយចន្ទី និងម្រេច ពោលគឺរួមចំណែកបង្កើនសេដ្ឋកិច្ចជាតិ និងប្រាក់ចំណូលរបស់កសិករ អ្នកប្រមូលទិញ អ្នកកែច្នៃ និងអ្នកនាំចេញ។
ជាមួយគ្នានេះ​ ឯកឧត្ដមរដ្ឋលេខាធិការ បានគូសបញ្ជាក់ថា​ គម្រោងនេះ​ ផ្តោតជាសំខាន់លើការជួយបង្កើនផលិតភាព គុណភាព និងសុវត្ថិភាពនៃកសិផល ២មុខនេះ ដើម្បីឱ្យអាចនាំចេញបានកាន់តែច្រើនទៅកាន់ទីផ្សារអន្តរជាតិ ។ ជាមួយគ្នានោះ គម្រោងក៏យកចិត្តទុកដាក់ក្នុងការជួយធ្វើឱ្យផលិតកម្មកសិផលនេះកាន់តែធន់នឹងអាកាសធាតុ កាត់បន្ថយថ្លៃធ្វើផលិតកម្ម ការបង្កើនតម្លៃបន្ថែម ដោយបង្កើន និងកែលម្អការកែច្នៃ ការសម្របសម្រួលឲ្យមានវិនិយោគិនពីបរទេសមកវិនិយោគនៅកម្ពុជា ការដោះរបាំងបច្ចេកទេស ការបើកច្រករកទីផ្សារអន្តរជាតិ ការធ្វើឱ្យមានការងារសមរម្យ ការផ្តល់ប្រយោជន៍ជូនស្ត្រី យុវជន និងកុមារ និងការការពារធនធានធម្មជាតិ ដូចជាព្រៃឈើ ទឹក និងដីកសិកម្មជាដើម៕