ព័ត៌មានផ្សេងៗទៀត
កិច្ចសន្ទនាតុកាហ្វេយេនឌ័រ៖ «លើកកម្ពស់ភាពជាអ្នកដឹកនាំរបស់ស្ត្រី និងការអភិវឌ្ឍធនធានមនុស្ស ក្នុងវិស័យអប់រំ និងស្រាវជ្រាវកសិកម្ម»
ចេញផ្សាយ ៣១ សីហា ២០២៦ 1909
នៅថ្ងៃទី៣១ ខែសីហា ឆ្នាំ២០២៦ លោកជំទាវ ចាន់ ផលលឿន លោកជំទាវ យ៉ើ អាស៊ីគីន និងលោកជំទាវ វ៉ាន់ សែនពិសី អនុរដ្ឋលេខាធិការ និងជាអនុប្រធានក្រុមការងារយេនឌ័រ នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងកិច្ចសន្ទនាតុកាហ្វេស្តីពី « ការអភិវឌ្ឍន៍សមត្ថភាពវិជ្ជាជីវៈ និងសុខមាលភាពការងារ ស្រ្តីក្នុងវិស័យអប់រំ និងស្រាវជ្រាវកសិកម្ម » នៅសណ្ឋាគារ Sun & Moon រាជធានីភ្នំពេញ។
កម្មវិធីនេះរៀបចំឡើងដោយសាកលវិទ្យាល័យភូមិន្ទកសិកម្ម (RUA) ដោយមានការគាំទ្រពីអង្គការស្បៀង និងកសិកម្មនៃអង្គការសហប្រជាជាតិ (FAO) ព្រមទាំងមានការចូលរួមពីថ្នាក់ដឹកនាំសាកលវិទ្យាល័យភូមិន្ទកសិកម្ម ក្រុមការងារយេនឌ័រនិងកុមារ នៃក្រសួងកសិកម្ម តំណាងអង្គការ FAO និងដៃគូអភិវឌ្ឍន៍នានា តំណាងនិស្សិត និងភាគីពាក់ព័ន្ធ សរុបអ្នកចូលរួមប្រមាណជា៥០នាក់។
ថ្លែងក្នុងពិធីបើក លោកជំទាវ ចាន់ ផលលឿន បានគូសបញ្ជាក់ថា ការអភិវឌ្ឍធនធានមនុស្ស គឺជាកត្តាស្នូលសម្រាប់ជំរុញការអភិវឌ្ឍប្រកបដោយចីរភាព។ ក្នុងបរិបទនេះ ការអប់រំ និងការស្រាវជ្រាវកសិកម្ម ត្រូវការធនធានមនុស្សដែលមានចំណេះដឹង ជំនាញ សមត្ថភាព និងមនសិការវិជ្ជាជីវៈ ដើម្បីឆ្លើយតបទៅនឹងការវិវត្តនៃសង្គម បច្ចេកវិទ្យា និងតម្រូវការទីផ្សារ ស្របតាមចក្ខុវិស័យកសិកម្មឆ្នាំ២០៣០ ដែលផ្តោតលើការអភិវឌ្ឍកសិកម្មកម្ពុជាឱ្យកាន់តែទំនើប ប្រកួតប្រជែង និងមាននិរន្តរភាព។
លោកជំទាវបញ្ជាក់បន្ថែមថា ស្ត្រីមានតួនាទីយ៉ាងសំខាន់ក្នុងការបង្រៀន ការស្រាវជ្រាវ ការផ្ទេរបច្ចេកវិទ្យា និងការគ្រប់គ្រងស្ថាប័នអប់រំ។ ដូច្នេះ ការលើកកម្ពស់សមធម៌យេនឌ័រ មិនត្រឹមតែជាការធានាឱកាសស្មើគ្នារវាងបុរស និងស្ត្រីប៉ុណ្ណោះទេ ប៉ុន្តែជាកត្តាចាំបាច់សម្រាប់ប្រើប្រាស់សក្តានុពលរបស់ធនធានមនុស្សឱ្យបានពេញលេញ។ ការផ្តល់ឱកាសស្មើគ្នាក្នុងការទទួលបានចំណេះដឹង បច្ចេកវិទ្យា ធនធាន និងការចូលរួមក្នុងការសម្រេចចិត្ត នឹងជួយពង្រឹងសមត្ថភាពស្ត្រី និងរួមចំណែកដល់ការអភិវឌ្ឍវិស័យកសិកម្មប្រកបដោយបរិយាបន្ន និងចីរភាព។
សូមជម្រាបថា កិច្ចសន្ទនាតុកាហ្វេយេនឌ័រនេះ ជារួមបានក្លាយជាវេទិកាដ៏មានសារៈសំខាន់ ដោយបានផ្តល់ឱកាសអ្នកចូលរួម ជជែកយ៉ាងផុលផុស ផ្លាស់ប្តូរចំណេះដឹង បទពិសោធន៍ និងការបង្កើតទំនាក់ទំនងរវាងស្ថាប័ន និងភាគីពាក់ព័ន្ធ។ លទ្ធផលដែលទទួលបាននឹងក្លាយជាមូលដ្ឋានសម្រាប់ពង្រឹងភាពជាអ្នកដឹកនាំ និងការចូលរួមរបស់ស្ត្រី កែលម្អសុខមាលភាពការងារ និងអភិវឌ្ឍធនធានមនុស្សប្រកបដោយសមភាព សមត្ថភាព សម្រាប់រួមចំណែកដល់ការអភិវឌ្ឍវិស័យអប់រំ និងកសិកម្មកម្ពុជានាពេលអនាគត៕
