ក្រសួងកសិកម្ម រុក្ខាប្រមាញ់ និងនេសាទ រៀបចំកិច្ចប្រជុំ ផ្សព្វផ្សាយកម្មវិធីគាំទ្រការឆ្លើយតបបន្ទាន់ដោយពហុវិបត្តិ(CERC) នៅក្នុងខេត្តមណ្ឌលគិរី

ចេញ​ផ្សាយ​ ២២ សីហា ២០២៦ 3195

នៅថ្ងៃទី២២ ខែសីហា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ និងជានាយកគម្រោងកែលម្អសន្តិសុខទឹកកម្ពុជា (CaWSIP) បានដឹកនាំក្រុមការងាររៀបចំកិច្ចប្រជុំផ្សព្វផ្សាយស្តីពី ការអនុវត្តសមាសភាគឆ្លើយតបបន្ទាន់ដោយពហុវិបត្តិ (CERC) នៅស្រុកកោះញែក ខេត្តមណ្ឌលគិរី។
កិច្ចប្រជុំនេះមានការចូលរួមពីអាជ្ញាធរមូលដ្ឋាន មន្ត្រីគម្រោង មន្ត្រីជំនាញបច្ចេកទេស តំណាងសហគមន៍កសិកម្ម សហគមន៍ប្រើប្រាស់ទឹក (FWUC) និងកសិករនៅតំបន់គោលដៅ ដើម្បីពង្រឹងការយល់ដឹង និងកិច្ចសហការក្នុងការត្រៀមខ្លួន និងឆ្លើយតបប្រកបដោយប្រសិទ្ធភាពចំពោះស្ថានភាពពហុវិបត្តិ។
គោលបំណងនៃកិច្ចប្រជុំដើម្បីផ្សព្វផ្សាយ វិសាលភាព និងយន្តការអនុវត្តកម្មវិធី CERC ក្រោមក្របខណ្ឌគម្រោង CaWSIP ព្រមទាំងពង្រឹងការយល់ដឹង ការត្រៀមខ្លួន និងការឆ្លើយតបចំពោះស្ថានភាពពហុវិបត្តិ។ កម្មវិធី CERC ផ្តោតលើការគាំទ្រផលិតកម្មបន្លែសុវត្ថិភាព ការដាំផ្សិត ការចិញ្ចឹមមាន់ កង្កែប និងវារីវប្បកម្ម ដើម្បីពង្រឹងកសិកម្មឆ្លាតវៃធន់នឹងការប្រែប្រួលអាកាសធាតុ បង្កើនការតភ្ជាប់ទីផ្សារ និងលើកកម្ពស់ជីវភាពគ្រួសារងាយរងគ្រោះពីពហុវិបត្ដិ។
ក្នុងឱកាសនោះ ឯកឧត្តមបណ្ឌិត ហ៊ាន វណ្ណហន បានណែនាំដល់ក្រុមការងារ និងអាជ្ញាធរមូលដ្ឋាន ឱ្យបន្តពង្រឹងកិច្ចសហការគ្នា ក្នុងការរៀបចំ និងអនុវត្តសកម្មភាពនានាឱ្យបានរលូន មានប្រសិទ្ធភាព និងស្របតាមគោលការណ៍ និងនីតិវិធីរបស់គម្រោង។ ជាពិសេស ត្រូវយកចិត្តទុកដាក់លើការកំណត់ និងជ្រើសរើសអ្នកទទួលផលឱ្យបានត្រឹមត្រូវ តម្លាភាព និងយុត្តិធម៌ ដោយផ្តោតលើគ្រួសារ និងកសិករដែលមានតម្រូវការ សក្តានុពល និងការប្តេជ្ញាចិត្តពិតប្រាកដ ពិសេសអ្នកដែលកំពុងប្រឈមនឹងផលប៉ះពាល់ពីពហុវិបត្តិ៕