ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាព ក្នុងកិច្ចប្រជុំពិនិត្យគម្រោង «ជលផលសមុទ្រ និងតំបន់ឆ្នេរប្រកបដោយចីរភាព (SCMF)»
ចេញផ្សាយ ១៩ ឧសភា ២០២៦ 3229
នៅថ្ងៃទី១៨ ខែឧសភា ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការតម្រង់ទិសគម្រោង SCMF បានអញ្ជើញជាអធិបតីភាពក្នុងកិច្ចប្រជុំចាប់ផ្តើមបេសកកម្ម ពិនិត្យគម្រោង «ជលផលសមុទ្រនិងតំបន់ឆ្នេរប្រកបដោយចីរភាព (SCMF)» ក្រោមក្របខណ្ឌហិរញ្ញប្បទាន របស់ធនាគារអភិវឌ្ឍន៍អាស៊ី(ADB) និងទីភ្នាក់ងារបារាំងសម្រាប់ការអភិវឌ្ឍ(AFD)។
កិច្ចប្រជុំនេះ មានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ដែលរួមមាន៖ ក្រុមការងារ ADB មកពីស្នាក់ការកណ្តាលនៅទីក្រុងម៉ានីល ប្រទេសហ្វីលីពីន និងប្រចាំកម្ពុជា ដៃគូអនុវត្តគម្រោងមកពីអគ្គនាយកដ្ឋានជលផល ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន សហគ្រិនខ្មែរ(KE) និងរដ្ឋបាលថ្នាក់ក្រោមជាតិ នៃខេត្តតំបន់ឆ្នេរទាំង៤។ គោលបំណងនៃបេសកកម្ម គឺដើម្បីពិនិត្យវឌ្ឍនភាពនៃការអនុវត្តគម្រោង ផែនការសកម្មភាពសម្រាប់អនុវត្តបន្ត បញ្ហាប្រឈម និងស្វែងរកដំណោះស្រាយ ដើម្បីជំរុញការអនុវត្តឱ្យទទួលបានជោគជ័យតាមការរំពឹងទុក។
ជាកិច្ចចាប់ផ្តើម ឯកឧត្តម ពុំ សុថា អគ្គនាយកនៃអគ្គនាយកដ្ឋានជលផល និងជានាយកគម្រោង បានជម្រាបជូនអំពីគម្រោង SCMF កំពុងធ្វើការវិនិយោគ ដើម្បីពង្រឹងភាពធន់នឹងអាកាសធាតុ និងនិរន្តរភាពនៃធនធានជលផលតំបន់ឆ្នេរ និងសមុទ្រកម្ពុជា ស្តារឡើងវិញនូវប្រព័ន្ធអេកូឡូស៊ីជលផល និងផលនេសាទសមុទ្រ ដាក់ពង្រាយសំណង់ជម្រកត្រីសិប្បនិម្មិត។ ជំរុញការធ្វើវារីវប្បកម្មក្នុងសមុទ្រតាមបែបធម្មជាតិ និងអភិវឌ្ឍផែនេសាទប្រកដោយស្តង់ដារ សម្រាប់ឡើងផលនេសាទ និងលើកកម្ពស់សុវត្ថិភាពអាហារសមុទ្រ។ គម្រោងក៏ពង្រឹងសហគមន៍នេសាទតំបន់ឆ្នេរ អភិវឌ្ឍវិស័យឯកជន ឱ្យមានសមត្ថភាពក្នុងការធ្វើពិពិធកម្មនិងពង្រីកអាជីវកម្មប្រកបដោយជោគជ័យ។
នាឱកាសនោះ ឯកឧត្តមរដ្ឋលេខាធិការ ហាស់ សារ៉េត បានគូសបញ្ជាក់អំពីសារសំខាន់របស់គម្រោង ក្នុងការគាំទ្រគោលនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល។ ទន្ទឹមនឹងនេះSCMFជាគម្រោងដ៏ធំមួយ ដែលទាមទារឱ្យមានការជួយគាំទ្រ ការជំរុញ និងការដោះស្រាយបញ្ហាប្រឈមជាបន្តបន្ទាប់ តាមរយៈការសម្របសម្រួល និងចូលរួមពីក្រសួង ស្ថាប័ន អាជ្ញាធរពាក់ព័ន្ធ និងដៃគូអភិវឌ្ឍ។
ជាចុងបញ្ចប់ ឯកឧត្តមបានផ្តល់អនុសាសន៍ជំរុញការអនុវត្តប្រកបដោយប្រសិទ្ធភាព និងលើកទឹកចិត្តដល់ក្រុមការងារក្នុងបេសកកម្ម ជជែកពិភាក្សាគ្រប់ជ្រុងជ្រោយ ក្នុងការដោះស្រាយបញ្ហានានាដើម្បីឈានទៅសម្រេចឱ្យបាននូវផែនការគម្រោង៕
