ឯកឧត្តមរដ្ឋមន្រ្តី វេង សាខុន អញ្ជើញមកពិនិត្យសកម្មភាពនេសាទរបស់សហគមន៍នេសាទជ្រោយប្រស់ និងសហគមន៍នេសាទព្រែកខ្សាច់ ឃុំព្រែកខ្សាច់ ស្រុកគីរីសាគរ

ចេញ​ផ្សាយ​ ២២ មិថុនា ២០២០ 18429

កម្មវិធីទី២-
អញ្ជើញមកពិនិត្យសកម្មភាពនេសាទរបស់សហគមន៍នេសាទជ្រោយប្រស់ និងសហគមន៍នេសាទព្រែកខ្សាច់ ឃុំព្រែកខ្សាច់ ស្រុកគីរីសាគរ។ តាមផ្លូវមកកាន់សហគមន៍នេសាទ ឯកឧត្តមរដ្ឋមន្ត្រី និងសហការីបានអញ្ជើញចូលសួរសុខទុក្ខនាយទាហាន និងពលទាហាននៅបញ្ជាការកងការពារកោះលេខ ២ ដែលប្រចាំការលើកោះ។ ជួបសំណេះសំណាលជាមួយបងប្អូននាយទាហាន និងពលទាហាន លោកឧត្តមនាវាត្រី ជា ស៊ីធុនឡាយ មេបញ្ជាការកងការពារកោះកុងក្រៅលេខ ២ បានរាយការណ៍ដោយសង្ខេបអំពីស្ថានភាពភូមិសាស្រ្តវិសាលភាពកោះកុងក្រៅ តួនាទី និងភារកិច្ចរបស់បញ្ជាការ សន្តិសុខ សណ្តាប់ធ្នាប់ ជីវភាព សុខភាព និងធនធានធម្មជាតិ។ល។ នាឱកាសនេះ ឯកឧត្តមរដ្ឋមន្ត្រី និងឯកឧត្តម លី យ៉ុងផាត់ បានពាំនាំនូវការផ្តាំផ្ញើសាកសួរសុខ ទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងជូនពរឱ្យនាយ ទាហាន និងពលទាហានដែលប្រចាំការលើកោះកុងក្រៅនេះមានសុខភាពល្អ និងទទួលបានជ័យជំនះគ្រប់ភារកិច្ចក្នុងការការពារសុខសន្តិភាព និងបូរណភាពដឹកដី។ ក្នុងនាមថ្នាក់ដឹកនាំក្រសួង ឯកឧត្តមសមាជិកព្រឹទ្ធសភា អាជ្ញាធរដែនដី ឯកឧត្តមរដ្ឋមន្ត្រីបានកោតសរសើរ និងវាយតម្លៃខ្ពស់ចំពោះវីរយុទ្ធជន និងវីរយុទ្ធនារីដែលបានលះបង់កំលាំងកាយចិត្ត សេចក្តីសុខទុក្ខផ្ទាល់ខ្លួនដើម្បីបុព្វហេតុជាតិ និងប្រជាជន សូមគោរព និងដឹងគុណចំពោះវីរភាពដ៏ថ្លៃថ្លានេះ។ ជាការលើកទឹកចិត្ត និងជួយសម្រាលបញ្ហាជីវភាពប្រចាំថ្ងៃ ឯកឧត្តមរដ្ឋមន្ត្រីបានឧបត្ថម្ភថវិកាចំនួន ៥លានរៀលផងដែរ។

បន្តដំណើរតាមទូកម៉ាស៊ីន មកដល់សហគមន៍នេសាទព្រែកខ្សាច់ ឯកឧត្តមរដ្ឋមន្ត្រី ជួបសំណេះ សំណាលជាមួយលោក រៀម រុំ មេឃុំព្រែកខ្សាច់អំពីសកម្មភាពទូទៅទាក់ទងការអភិវឌ្ឍ ការដឹក នាំ ការគ្រប់គ្រងសហគមន៍ ការនេសាទ ទីផ្សារប្រមូលផលនេសាទ និងជាពិសេសចំណូលគ្រួសារ។ លោកមេឃុំ បានឱ្យដឹងថាជាមធ្យមក្នុង១ថ្ងៃសមាជិកសហគមន៍អាចរកចំណូលបានពី១០-២០ម៉ឺនរៀលក្នុងមួយគ្រួសារ ពីការនេសាទ។ ក្រៅពីការនេសាទ ពួកគាត់ទទួលបានការងារធ្វើពីក្រុម ហ៊ុន SEZ ក្នុងចំការស្វាយ និងទុរេន ដោយឡែកស្វាមីបម្រើការនៅក្នុងគម្រោងអភិវឌ្ឍនេះផ្ទាល់ ជាអ្នកបើកបរ និងកម្មករកំពង់ផែ។ គម្រោងបានជួយកសាង សាលារៀន សាលាឃុំ ផ្លូវថ្នល់ ផ្ទះលោកគ្រូ-អ្នកគ្រូ ផ្ទះកម្មករ។ ក្រៅពីនេះ គម្រោងកំពុងកសាងកំពង់ផែទឹកជ្រៅសម្រាប់បម្រើឱ្យវិស័យពាណិជ្ជកម្មសមុទ្រ។ តាមរបាយការណ៍របស់រដ្ឋបាលជលផលបានឱ្យដឹងថា នៅក្នុងដែន នេសាទរបស់សហគមន៍មានតំបន់ផ្កាថ្មដ៏ល្អ ស្អាត និងសារាយសមុទ្រ និងជាតំបន់ជម្រកពង កូនត្រីកាម៉ុង។ ឯកឧត្តមរដ្ឋមន្ត្រីសូមចូលរួមអបអរសាទរនូវរាល់សមិទ្ធផលដែលសហគមន៍សម្រេចបាន និងបានជំរុញ គាំទ្រសហគមន៍បន្តចូលរួមការពារ ថែរក្សា និងអភិរក្សធនធានសមុទ្រដែលជាប្រភពចំណូលយ៉ាងរឹងមាំ និងនិរន្តរភាពទាំងសេដ្ឋកិច្ច សង្គម និងទេសចរណ៍។ ចំពោះ រដ្ឋបាលជលផលចាត់វិធានការការពារតំបន់អភិរក្សផ្កាថ្ម និងសារាយសមុទ្រឱ្យបានគង់វង្ស។