ឯកឧត្តម ហ៊ាន វណ្ណហន រដ្ឋលេខាធិការ ក្រសួងកសិកម្ម អញ្ជើញដឹកនាំក្រុមការងារចុះពិនិត្យវាយតម្លៃសហគមន៍កសិកម្ម ដែលត្រូវបានជ្រើសរើសចូលរួមអនុវត្ដទស្សនទានជំរុញផលិតកម្មបន្លែឆ្នាំ២០២៤

ចេញ​ផ្សាយ​ ៦ មេសា ២០២៤ 3044

ឯកឧត្តម ហ៊ាន វណ្ណហន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ ដែលមានថ្នាក់ដឹកនាំ តំណាងនាយកដ្ឋាន និងមន្រ្ដីពាក់ព័ន្ធនៃអគ្គនាយកដ្ឋានកសិកម្ម ចុះពិនិត្យវាយតម្លៃសហគមន៍កសិកម្ម ដែលត្រូវបានជ្រើសរើសចូលរួមអនុវត្ដទស្សនទាន ជំរុញផលិតកម្មបន្លែឆ្នាំ២០២៤ ចំនួន៧ នៅខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ និងខេត្តសៀមរាប ដែលដំណើរចុះពិនិត្យនេះ ប្រព្រឹត្ដទៅចាប់ពីថ្ងៃទី០២ ដល់ទី០៥ ខែមេសា ឆ្នាំ២០២៤។

គោលបំណងនៃបេសកកម្មនេះ គឺដើម្បីពិនិត្យមើលជាក់ស្ដែងពីតម្រូវការចាំបាច់ ក្នុងការផ្តល់ជំនួយបច្ចេកទេសដល់សហគមន៍ តាមការចង្អុលបង្ហាញ និងអនុសាសន៍ណែនាំដ៏ខ្ពង់ខ្ពស់ពីឯកឧត្ដម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ លើការដោះស្រាយបញ្ហា បង្កើនផលិតភាពផលិតកម្ម (បង្កើនប្រាក់ចំណេញ) បញ្ហារាំងស្ទះលំហូរពីផលិតកម្មទៅកាន់ទីផ្សារឱ្យមានភាពរលូន លឿន ជឿជាក់ ទាំងប្រភេទ បរិមាណ និងគុណភាព ដែលជាកត្តាជម្រុញកំណើនផលិតកម្មបន្លែសុវត្ថិភាពស្របតាមតម្រូវការទីផ្សារ។

ក្នុងឱកាសចុះពិនិត្យនោះ ឯកឧត្ដម ហ៊ាន វណ្ណហន និងក្រុមការងារ បានពិនិត្យឃើញពីចំណុចខ្លាំង និងចំណុចខ្សោយរបស់សហគមន៍លើការជំរុញផលិតភាពផលិតកម្មបន្លែ។ ចំណុចខ្វះខាតក្នុងការបង្កើនផលិតភាព និងបង្កើនប្រសិទ្ធផលដល់សហគមន៍ គឺជាចំណុចចាំបាច់ដែលត្រូវបំពេញបន្ថែម។

ឯកឧត្តមក៏បានផ្ដល់អនុសាសន៍ណែនាំ និងផ្ដល់លទ្ធភាពគាំទ្រដល់សហគមន៍កសិកម្ម មានដូចជា៖ ១.ពង្រឹងរៀបចំដំណើរការផែនការផលិតកម្ម ទីផ្សារលក់រួម និងបង្កើនសមត្ថភាពដឹកនាំសហគមន៍ ការផលិតរបស់សហគមន៍ និងសមត្ថភាពចរចារទីផ្សារ ២.ចាត់ចែងគិតគូរ ថែទាំ ប្រើប្រាស់ ស្ថានីយស្រោចស្រពបន្លែចំពោះសហគមន៍ដែលទទួលបានជំនួយគាំទ្រពីក្រសួងកសិកម្ម និងដៃគូរអភិវឌ្ឍនានាឲ្យមានប្រសិទ្ធភាព និងនិរន្តរភាព ៣.រៀបចំសំណើស្នើសុំផ្ដល់វគ្គបណ្ដុះបណ្ដាលបំពាក់បំប៉នបំពេញបន្ថែមពីមន្ទីរកសិកម្ម និងអង្គភាពជំនាញក្រោមឱវាទក្រសួងកសិកម្ម ៤.បន្ដសហការជាមួយមន្ទីរកសិកម្ម និងអាជ្ញាធរ ស្រុក-ឃុំ ចូលរួមដោះស្រាយបញ្ហាពាក់ព័ន្ធនានា ដែលសហគមន៍កំពុងប្រឈមរាំងស្ទះដល់ខ្សែច្រវាក់ផលិតកម្ម៕