ឯកឧត្តមរដ្ឋមន្ត្រី វេង សាខុន បានទទួលជួបគណៈប្រតិភូអញ្ជើញមកពីក្រសួងឧស្សាហកម្មបឋមនៃប្រទេសណូវែលហ្សឺឡង់ ដឹងនាំដោយលោកស្រី Jenny Reid ប្រធានផ្នែកគ្រប់គ្រងទីផ្សារអាស៊ីខាងត្បូង និងអាស៊ីអាគ្នេយ៍

ចេញ​ផ្សាយ​ ៦ វិច្ឆិកា ២០១៩ 3848

នៅទីស្តីការក្រសួង នារសៀលថ្ងៃដដែល ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបគណៈប្រតិភូអញ្ជើញមកពីក្រសួងឧស្សាហកម្មបឋមនៃប្រទេសណូវែលហ្សឺឡង់ ដឹងនាំដោយលោកស្រី Jenny Reid ប្រធានផ្នែកគ្រប់គ្រងទីផ្សារអាស៊ីខាងត្បូង និងអាស៊ីអាគ្នេយ៍ដើម្បីពិនិត្យលទ្ធភាពក្នុងការកសាងកិច្ចសហប្រតិបត្តិការកម្ពុជា-ណូវែលហ្សឺឡង់លើការផ្តល់វិញ្ញាបនបត្រអេឡិចត្រូនិចអនាម័យ និងភូតគាមអនាម័យ (E-Certification on Sanitary and Phyto-Sanitary, SPS)។

ជាបឋម លោកស្រី Jenny Reid បានថ្លែងអំណរគុណជូនចំពោះឯកឧត្តមរដ្ឋមន្ត្រីដែលបាន អនុញ្ជាតឲ្យលោកស្រី និងគណ:ប្រតិភូបានចូលជួបដើម្បីសម្តែងការគួរសម និងពិភាក្សាការងារទាក់ទងនឹងកិច្ចសហប្រតិបត្តិការរវាងភាគីទាំងពីរលើ "ការផ្តល់វិញ្ញាបនបត្រអេឡិចត្រូនិចអនាម័យ និងភូតគាមអនាម័យ (E-Certification on Sanitary and Phyto-Sanitary, SPS)" ដែលកិច្ចការនេះភាគីណូវែលហ្សឺឡង់រីករាយនឹងផ្តល់ការគាំទ្រទាំងផ្នែកបច្ចេកទេស បទពិសោធន៍ មន្ត្រីជំនាញ និងការងារបណ្តុះបណ្តាលដល់ភាគីកម្ពុជា ហើយលោកស្រីសង្ឃឹមថាកម្ពុជានឹងអាចអនុវត្តប្រព័ន្ធនេះបាននាពេលអនាគតដ៏ខ្លី ដើម្បីបង្កើនភាពប្រកួតប្រជែងក្នុងការនាំចេញផលិតផលកសិកម្មទៅកាន់ទីផ្សារបរទេស។ ក្នុងរយៈពេល ២ថ្ងៃនៃដំណើរទស្សនកិច្ចមកកម្ពុជានេះ ទាំងកិច្ចប្រជុំជាមួយថ្នាក់ដឹកនាំក្រសួង និងសិក្ខាសាលាដែលបានរៀបចំដោយភាគីទាំងពីរ លោកស្រីបានវាយតម្លៃខ្ពស់ចំពោះកិច្ចខិតខំប្រឹងប្រែង និងឆន្ទៈសហការដែលបានផ្តល់ពីមន្ត្រីជំនាញក្រសួង ទទួលបានលទ្ធផលយ៉ាងល្អប្រសើរដូចការរំពឹងទុក។ ហេតុនេះ ដើម្បីឲ្យកិច្ចសហការរវាងភាគីទាំងពីរប្រព្រឹត្តទៅដោយរលូន ក្រុមការងារលោកស្រីនឹងរៀបចំចងក្រងលិខិតបញ្ជាក់អំពីបំណង ដើម្បីធ្វើការចុះហត្ថលេខាក្នុងពេលឆាប់ៗខាងមុខនេះ។

នាឱកាសនេះ ឯកឧត្តមរដ្ឋមន្រ្តីបានថ្លែងអំណរគុណជូនចំពោះរដ្ឋាភិបាលណូវែលហ្សឺឡង់ ដែលបានជួយគាំទ្រដល់ការអភិវឌ្ឍប្រទេសកម្ពុជាឲ្យមានការរីកចម្រើន តាមរយ:គម្រោងអភិវឌ្ឍលើវិស័យកសិកម្ម ការផ្តល់អាហារូបករណ៍ដល់និស្សិត និងមន្ត្រីជំនាញកសិកម្មកម្ពុជាឲ្យបន្តការសិក្សានៅប្រទេសណូវែលហ្សឺឡង់។ លោកបានជម្រាបជូនភ្ញៀវថា ការផ្តល់វិញ្ញាបនបត្រអេឡិចត្រូនិចអនាម័យ និងភូតគាមអនាម័យ គឺមានសារសំខាន់ខ្លាំងណាស់សម្រាប់វិស័យកសិ-ពាណិជ្ជកម្ម ស្របនឹងគោលនយោបាយរបស់ក្រសួងដែលបាននិងកំពុងខិតខំបង្កើនសមត្ថភាព ក្នុងការផ្តល់សេវាសាធារណ:ប្រកបដោយប្រសិទ្ធភាព ទូលំទូលាយ ទាន់ពេលវេលា និងបរិយាកាសល្អប្រសើរសម្រាប់វិនិយោគិនស្នើសុំវិញ្ញាបនបត្រ SPS ដើម្បីនាំចេញកសិផល។ តាមរយ:បទពិសោធន៍ដែលណូវែលហ្សឺឡង់មាន លោកសង្ឃឹម និងជឿជាក់ថា កិច្ចសហប្រតិបត្តិការលើការផ្តល់វិញ្ញាបនបត្រអេឡិចត្រូនិចអនាម័យ និងភូតគាមអនាម័យនឹងដំណើរការទៅដោយរលូន ហើយក្រសួងក៏ដូចជាអង្គភាពពាក់ព័ន្ធនឹងរង់ចាំផ្តល់កិច្ចសហការពេញលេញ ដើម្បីឲ្យកិច្ចការនេះសម្រេចទទួលបានជោគជ័យតាមការគ្រោងទុក។