ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំក្រុមការងារជំនាញចុះពិនិត្យ និងជម្រុញការអនុវត្តន៍គម្រោងជលផល ផលសមុទ្រនិងតំបន់ឆ្នេរប្រកបដោយចីរភាព (SCMF) នៅខេត្តកែប
ចេញផ្សាយ ២៨ កុម្ភៈ ២០២៥ 1619
នៅថ្ងៃទី២៧ ខែកុម្ភៈ ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសហប្រធានគណៈកម្មការតម្រង់ទិសគម្រោង អមដំណើរដោយ ឯកឧត្តម ទឹម បូរក្ស អនុរដ្ឋលេខាធិការ លោកបណ្ឌិត ខូវ គួង អនុប្រធានរដ្ឋបាលជលផល និងជាប្រធានគម្រោង បានចុះពិនិត្យ និងជំរុញការអនុវត្តន៍គម្រោងជលផល ផលសមុទ្រ និងតំបន់ឆ្នេរប្រកបដោយចីរភាព (SCMF) និងមានការចូលរួមពី ឯកឧត្តម ហួរ មិថុនា អភិបាលរងនៃគណៈអភិបាលខេត្តកែប និងជានាយកអង្គភាពអនុវត្តគម្រោង SCMF ថ្នាក់ខេត្ត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប នាយខណ្ឌរដ្ឋបាលជលផលកែប អង្គការ MCC និងក្រុមការងារអនុវត្តគម្រោង។
ក្នុងដំណើរបេសសកម្មនេះ ឯកឧត្តមរដ្ឋលេខាធិការ បានជួបប្រជុំសំណេះសំណាលជាមួយសហគមន៍នេសាទភូមិថ្មី និងពិនិត្យវឌ្ឍនភាព នៃការអនុវត្តន៍គម្រោង SCMF ដែលរាយការណ៍ដោយនាយកអង្គភាពអនុវត្តគម្រោងថ្នាក់ខេត្ត រួមមាន៖ ការសាសង់អាគារការិយាល័យខណ្ឌរដ្ឋបាលជលផលកែប ការដាក់ពង្រាយប្រអប់បេតុងជាជម្រកត្រីសិប្បនិម្មិតការពារស្មៅសមុទ្រ ផ្កាថ្ម និងប្រភេទវារីសត្វងាយរងគ្រោះ (ជ្រូកទឹក ផ្សោតសមុទ្រជាដើម) ការគាំទ្រស្ថានីយ៍ភ្ញាស់ដើម្បីបង្កើនផលស្តុកក្តាមសេះ ការការពារនិងស្តារព្រៃកោងកាង និងពង្រឹងសមត្ថភាពសហគមន៍នេសាទ ក្នុងការចូលរួមគ្រប់គ្រងធនធានជលផល។
ទន្ទឹមនឹងនោះឯកឧត្តមរដ្ឋលេខាធិការ បានកោតសរសើរចំពោះវឌ្ឍនភាពនៃការអនុវត្តន៍គម្រោង SCMF ក្នុងខេត្តកែប និងការខិតខំប្រឹងប្រែងរបស់សហគមន៍នេសាទភូមិថ្មី ដែលបានចូលរួមយ៉ាងសកម្ម ទទួលបានលទ្ធផលល្អក្នុងការគ្រប់គ្រង អភិរក្ស និងអភិវឌ្ឍធនធានជលផល។ ឯកឧត្តមរដ្ឋលេខាធិការក៏បានផ្តល់អនុសាសន៍ និងលើកទឹកចិត្តឱ្យបន្តខិតខំប្រឹងប្រែង បង្កើនកិច្ចសហប្រតិបត្តិការរវាងដៃគូពាក់ព័ន្ធ និងពន្លឿនសកម្មភាពអនុវត្តគម្រោងប្រកបដោយប្រសិទ្ធភាព។
នាឱកាសនៃដំណើរបេសសកម្មនោះ ឯកឧត្តមរដ្ឋលេខាធិការក៏បានចូលរួមទម្លាក់ដុំបេតុងចូលទៅសមុទ្រ ដើម្បីដាក់ពង្រាយសំណង់ជម្រកត្រីសិប្បនិម្មិត។ ជាមួយគ្នានោះឯកឧត្តមបាននាំយក "ម៉ាស៊ីនផលិតទឹកសាប" ដែលជាអំណោយរបស់ឯកឧត្តមរដ្ឋមន្រ្តី ឌិត ទីណា ប្រគល់ជូនក្រុមការងារអង្គការ MCC និងនគរបាលព្រំដែនទឹកនៅលើកោះអាចម៍សេះ ដើម្បីប្រើប្រាស់រួមគ្នា៕
