ព័ត៌មានផ្សេងៗទៀត
ឯកឧត្តមរដ្ឋលេខាធិការ មាស ពិសិដ្ឋ បានដឹកនាំកិច្ចប្រជុំស្តីពីការពិនិត្យបច្ចុប្បន្នភាព និងលទ្ធផលនៃការអនុវត្តសកម្មភាពរបស់សហភាពអឺរ៉ុប និងអង្គការ People in Need ពាក់ព័ន្ធនឹងជីកាបូន បច្ចេកវិទ្យាបៃតង ការបំភាយឧស្ម័នផ្ទះកញ្ចក់ និងការប្រើប្រាស់ធនធានឱ្យកាន់តែមានប្រសិទ្ធភាព
ចេញផ្សាយ ២០ មីនា ២០២៦ 1789
ឯកឧត្តមរដ្ឋលេខាធិការ មាស ពិសិដ្ឋ បានដឹកនាំកិច្ចប្រជុំស្តីពីការពិនិត្យបច្ចុប្បន្នភាព និងលទ្ធផលនៃការអនុវត្តសកម្មភាពរបស់សហភាពអឺរ៉ុប និងអង្គការ People in Need ពាក់ព័ន្ធនឹងជីកាបូន បច្ចេកវិទ្យាបៃតង ការបំភាយឧស្ម័នផ្ទះកញ្ចក់ និងការប្រើប្រាស់ធនធានឱ្យកាន់តែមានប្រសិទ្ធភាព
======================
នៅព្រឹកថ្ងៃទី២០ ខែមីនា ឆ្នាំ ២០២៦ ឯកឧត្តមរដ្ឋលេខាធិការ មាស ពិសិដ្ឋ បានដឹកនាំកិច្ចប្រជុំពិភាក្សាអំពីកិច្ចការខាងលើ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមរបស់ថ្នាក់ដឹកនាំក្រសួង អ្នកដឹកនាំគម្រោងពាក់ព័ន្ធ មន្រ្តីអង្គភាពសម្របសម្រួលគម្រោងអភិវឌ្ឍន៍ មន្ត្រីសហភាពអឺរ៉ុប មន្ត្រីអង្គការ People in Need (PIN) បុគ្គលិកក្រុមហ៊ុន HUSK និងបុគ្គលិកសមាគមបណ្តាញកសិករ និងធម្មជាតិ (FNN) សរុបចំនួន ២០នាក់ (ក្នុងនោះ មានស្ត្រី ៨នាក់)។
កិច្ចពិភាក្សានេះត្រូវបានធ្វើឡើងក្នុងគោលបំណងពិនិត្យបច្ចុប្បន្នភាព និងលទ្ធផលរបស់គម្រោងមួយឈ្មោះ ពន្លឿនចីរភាពប្រព័ន្ធកសិ-ស្បៀងអាហារប្រទេសកម្ពុជា ដែលគ្រប់គ្រង និងដឹកនាំអនុវត្តដោយអង្គការ People in Need ដោយប្រើប្រាស់ហិរញ្ញប្បទានឥតសំណងរបស់សហភាពអឺរ៉ុប។ គួរបញ្ជាក់ថា គម្រោងនេះមានគោលបំណងរួមចំណែកអភិវឌ្ឍវិស័យកសិកម្មនៅកម្ពុជា ប្រកបដោយនិរន្តរភាព និងបរិយាប័ន្ន តាមរយៈការបង្កើនការប្រើប្រាស់ជីកាបូន និងបច្ចេកវិទ្យាកសិកម្មបៃតង ដែលនឹងនាំឱ្យមានការថយចុះនូវការបំភាយឧស្ម័នផ្ទះកញ្ចក់។
បន្ទាប់ពីស្តាប់បទបង្ហាញអំពីវឌ្ឍនភាពរបស់គម្រោង និងពិភាក្សាយ៉ាងសកម្ម និងយ៉ាងយកចិត្តទុកដាក់រួចមក អង្គប្រជុំបានវាយតម្លៃថា គម្រោងនេះបានធ្វើសកម្មភាព និងសម្រេចបានលទ្ធផលល្អច្រើន ដែលគួររៀនសូត្រ។ មន្ត្រីសហភាពអឺរ៉ុប និងអង្គការ People in Need បានយល់ព្រមពង្រឹងកិច្ចសហការ ដោយផ្តល់ឱកាសជូនមន្ត្រីជំនាញរបស់ក្រសួងចូលរួមក្នុងសកម្មភាព និងព្រឹត្តិការណ៍សំខាន់ៗ ព្រមទាំងទទួលបានការគាំទ្របច្ចេកទេសពីទីប្រឹក្សាអន្តរជាតិ (ដូចជាការធ្វើឱ្យទទួលបានឥណទានកាបូនជាដើម)។
ជាចុងក្រោយ ឯកឧត្តមរដ្ឋលេខាធិការ បានផ្តល់អនុសាសន៍មួយចំនួនដើម្បីតម្រង់ទិសការអនុវត្តសកម្មភាពរបស់គម្រោង ដើម្បីឱ្យកាន់តែមានប្រសិទ្ធភាពក្នុងការរួមចំណែកអភិវឌ្ឍវិស័យកសិកម្ម ពោលគឺផ្តល់ផលប្រយោជន៍ច្រើនបំផុតជូនកសិករ និងប្រជាជនកម្ពុជា ទន្ទឹមគ្នានឹងការថែរក្សាឱ្យបានកាន់តែល្អនូវបរិស្ថាន និងធនធានធម្មជាតិកសិកម្ម ដូចជាដី និងទឹកជាដើម៕
