ព័ត៌មានផ្សេងៗទៀត
លោកជំទាវ អ៊ឹម រចនា៖ ការស្រាវជ្រាវបែបវិទ្យាសាស្ត្រ ជាជំហានសំខាន់ឆ្ពោះទៅកាន់ការអភិរក្ស «គ្រំយក្ស» ប្រកបដោយប្រសិទ្ធភាពនិងប្រសិទ្ធផលខ្ពស់
ចេញផ្សាយ ១២ កញ្ញា ២០២៦ 2363
នាថ្ងៃទី១១ ខែកញ្ញា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើក «សិក្ខាសាលា និងវគ្គបណ្តុះបណ្តាល ស្តីពីការប្រមូលទិន្នន័យអេកូឡូស៊ីបឋមនៃប្រភេទសត្វកំពុងរងគ្រោះ គ្រំយក្ស» នៅក្រុងកោះរ៉ុង ខេត្តព្រះសីហនុ។
ពិធីនេះមានការអញ្ជើញចូលរួមពីតំណាងក្រសួងបរិស្ថាន អាជ្ញាធរក្រុងកោះរ៉ុង ខណ្ឌរដ្ឋបាលជលផលខេត្តព្រះសីហនុ អង្គការដៃគូអភិរក្ស ព្រមទាំងតំណាងសហគមន៍នេសាទចំនួន៥ នៅប្រជុំកោះរ៉ុង។
ថ្លែងនាឱកាសនោះ លោកជំទាវ អ៊ឹម រចនា បានគូសបញ្ជាក់ថា គ្រំយក្សគឺជា «វិស្វករជីវសាស្ត្រ» ដើរតួនាទីយ៉ាងសំខាន់ក្នុងការច្រោះសម្អាតទឹកសមុទ្រ ផ្តល់ជម្រកដល់កូនត្រី និងទ្រទ្រង់សុខភាពប្រព័ន្ធអេកូឡូស៊ីផ្កាថ្ម។ ទោះជាយ៉ាងណា ប្រភេទសត្វសមុទ្រដ៏កម្រនិងមានតម្លៃនេះ កំពុងប្រឈមនឹងការផុតពូជគួរឱ្យបារម្ភ ដោយសារការប្រមូលផលហួសកម្រិត ការជួញដូរខុសច្បាប់ ការបាត់បង់ជម្រក និងការកើនឡើងកម្ដៅទឹកសមុទ្រ។
លោកជំទាវអនុរដ្ឋលេខាធិការ បានបន្ថែមថា រាជរដ្ឋាភិបាលកម្ពុជាបានដាក់បញ្ចូលគ្រំយក្សជាប្រភេទសត្វការពារដាច់ខាត ព្រមទាំងបង្កើនការគ្រប់គ្រងតំបន់ការពារជលផលសមុទ្រ តាមរយៈការទប់ស្កាត់បទល្មើសនេសាទខុសច្បាប់ដោយគ្មានការលើកលែង។ ជាមួយគ្នានេះ ក្រសួងក៏បានជំរុញការផ្សព្វផ្សាយនិងបណ្តុះបណ្តាលសមាជិកសហគមន៍នេសាទឱ្យក្លាយជា «ឆ្មាំសមុទ្រ» ដើម្បីចូលរួមការពារធនធានធម្មជាតិជលផលដោយផ្ទាល់។
យ៉ាងណាក៏ដោយ បើតាមលោកជំទាវ អ៊ឹម រចនា ការងារអភិរក្សចាំបាច់ត្រូវតែផ្អែកលើការស្រាវជ្រាវបែបវិទ្យាសាស្ត្រជាក់ស្តែង។ លោកជំទាវសង្ឃឹមយ៉ាងមុតមាំថា សិក្ខាសាលានេះនឹងបង្កើតបានជា «បណ្តាញសហប្រតិបត្តិការអភិរក្ស» ដ៏រឹងមាំ ដើម្បីចុះស្រាវជ្រាវ ប្រមូល និងផ្តល់ទិន្នន័យមូលដ្ឋានច្បាស់លាស់ ជូនដល់ក្រសួងនិងស្ថាប័នពាក់ព័ន្ធ រៀបចំផែនការគ្រប់គ្រង ការពារ និងអភិរក្ស គ្រំយក្សនិងជម្រកផ្កាថ្មនៅកម្ពុជា ប្រកបដោយប្រសិទ្ធភាព និងប្រសិទ្ធផលខ្ពស់។ បើតាមលោកជំទាវ អ៊ឹម រចនា កិច្ចការពារជីវចម្រុះសមុទ្រនេះ គឺជាកាតព្វកិច្ចរួមរបស់យើងទាំងអស់គ្នា ដើម្បីធានាថាធនធានដ៏មានតម្លៃទាំងនេះ នឹងត្រូវបានថែរក្សាទុកជូនកូនចៅជំនាន់ក្រោយៗទៀត៕
