Other News
ក្រសួងកសិកម្ម រុក្ខាប្រមាញ់ និងនេសាទ បន្តជំរុញវឌ្ឍនភាពគម្រោងអភិវឌ្ឍន៍វិស័យកសិកម្ម និងពង្រឹងសហគមន៍នៅខេត្តកំពង់ចាម ត្បូងឃ្មុំ និងក្រចេះ
ចេញផ្សាយ ១៣ ឧសភា ២០២៦ 6062
ចាប់ពីថ្ងៃទី ១១ ដល់ ១៣ ខែឧសភា ឆ្នាំ ២០២៦ ក្រុមការងារនៃ ក្រសួងកសិកម្ម រុក្ខាប្រមាញ់ និងនេសាទ បានចុះបេសកកម្មយ៉ាងសកម្មនៅក្នុងខេត្តកំពង់ចាម ត្បូងឃ្មុំ និងក្រចេះ ដើម្បីពិនិត្យ និងវាយតម្លៃផ្ទាល់លើវឌ្ឍនភាពការងារ ក៏ដូចជាដោះស្រាយបញ្ហាប្រឈមនានារបស់បងប្អូនកសិករ។
ក្រុមការងារដឹកនាំដោយឯកឧត្តម តូច ប៊ុនហួរ ឯកឧត្តម ចាន់ ចេស្តា និងឯកឧត្តមមាស ពិសិដ្ឋ រដ្ឋលេខាធិការក្រសួង អមដំណើរដោយ ឯកឧត្តម សៀក ឡេង ឯកឧត្តម ចាន់ សុវត្ថិភាពនិងឯកឧត្តម សាយ សុភភគា អនុរដ្ឋលេខាធិការក្រសួង ព្រមទាំងទីប្រឹក្សា និងមន្ត្រីជំនាញ ដែលទទួលបន្ទុកផ្ទាល់លើកម្មវិធី ASPIRE-AT (គាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម) និងគម្រោង CFAVC (ខ្សែច្រវាក់ផលិតកម្មកសិកម្មដោយភាតរបរិស្ថាន ក្នុងគោលបំណង៖ ១) ពិនិត្យការគ្រប់គ្រង និងដឹកនាំសហគមន៍កសិកម្មមួយចំនួន ២) ពិនិត្យវឌ្ឍនភាពនៃការគាំទ្ររបស់ក្រសួងកសិកម្ម រុក្ខាប្រមាញ់ និងនេសាទ និង ៣) ពិនិត្យភាពខ្វះខាត និងស្រង់យកមតិយោបល់កែលម្អការគាំទ្រ។
តាមរយៈកម្មវិធីនិងគម្រោងខាងលើ ក្រសួងបាន និងកំពុងដាក់ទុនវិនិយោគ ជាកម្ចី និងជំនួយពីដៃគូអភិវឌ្ឍន៍ដូចជា IFAD, EU, EIB, ADB, GEF និង SSTC សម្រាប់អនុវត្តសកម្មភាព ដែលរួមចំណែកបង្កើនប្រសិទ្ធផលិតកម្មកសិកម្ម បង្កើនគុណភាពកសិផល និងបង្កើនការធ្វើពាណិជ្ជកម្មផលិតផលកសិកម្ម ទន្ទឹមគ្នានឹងការកាត់បន្ថយថ្លៃដើមផលិត និងការថែរក្សាធនធានធម្មជាតិកសិកម្ម ជាពិសេស ដី ទឹក និងព្រៃឈើ ។
សកម្មភាពយុទ្ធសាស្ត្រទាំងនេះរួមមាន ការចងក្រងកសិករជាសហគមន៍កសិកម្ម ហើយពង្រឹងសមត្ថភាពគ្រប់គ្រង ការផ្តល់ហេដ្ឋារចនាសម្ព័ន្ធ និងមធ្យោបាយដើម្បីសម្រួលដល់ផលិតកម្ម និងពាណិជ្ជកម្មផលិតផលកសិកម្ម ការផ្តល់ប្រាក់កម្ចីដើម្បីធ្វើដើមទុន ការដោះរបាំងបច្ចេកទេស និងការសម្របសម្រួលនាំចេញផលិតផលកសិកម្មទៅកាន់ទីផ្សារអន្តរជាតិ ព្រមទាំងការផ្សព្វផ្សាយបញ្ចូលប្រើប្រាស់បច្ចេកវិទ្យាទំនើប និងដែលមានភាពសមស្របទៅនឹងនិរន្តរភាពបរិស្ថាន។
ការចុះជួបផ្ទាល់ជាមួយកសិករ និងអាជ្ញាធរដែនដី គឺជាយន្តការដ៏សំខាន់របស់ក្រសួង ដើម្បីធានាថាកម្មវិធីគោលនយោបាយអាទិភាពរបស់រាជរដ្ឋាភិបាល ត្រូវបានអនុវត្តប្រកបដោយផ្លែផ្កា និងឆ្លើយតបទៅនឹងតម្រូវការជាក់ស្ដែងនៅមូលដ្ឋាន៕
