ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារចុះពិនិត្យ និងវាយតម្លៃពីដំណើរការខ្សែច្រវាក់ផលិតកម្មដំណាំម្រេច តម្លៃ និងទីផ្សារ នៅស្រុកកំពង់ត្រាច ខេត្តកំពត

ចេញ​ផ្សាយ​ ២៧ កុម្ភៈ ២០២៥ 2847

នៅថ្ងៃទី២៧ ខែកុម្ភ: ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក លន់ វន្នី អនុប្រធាននាយកដ្ឋានដំណាំឧស្សាហកម្មនៃអគ្គនាយកដ្ឋានកសិកម្ម លោកអភិបាលរងស្រុកកំពង់ត្រាច លោក ចាន់ រិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត និងមន្រ្តីជំនាញ បានអញ្ជើញចុះពិនិត្យ និងវាយតម្លៃពីដំណើរការខ្សែច្រវាក់ផលិតកម្មដំណាំម្រេច តម្លៃ និងទីផ្សារ ក្នុងខេត្តកំពត។

ដំណើរបេសកកម្មនេះ ឯកឧត្តមរដ្ឋលេខាធិការបានពិនិត្យការដាំដុះម្រេច និងវាយតម្លៃពីដំណើរការខ្សែច្រវាក់ផលិតកម្មដំណាំម្រេច តម្លៃ និងទីផ្សារ និងជួបសំណេះសំណាលជាមួយសមាជិកសមាគមលើកកម្ពស់ម្រេចកំពត។ សមាគមនេះបានបង្កើតឡើងតាំងពីឆ្នាំ២០០៩ ស្ថិតនៅភូមិអង្គរជ័យទី១ ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។ បច្ចុប្បន្នសមាគមមានសមាជិកសរុបចំនួន ៣៤៥គ្រួសារ។ សមាគមបានចុះបញ្ជីជាម៉ាកសំគាល់ភូមិសាស្រ្ត (GI) នៅក្រសួងពាណិជ្ជកម្ម ក្នុងអំឡុងឆ្នាំ២០១០ និងនៅសហភាពអឺរ៉ុប  ឆ្នាំ២០១៦ ផ្ទៃដីដាំដុះសរុប ២១២ ហិកតា ផ្ទៃដីប្រមូលផល ១៥៧ ហិកតា ទិន្នផល ២តោន/ហិកតា បរិមាណផល ៣១៤ តោន។

ចម្ការម្រេចក្នុងសមាគមនេះ មានដើមមួយចំនួនមានអាយុកាលរហូតដល់ ៤០ឆ្នាំ នៅតែផ្តល់ទិន្នផលខ្ពស់ រស់ជាតិឆ្ងាញ់។

ទន្ទឹមនឹងនេះ  ឯកឧត្តមក៏បានផ្សព្វផ្សាយ ផលប្រយោជន៍នៃការចងក្រងសហគមន៍កសិកម្មទំនើបទៅដល់ប្រជាពលរដ្ឋ អំពីអត្ថប្រយោជន៍សំខាន់ៗ ដែលពួកគាត់នឹងទទួលបាន ដូចជា ការធានាតម្លៃទីផ្សារ ទទួលបានទុនជាប្រាក់កម្ចីពីធនាគារ មានការប្រាក់សមរម្យ ថ្លៃដើមផលិតកម្មតិចជាងមុន មានតម្លៃល្អតាមរយ:កិច្ចសន្យាផលិតកម្ម និងអនុវត្តតាមផែនការផលិតកម្ម។

បន្ទាប់ពីបានស្តាប់ប្រសាសន៍ឯកឧត្តមរួចមក លោកអភិបាលរងស្រុកបានសំណូមពរឱ្យកសិករពិចារណាពីលទ្ធភាពចូលរួមក្នុងសហគមន៍ទំនើប ដើម្បីទទួលបាននូវអត្ថប្រយោជន៍ផ្សេងៗ ជាច្រើនទៀត និងធ្វើឱ្យមានការអភិវឌ្ឍដំណាំម្រេចឱ្យកាន់តែប្រសើរឡើង។

ជាមួយគ្នានេះ តំណាងកសិករបានបង្ហាញការចាប់អារម្មណ៍ គាំទ្រការប្រែក្លាយពីសហគមន៍ម្រេចទៅជាសហគមន៍ទំនើប និងបានស្នើឱ្យមន្ត្រីជំនាញរបស់ក្រសួងកសិកម្មពន្យល់បន្ថែមអំពីគោលការណ៍ និងនីតិវិធីក្នុងការបង្កើតសហគមន៍ទំនើបនេះផងដែរ៕