ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន និងក្រុមការងារ អញ្ជើញ​ជួប​សំណេះ​សំណាលជាមួយបណ្តាសហគមន៍កសិកម្ម នៅឃុំមួយចំនួន ក្នុង​ស្រុក​កោះញែក ខេត្តមណ្ឌលគិរី

ចេញ​ផ្សាយ​ ១៥ តុលា ២០២៥ 1365

នៅថ្ងៃទី១៥ ខែតុលា ឆ្នាំ២០២៥ ឯកឧត្តមបណ្ឌិត ហ៊ាន វណ្ណហន រដ្ឋលេខា​ធិការ​ក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF ដែលមានការចូលរួមអមដំណើរដោយប្រធាន និង​មន្ត្រី​អនុវត្តគម្រោង បានជួបសំណេះសំណាលជាមួយបណ្តាសហគមន៍កសិកម្ម នៅក្នុងឃុំស្រែហ៊ុយ ឃុំស្រែសង្គម និងឃុំអរបួនលើ ស្រុកកោះញែក ខេត្ត​មណ្ឌលគិរី។
ដំណើរបេសកកម្មនេះធ្វើឡើងក្នុងគោលបំណង ដើម្បីពិនិត្យ​កំណត់​ទីតាំង​ដាក់​​ផ្ទះសំណាញ់ ដែលមានប្រសិទ្ធភាពក្នុងការបញ្រ្ជាប ទទួលយកបាន និង​ជ្រើសយកសហគមន៍ចូលរួមអនុវត្តផលិតកម្មបន្លែបង្ហាញ ដោយការដាំក្នុង​ផ្ទះ​សំណាញ់ គាំទ្រផលិតកម្មបន្លែ បង្ហាញបច្ចេកទេសកសិកម្មឆ្លាតវៃ និងធន់ទៅ​នឹង​អាកាសធាតុ។
នាឱកាសនៃជំនួបនោះ ឯកឧត្ដមបណ្ឌិត បានគូសបញ្ជាក់ថា គម្រោងនឹង​កំណត់​ទីតាំងផលិតកម្មរួម ផែនការតាមប្រភេទ និងបរិមាណបន្លែ តាមរយៈ​ធ្វើកិច្ចសន្យាច្បាស់លាស់ជាមួយដៃគូឯកជន។ ក្នុងនោះដែរ  វិស័យឯកជន​ជាដៃគូ នឹងត្រូវវិនិយោគកន្លែងវិចខ្ចប់បន្លែ ដាក់ផែនការឱ្យសហគមន៍ផលិត ផ្តល់ប្រឹក្សាបច្ចេកទេសជូនដល់សមាជិកសហគមន៍​ ដែលបានចុះកិច្ចសន្យា ប្រមូលទិញយកផលិតផលតាមពេលវេលា បរិមាណ តម្លៃ ដែលបានឯកភាព​ក្នុងកិច្ចសន្យា។
ឯកឧត្តមបណ្ឌិតបញ្ជាក់បន្ថែមទៀតថា ជាមួយគ្នានោះដែរ គម្រោង​កែលម្អ​សន្តិសុ​ខទឹកកម្ពុជា នឹងអនុវត្តនៅក្នុងតំបន់វិសាលភាពគម្រោង(១).ប្រព័ន្ធ​ស្រោចស្រព ស្រែហ៊ុយ ស្រុកកោះញែក ខេត្តមណ្ឌលគិរី(២).ប្រព័ន្ធ​ស្រោច​ស្រព កន្ទួត-ស្វាយជ្រុំ ស្រុកចិត្របុរី ខេត្តក្រចេះ(៣).ប្រព័ន្ធស្រោចស្រព ៣០ កញ្ញា ស្រុកស្ទោង ខេត្តកំពង់ធំ និង(៤).ប្រព័ន្ធស្រោចស្រពកំពីងពួយ  ស្រុកជាំក្សាន្ត ខេត្តព្រះវិហារ ក្នុងគោលបំណង បង្កើនចំណូលកសិករ តាម​រយៈ​​ការផ្តល់បច្ចេកទេសផលិតកម្មកសិកម្ម ដែលមានការធន់ទៅ​នឹង​អាកាស​ធាតុ៕