Other News
ឯកឧត្តមរដ្ឋលេខាធិការ អ៊ួង កុសល អញ្ជើញដឹកនាំក្រុមការងារចុះ ពិនិត្យស្ថានភាពផលិតកម្មបន្លែរបស់កសិករនៅទីតាំងមួយចំនួន ក្នុងក្រុងសែនមនោរម្យ ខេត្តមណ្ឌលគិរី
ចេញផ្សាយ ១៣ កុម្ភៈ ២០២៦ 3162
នៅថ្ងៃទី១៣ ខែកុម្ភៈ ឆ្នាំ២០២៦ ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយ លោក ហាន សុភក្តិ អនុប្រធានមន្ទីរកសិកម្មខេត្តមណ្ឌលគិរី លោកប្រធានការិយាល័យក្សេត្រសាស្រ្ត និងបង្កើនផលិតភាពកសិកម្ម និងមន្ត្រីកសិកម្មឃុំ បានចុះពិនិត្យស្ថានភាពផលិតកម្មបន្លែរបស់កសិករចំនួន២ទីតាំង រួមមាន៖ កសិករឈ្មោះ ឃ្លោក ថេង និងកសិករឈ្មោះ សុខ គន្ធា ដែលបានដាំដុះបន្លែ ស្ពៃក្តោប បូកគោ ការ៉ុត សាលាដ ត្រប់ និងខាត់ណាដើម ដែលមានទីតាំងនៅក្នុងក្រុងសែនមនោរម្យ ខេត្តមណ្ឌលគិរី។
តាមការពិនិត្យជាក់ស្តែងឃើញថា ការដាំដុះប្រភេទបន្លែខាងលើ ដាំដុះបានល្អ ត្រូវនឹងលក្ខខណ្ឌអាកាសធាតុ ផ្តល់ទិន្នផលខ្ពស់ សមស្របទៅនឹងតម្រូវការទីផ្សារក្នុងស្រុក និងការនាំចេញ។
នាឱកាសនោះដែរ ឯកឧត្តម អ៊ួង កុសល បានណែនាំដល់ថ្នាក់ដឹកនាំមន្ទីរកសិកម្មខេត្ត និងមន្ត្រីកសិកម្មឃុំ បន្តចុះជួបកសិករជាប្រចាំ ជួយផ្ដល់នូវជំនាញបច្ចេកទេសកសិកម្មសមស្រប និងប្រកបដោយប្រសិទ្ធភាព ដើម្បីកាត់បន្ថយថ្លៃដើមផលិតកម្ម លើកកម្ពស់គុណភាព សុវត្ថិភាព និងសម្របសម្រួលទីផ្សារជូនកសិករជាដើម៕
