លោកជំទាវ យ៉ើ អាស៊ីគីន៖ កម្ពុជាចង់កែប្រែដោយឈានចេញពីអ្នកផ្គត់ផ្គង់វត្ថុធាតុដើមចេញពីវិស័យកសិកម្មទៅជាមជ្ឈមណ្ឌលផលិត និងកែច្នៃកសិផល ដែលមានតម្លៃបន្ថែមខ្ពស់

ចេញ​ផ្សាយ​ ២៣ មេសា ២០២៦ 3807

ថ្លែងក្នុងវេទិកាពិភាក្សា នាថ្ងៃទី២២ ខែមេសា ឆ្នាំ២០២៦ ក្នុងមហា សន្និបាតអង្គការ FAO ប្រចាំតំបន់អាស៊ី និងប៉ាស៊ីហ្វិក (APRC) លើក ទី៣៨ នៅប្រទេសព្រុយណេ ដារូសាឡឹម លោកជំទាវអនុរដ្ឋ លេខា ធិការ យ៉ើ អាស៊ីគីន បានគូសបញ្ជាក់ពីមហិច្ឆតារបស់កម្ពុជា ក្នុងការ ចង់កែប្រែឈានចេញពីអ្នកផ្គត់ផ្គង់វត្ថុធាតុដើមកសិកម្ម ទៅជាមជ្ឈ មណ្ឌលសម្រាប់ផលិតផលកែច្នៃដែលមានតម្លៃខ្ពស់ តាមរយៈការទាក់ ទាញការវិនិយោគបន្ថែមលើការកែច្នៃកសិផល ការផលិតដែលមាន ភាពធន់នឹងអាកាសធាតុ និងខ្សែច្រវាក់តម្លៃដែលផ្អែកលើស្តង់ដា។
តាមរយៈវេទិកានេះ លោកជំទាវ យ៉ើ អាស៊ីគីន បានធ្វើបទបង្ហាញស្តីពី «តម្រូវការវិនិយោគ និងឱកាសវិនិយោគលើវិស័យស្រូវអង្ករកម្ពុជា» ក្នុងវេទិកាម្ហូបអាហារអាស៊ី-ប៉ាស៊ីហ្វិក (APFF) ជំរុញការវិនិយោគ សម្រាប់ការផ្លាស់ប្តូរប្រព័ន្ធកសិ-ចំណីអាហារ ដោយបង្ហាញពីវឌ្ឍន ភាព ទំហំផលិតកម្ម ការវិនិយោគ ការជំរុញលើហេដ្ឋារចនាសម្ព័ន្ធកែច្នៃ និងការនាំចេញស្រូវ-អង្ករកម្ពុជាលើឆាកអន្តរជាតិ ក៏ដូចជាការទាក់ ទាញ និងបង្កើនការវិនិយោគក្នុងវិស័យកសិកម្មកម្ពុជា។
ទន្ទឹមនឹងនោះ ក្នុងជំនួបទ្វេភាគីជាមួយ លោកជំទាវអនុរដ្ឋលេខាធិការ ឯកឧត្តមបណ្ឌិត Qu Dongyu អគ្គនាយកនៃអង្គការ FAO បាន បញ្ជាក់ ជាថ្មីនូវការប្តេជ្ញាចិត្តក្នុងការពង្រឹងភាពជាដៃគូឱ្យកាន់តែរឹងមាំ ដោយផ្តោតលើការអភិវឌ្ឍវិស័យកសិកម្ម វឌ្ឍនភាពនៃប្រព័ន្ធស្បៀង កសិកម្ម និងការកៀរគរវិនិយោគ ដើម្បីគាំទ្រដល់សន្តិសុខស្បៀង ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋា ភិបាលកម្ពុជា។ ភាគីទាំងពីរក៏បានពិភាក្សាអំពីការត្រៀមរៀបចំ «វេទិកា និងការតាំងពិព័រណ៍កសិកម្មកម្ពុជា ឆ្នាំ២០២៦» ព្រមទាំងការ ជំរុញគំនិតផ្ដួចផ្ដើមហិរញ្ញប្បទានចម្រុះ ក្នុងគោលដៅពង្រឹងវិស័យជល ផលទឹកសាប វារីវប្បកម្ម និងការលើកកម្ពស់ជីវភាពសហគមន៍ជនបទ ប្រកបដោយនិរន្តរភាព។
ជាចុងបញ្ចប់ លោកជំទាវអនុរដ្ឋលេខាធិការ បានបញ្ជាក់បន្ថែមទៀត ថា កម្ពុជានៅតែបង្ហាញគោលជំហរបន្តចូលរួមយ៉ាងសកម្មជាមួយដៃគូ ក្នុងតំបន់ ដើម្បីជំរុញការអភិវឌ្ឍវិស័យកសិកម្មប្រកបដោយនិរន្តរភាព ពង្រឹងកិច្ចសហប្រតិបត្តិការក្នុងវិស័យកសិកម្ម ព្រមទាំងលើកកម្ពស់ ប្រព័ន្ធកសិកម្ម-ចំណីអាហារដែលមានភាពធន់សម្រាប់ពេល អនាគត៕