លោកជំទាវ យ៉ើ អាស៊ីគីន អញ្ជើញដឹកនាំប្រតិភូកម្ពុជាធ្វើទស្សន​កិច្ច​សិក្សា និងដកស្រង់បទពិសោធន៍កម្រិតអន្តរជាតិ ពីសហគមន៍​នៅ​ប្រទេស​អៀរឡង់

ចេញ​ផ្សាយ​ ៩ ឧសភា ២០២៦ 6467

ក្នុងរយៈពេល១សប្តាហ៍ ចាប់ពីថ្ងៃទី០២ ដល់ទី០៩ ខែឧសភា ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋលេខាធិការក្រសួង​កសិកម្ម រុក្ខាប្រមាញ់ និងនេសាទ បានដឹកនាំប្រតិភូតំណាង​សហគមន៍​កសិកម្ម​មកពីខេត្តតាកែវ និងកំពង់ធំ ចូលរួមកម្មវិធីផ្លាស់​ប្តូរការអប់រំស្តីពី «ការពង្រឹងអភិបាលកិច្ចសហគមន៍កសិកម្មដើម្បី​ការអភិវឌ្ឍប្រកបដោយចីរភាព» ដែលរៀបចំដោយមជ្ឈមណ្ឌល​អេកូលែន (ECOLAND) នៃសាកលវិទ្យាល័យភូមិន្ទកសិកម្ម សហការ​ជាមួយសាកលវិទ្យាល័យ UCC ក្រោមការឧបត្ថម្ភពីIrish Aid។
នាដំណើរទស្សនកិច្ចយុទ្ធសាស្ត្រនេះ ប្រតិភូសម្រេចបាននូវ​លទ្ធផលផ្លែផ្កាជាច្រើន រួមមាន៖ ការចុះសិក្សាផ្ទាល់ពីអភិបាលកិច្ច និងគំរូអាជីវកម្មខ្នាតធំនៅសហគមន៍ Barryroe, Drinagh Co-Operative Ltd, Bushy Park និង Quay Co-op ជាពិសេស​លើការធ្វើទំនើបកម្មខ្សែច្រវាក់តម្លៃ និងការពង្រីកវិសាលភាព​អាជីវកម្ម​ពហុគោលបំណង ដូចជាៈ ការបង្កើតហាងទំនិញ និងអាហារដ្ឋាន ដើម្បី​បង្កើនប្រាក់ចំណូលប្រកបដោយនិរន្តរភាព។
ទន្ទឹមនឹងនេះ ប្រតិភូបានទទួលចំណេះដឹង តាមរយៈបទ​បឋក​ថាពីវាគ្មិនជំនាញ មកពីប្រទេសអៀរឡង់ អង់គ្លេស បារាំង អ៊ីតាលី និង​បូគីណាហ្វាសូ ស្តីពីលទ្ធផលស្រាវជ្រាវ និងការតម្រង់​ទិសគោលនយោ​បាយ​កសិកម្មសកល។ ឈ្វេងយល់ពីបញ្ហាប្រឈម​នៃកត្តា​ភូមិសាស្ត្រ​នយោបាយ និងការរៀបចំអ្នកបន្តវេនក្នុងវិស័យកសិកម្ម ដែលជា​មេរៀន​​យុទ្ធសាស្ត្រដ៏សំខាន់សម្រាប់យកមកអនុវត្ត និងបន្ស៊ីជាមួយ​បរិបទ​នៃសហគមន៍កសិកម្មនៅកម្ពុជាឱ្យកាន់តែមានសក្តានុពល។
សូមបញ្ជាក់ថា ចំណេះដឹង និងនវានុវត្តន៍ដែលទទួលបានពីកម្មវិធីនេះ នឹងក្លាយជាធាតុចូលដ៏វិសេសវិសាលក្នុងការអភិវឌ្ឍសមត្ថភាពសហគមន៍​កសិកម្មកម្ពុជា ឱ្យកាន់តែមានភាពធន់ ភាពប្រកួតប្រជែង និង​បរិយាបន្ន ស្របតាមទិសដៅទំនើបកម្មកសិកម្មរបស់រាជរដ្ឋា​ភិបាល​កម្ពុជាផងដែរ៕