ឯកឧត្តម តូច ប៊ុនហួរ និង ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារកម្មវិធី ASPIRE-AT និងគម្រោង CREA ធ្វើទស្សនកិច្ចក្រុមហ៊ុនកសិកម្ម និងសហគមន៍កសិកម្ម ព្រមទាំងដឹកនាំកិច្ចប្រជុំប្រចាំឆ្នាំ

ចេញ​ផ្សាយ​ ៦ ធ្នូ ២០២៥ 2477

ពីថ្ងៃទី៤ ដល់ទី៦ ខែធ្នូ ឆ្នាំ ២០២៥ ឯកឧត្តម តូច ប៊ុនហួរ និង ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងឋានៈជាសហប្រធានគណៈកម្មាធិការតម្រង់ទិស និងជានាយក “ កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (Agriculture Services Programme for an Inclusive Rural Economy and Agricultural Trade, ASPIRE-AT) ” និង “ គម្រោងបង្កើនភាពធន់នឹងអាកាសធាតុ ក្នុងខ្សែច្រវាក់តម្លៃកសិកម្មនៅកម្ពុជា (CREA Project) ” អមដំណើរដោយ ឯកឧត្តមអនុរដ្ឋលេខាធិការ ចាន់ សុវត្ថិភាព និង ឯកឧត្តមអនុរដ្ឋលេខាធិការ សាយ សុភភោគា បានដឹកនាំធ្វើទស្សនកិច្ចក្រុមហ៊ុនកសិកម្ម និងសហគមន៍កសិកម្ម នៅខេត្តកំពង់ធំ ព្រះវិហារ និងខេត្តសៀមរាប ព្រមទាំងដឹកនាំកិច្ចប្រជុំប្រចាំឆ្នាំ នៅខេត្តសៀមរាប ដើម្បីពិនិត្យ បូកសរុប និងវាយតម្លៃលទ្ធផល ដែលកម្មវិធី ASPIRE-AT សម្រេចបាន នៅក្នុងឆ្នាំ ២០២៥ ហើយកំណត់បញ្ហាប្រឈម ទិសដៅ និងសកម្មភាពនានា ដែលគួរត្រូវបានដោះស្រាយ និងអនុវត្ត នៅក្នុងឆ្នាំ ២០២៦ ។  
ទស្សនកិច្ច និងកិច្ចប្រជុំនេះត្រូវបានចូលរួមដោយ លោក Frew Behabtu នាយកមូលនិធិអន្តរជាតិ សម្រាប់អភិវឌ្ឍន៍កសិកម្ម (IFAD) ប្រចាំនៅកម្ពុជា មន្ត្រីលេខាធិការដ្ឋាន និងទីប្រឹក្សាកម្មវិធី ASPIRE-AT មន្ត្រី និងទីប្រឹក្សាគម្រោង “ បង្កើនភាពធន់នឹងអាកាសធាតុ ក្នុងខ្សែច្រវាក់តម្លៃកសិកម្មនៅកម្ពុជា (CREA Project) ” និងមន្ត្រីគម្រោង EU-German CAPSAFE សរុបចំនួន ៦២ នាក់ ក្នុងនោះ មានស្ត្រីចំនួន ១៤ នាក់ ។ ទិដ្ឋភាពសំខាន់ៗដែលបានផ្តោតគឺ ៖ ១) លទ្ធផលល្អ ឬ មេរៀន និងបទពិសោធន៍ ដែលគួរធ្វើឱ្យកាន់តែសាយភាយ ២) ផលប្រយោជន៍នានា ដែលកសិករ សហគមន៍កសិកម្ម និងក្រុមហ៊ុនកសិកម្ម ទទួលបានពីការគាំទ្ររបស់ក្រសួង និងគម្រោងនានារបស់ក្រសួង និង ៣) ភាពខ្វះចន្លោះ ឬ បញ្ហាប្រឈមនានា ដែលក្រសួងគួរដឹង ហើយរកវិធីធ្វើអន្តរាគមន៍ដើម្បីជួយដោះស្រាយឱ្យបានកាន់តែល្អ ។
គួរបញ្ជាក់ថា កម្មវិធី ASPIRE-AT និងគម្រោង CREA កំពុងត្រូវបានអនុវត្ត ដោយប្រើប្រាស់ថវិកាជាតិ ព្រមទាំងប្រាក់កម្ចី និងប្រាក់ជំនួយ ដែលរាជរដ្ឋាភិបាលកម្ពុជាខ្ចី និងទទួលបានពី IFAD សហភាពអឺរ៉ុប (EU) ធនាគារវិនិយោគអឺរ៉ុប (EIB) មូលនិធិបរិស្ថានសាកល (GEF) និងកិច្ចសហប្រតិបត្តិការត្បូង-ត្បូង (SSTC)៕