លោកជំទាវអនុរដ្ឋលេខាធិការ អ៊ឹម រចនា និងលោក Wang Ding អញ្ជើញដឹកនាំកិច្ចពិភាក្សាចែករំលែកបទពិសោធន៍ការអភិរក្ស និងគ្រប់គ្រងសត្វផ្សោតទឹកសាប ក្នុងសិក្ខាសាលាថ្នាក់តំបន់ មាន៥ប្រទេស

ចេញ​ផ្សាយ​ ៣ ធ្នូ ២០២៥ 1806

នៅរសៀលថ្ងៃទី០២-០៣ ខែធ្នូ ឆ្នាំ២០២៥ លោកជំទាវ អ៊ឹម រចនា អនុរដ្ឋ​លេខា​ធិការ ក្រសួងកសិកម្ម រុក្ខាប្រមាញ់ និងនេសាទ និងលោក Wang Ding សាស្រ្តាចារ្យវិទ្យាស្ថានជីវសាស្ត្រនៃបណ្ឌិតសភា​វិទ្យាសាស្ត្រ​ប្រទេសចិន បានដឹកនាំកិច្ចពិភាក្សាចែករំលែកបទពិសោធន៍ ពីប្រទេស​ចិន ឡាវ ភូមា និងប្រទេសឥណ្ឌូនេស៊ី និងកម្ពុជា ក្នុងសិក្ខា​សាលា​​ថ្នាក់តំបន់​ស្តីពី «ការចែករំលែកបទពិសោធន៍ និងការអនុវត្ត​សកម្មភាព​ជោគជ័យ លើការអភិរក្សនិងគ្រប់គ្រងសត្វផ្សោតទឹកសាប និងជីវ​ចម្រុះ»។ 
កិច្ចពិភាក្សាធ្វើឡើងនៅសណ្ឋាគារសុខាល័យអង្គរ ខេត្តសៀមរាប ​មាន​ការ​ចូលរួមពី លោកបណ្ឌិត អ៊ុក វិបុល ប្រធាននាយក​ដ្ឋាន​អភិរក្សជល​ផល នៃរដ្ឋបាលជលផល លោក ផៃ សុម៉ានី អនុប្រធាន​នាយកដ្ឋាន​អភិរក្ស​ជលផល តំណាងមកពីប្រទេសចិន ឡាវ ភូមា និង​ប្រទេស​ឥណ្ឌូនេស៊ី រដ្ឋបាលជលផល សកលវិទ្យាល័យភូមិន្ទកសិកម្ម និង​វិទ្យាស្ថាន​ជាតិ​កសិកម្ម ព្រែកលៀប និងមន្ទីរកសិកម្ម ខេត្តក្រចេះ និង​ស្ទឹងត្រែង តំណាងអង្គការដៃគូWWF សរុបអ្នកចូលរួម​ប្រមាណ​៤០នាក់។
សូមជម្រាបថា គម្រោង «ការកសាងសមត្ថភាពរបស់​សមាជិក នៃប្រទេសតាម​ដង​ទន្លេមេគង្គដើម្បីការពារសត្វផ្សោតទឹកសាប និងជីវចម្រុះ នៃមូល​និធិ​ពិសេសមេគង្គ-ឡាងឆាង» ធ្វើឡើងក្នុងគោលបំណងចែក​រំលែកបទ​ពិសោធន៍​ពីភាពជោគជ័យ នៃការការពារសត្វផ្សោតទឹកសាប និងរៀបចំ​ផែនការសកម្មភាពនាពេលអនាគត ដើម្បីជំរុញការការពារ ​និង​អភិរក្សធនធាន ដ៏មានតម្លៃនេះឱ្យកាន់តែមានប្រសិទ្ធភាពនិងប្រសិទ្ធផលបន្ថែមទៀត។
នាឱកាសនោះ តំណាងនៃប្រទេសទាំង៥ បានលើកឡើងជជែក​យ៉ាង​​ផុលផុស តាមរយៈបទបង្ហាញពីលទ្ធផល នៃគម្រោងដែលមានចំណ​ង​ជើងថា «ការកសាង​សមត្ថភាពរបស់ប្រទេសសមាជិកទន្លេមេគង្គ ដើម្បី​ការពារផ្សោតទឹកសាប និងជីវចម្រុះ បទបង្ហាញពី​លទ្ធផល»  បទ​ពិសោធ និងការអនុវត្តល្អបំផុត ដើម្បីការពារផ្សោត​គ្មានព្រុយ​នៅទន្លេ​យ៉ាងសេ ដោយវិទ្យាស្ថានវារីសាស្ត្រ (IHB) នៃបណ្ឌិត្យសភាវិទ្យាសាស្ត្រចិន។ ការការពារ​ផ្សោត​អ៊ីរ៉ាវ៉ាឌី នៅ​ទន្លេAyeyarwady ប្រទេសមីយ៉ាម៉ា នៅទន្លេMahakam ប្រទេស​ឥណ្ឌូណេស៊ី និង​ការការពារជីវៈចម្រុះ និងជម្រកវារីសត្វសំខាន់ៗ ​នៃទន្លេមេគង្គ ប្រទេស​ឡាវ។ 
សម្រាប់កម្ពុជា វាគ្មិនបានបង្ហាញពីរបៀបកែលម្អការគ្រប់គ្រង និងការអភិរក្ស​ផ្សោត​អ៊ីរ៉ាវ៉ាឌី​ទឹកសាប នា​ពេលបច្ចុប្បន្នឱ្យកាន់តែប្រសើរឡើង ដោយ​ប្រើ​ប្រាស់បទពិសោធន៍ និងចំណេះដឹងដែល​ទទួលបានពីដំណើរទស្សនកិច្ច​ផ្លាស់​ប្តូរនៅ​ទីក្រុង​វូហាន ប្រទេសចិនកាលពីខែមិថុនា ឆ្នាំ២០២៥ កន្លង​ទៅ​។ ផ្នែកមួយនៃចំណេះដឹងដែលទទួលបាននិងត្រៀមអនុវត្តនាដើមឆ្នាំ២០២៦ខាងមុខ រួមមាន៖​ ការប្រើប្រាស់​កាមេរ៉ាស្វ័យប្រវត្តិ និងឧបករណ៍តាមដានសំឡេងដើម្បីតាមដានសកម្មភាព​ប្រចាំថ្ងៃ​របស់ផ្សោត ទាំងនៅខេត្តក្រចេះ និងស្ទឹងត្រែង៕